Акафистник

Помочь сайту
·
·
·
·

Канон святому великомученику Меркурию Кесарийскому (Каппадокийскому)

Память: 7 декабря (24 ноября)

Глас 8.

Припев: Святы́й великому́чениче Мерку́рие, моли́ Бо́га о на́с.

Пе́снь 1.

Ирмо́с: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися.

С го́рними ли́ки, Мерку́рие, благи́х исто́чнику, ра́дуяся, предстоя́, и Боже́ственныя сла́дости, приснопа́мятне, исполня́яся, любо́вию торжество́ твое́ соверша́ющия сохраня́й, Го́споду пою́щия: сла́вно бо просла́вися.

Во́льно вше́л еси́ в три́знище муче́ния, му́дре, си́лою укрепля́емь Христо́вою, на́с ра́ди стра́сти спаси́тельныя во́лею претерпе́вшаго пло́тию, и, ра́дуяся, взыва́л еси́: Го́споду пои́м, сла́вно бо просла́вися.

Глаго́л мучи́теля я́ве укори́л еси́, испове́данием Христо́вым, блаже́нне, украша́емь, и вся́кий боле́зней ви́д, веселя́ся, претерпе́л еси́, Мерку́рие, вопия́ тебе́ Укре́пльшему: Го́споду пои́м, сла́вно бо просла́вися.

Богоро́дичен: От Отрокови́цы Де́вы яви́лся еси́, воплоща́емь на́с ра́ди, по на́м Челове́к бы́в, и свиде́теля ве́рна страсте́й Свои́х явля́ет, Мерку́рия, до́бляго Своего́ страда́льца, Тому́ кре́пко пою́ща: Го́споду пои́м, сла́вно бо просла́вися.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Ве́сь разжига́емь Боже́ственною любо́вию, сла́вне, о́гнь и ю́зы, мечи́ и му́ки, я́коже со́н, вмени́л еси́, Мерку́рие.

Воспева́л еси́ Сотво́ршаго, примеша́яся лю́тым ра́нам, му́чениче му́дре, и исцеле́ния я́зв приима́л еси́, сла́вне.

Жезло́м укрепля́емь боже́ственным, вра́жие свире́пство, я́ко страда́лец, му́чениче доблему́дренне, благомо́щно смири́л еси́.

Богоро́дичен: Я́ко да прообрази́т Твое́ па́че ума́, Чи́стая, рождество́, купина́ яви́ся, огне́м пали́ма, и ника́коже сгара́ющи.

Седа́лен, гла́с 4.

Му́ченик Мерку́рий, подвиза́вся, льсти́ваго посрами́ и вене́чник кре́пок Христо́в бы́сть: те́мже небе́сным ны́не причте́ся лико́м, сла́вы непрее́мныя досто́йно причаща́яся. Сего́ ра́ди свяще́нную его́ па́мять соверша́ем ве́рно.

Сла́ва, и ны́не: Дави́де, предъиди́ в хра́м Бо́жий, и, ра́дуяся, приими́ Цари́цу на́шу, и То́й возопи́й: вни́ди, Госпоже́, в хра́м Царе́в, вни́ди, Ея́же сла́ва покрове́нно разуме́ется, из Нея́же хо́щет источи́тися на́м все́м Све́т, Христо́с.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Присво́ился еси́ Зижди́телю твоему́ боже́ственнаго свиде́тельства, богому́дре, страстьми́ и све́тлыя венцы́ от Него́ прия́л еси́, сла́вне, я́ко непобеди́мый.

Истка́нную от вы́шния благода́ти в ри́зу, му́чениче, ны́не оде́ялся еси́, тли́ и ме́ртвости ри́з, му́чениче, совле́кся.

Да́же до кро́ве, сла́вне, ко греху́ подвиза́вся, победоно́сец показа́лся еси́ и вы́шния сла́вы сподо́бился еси́, Мерку́рие.

Богоро́дичен: На Тя́ спаси́тельное Сло́во сни́де, Присноде́во, я́коже ту́ча, и изсуши́ многобо́жия наводне́ния.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Растяга́емь и острото́ю, Мерку́рие, неосла́бно разсека́емь, терпе́л еси́, Боже́ственными наде́ждами вжиля́емь.

Ка́менем мы́сленным укрепи́в твое́ се́рдце, ка́менем отягча́емь, не преврати́лся еси́, Мерку́рие сла́вне.

Соприча́стник страсте́й Влады́ки твоего́ бы́в, сла́вы приобщи́лся еси́ Того́ и Боже́ственныя све́тлости.

Богоро́дичен: Умертви́, Де́во, живу́щий мо́й гре́х, Жи́знь ро́ждшая, умертви́вшую сме́рть.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Вжиля́ше тя́ присносу́щное Сло́во, за Него́ вся́к ви́д му́к, му́чениче му́дре, терпя́ща тя́ ви́дя, и чрез а́нгела дерза́ти повелева́ше, Мерку́рие, и ника́коже мучи́телей устраши́тися противле́ния.

Умертви́ся многообра́зный зми́й и нога́ми попра́ся кра́сными страда́льца и до́бляго ору́жника, самово́льными бо стремле́нии вше́д к муче́ния ра́нам, сме́рти, сла́вы испо́лнен.

Всесоверше́нно Влады́це прине́сл еси́ серде́чное произволе́ние, му́чениче, и Того́ ра́ди претерпе́в сломле́ния, я́ко победи́тель от Него́ венча́лся еси́, и Тому́ ны́не на небесе́х со все́ми му́ченики предстои́ши, Мерку́рие.

