Пе́снь 1.

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Непобеди́му кре́пость, неизме́нну держа́ву и непретво́рну я́ко име́я, Благи́й, неизрече́нною си́лою Твое́ю утверди́ моего́ язы́ка не́мощь