Богоро́дичен: Зачала́ еси́ гла́сом а́нгеловым Вели́каго сове́та А́нгела, Отрокови́це, и от Твои́х пречи́стых крове́й воплоще́нна, Всенепоро́чная, родила́ еси́ показа́вшаго все́м жи́зни вхо́ды за неизглаго́ланную ми́лость.

Конда́к, гла́с 4

Во бране́х непобеди́маго во́ина и в беда́х непосты́дна засту́пника, пе́сньми Мерку́рия ублажи́м, сла́вяще, пра́зднующия бо па́мять его́ ве́село от бе́д избавля́ет и скорбе́й.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Све́том го́рняго просвеще́ния озаря́емь, до́блий во́ине, воспева́ющия тя́ ны́не просвеща́еши, песнопою́щия: благослове́н еси́, Го́споди Бо́же, во ве́ки.

Воспева́л еси́ все́х Благоде́теля, распаля́емь Того́ ре́вностию, блаже́нне, и огне́м чу́вственным жего́мь, и песнопоя́: благослове́н еси́, Го́споди Бо́же, во ве́ки.

Ка́мению принося́щии че́сть, и́же чу́вство окамене́но иму́ще, ка́менем, му́чениче, отягчава́ют вы́ю твою́, вопию́ща, Мерку́рие: благослове́н еси́, Го́споди Бо́же, во ве́ки.

Кровьми́ кро́вь смеси́в твою́ честну́ю Влады́ки Человеколю́бца, о́бщник Того́ яви́лся еси́ страсте́й, вопия́, Мерку́рие: благослове́н еси́, Го́споди Бо́же, во ве́ки.

Богоро́дичен: Чи́ни а́нгельстии ужаса́ются та́инства Твоего́ глубине́, Богоро́дице: Бо́г бо из Тебе́ воплоще́н яви́ся, Ему́же песнопое́м: благослове́н еси́, Го́споди Бо́же, во ве́ки.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Страда́льцев прило́г тя́ ли́к прия́ше, укра́шена и све́тла бы́вша честны́ми красота́ми пречестны́х твои́х страда́ний и благочести́ваго твоего́ и честна́го свиде́тельства, и ны́не вопие́ши непреста́нно: свяще́нницы, благослови́те, лю́дие, превозноси́те Христа́ во ве́ки.

Благочестивому́дренно, сла́вне, по́двиг соверши́л еси́, и доблему́дренно врага́ посрами́л еси́, и, побе́ду небе́сную я́ко победи́тель взе́м, со а́нгельскими ны́не ли́ки весели́шися, с ни́миже, вопие́ши непреста́нно: свяще́нницы, благослови́те, лю́дие, превозноси́те Христа́ во ве́ки.

Сконча́вся, всеблаже́нне, мече́м, Мерку́рие, и получи́в жела́емаго ти́ предлежа́щаго конца́, зе́млю у́бо кро́вными излия́нии напои́л еси́, победоно́сное же и блаже́нное те́ло беле́йше сне́га показа́л еси́, поя́: свяще́нницы, благослови́те, лю́дие, превозноси́те Христа́ во ве́ки.

Богоро́дичен: Я́ко на́шего су́щи воззда́ния, Пречи́стая, вси́ вино́вную, ве́рнии, пое́м Тя́, Бо́га бо всевино́внаго па́че вины́ родила́ еси́, сокруши́вшийся о́браз зло́бою, Свои́м благоутро́бием назда́вшаго, еди́на Преблагослове́нная и Обра́дованная.

Пе́снь 9.

Ирмо́с: Устраши́ся вся́к слу́х неизрече́нна бо́жия снизхожде́ния, я́ко вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Гно́еве му́ченчестии благово́ние ны́не испуща́ют благода́тию и злосмра́дныя на́ша стра́сти неизрече́нным сло́вом отгоня́ют, и источа́ют ко́сти врачева́ний во́ды и напая́ют ду́ши пою́щих те́х чудодея́ния.

Я́ко вели́ка столпа́ Христо́вы Це́ркве свяще́нно тя́ почита́ем, я́ко сте́ну непоколеби́мую, я́ко гра́д вои́стинну, му́чениче, непленя́емый, я́ко во́ина кре́пка Бо́га Всецаря́, я́ко потреби́теля враго́в, я́ко свети́льника, у́мнаго и всеми́рнаго.

Соше́ственника а́нгела све́та к страда́нию, богому́дре, получи́л еси́, те́мже терза́емь, и свеща́ми поджига́емь, и разсека́емь лю́те, и мече́м посека́емь, не устраши́лся еси́, страстоте́рпче Христо́в до́блественнейше.

Де́нь, по́лн просвеще́ния, весе́лия и ра́дости, на́м возсия́ — боже́ственная па́мять твоя́, тебе́ чту́щим, му́чениче Мерку́рие, в не́мже помина́й на́с, па́мять твою́ творя́щих, и лю́тых искуше́ний, и бе́д, и страсте́й ны́ изба́ви.

Богоро́дичен: Просвети́, Две́ре Све́та, осле́пшую ду́шу мою́ страстьми́, и лука́выми по́мыслы омрачи́вшуюся, и бе́дствующую, и изба́ви мя́ искуше́ний, бе́д и скорбе́й, да сла́влю Тя́, наде́жду ве́рных и утвержде́ние.

Yandex Metrika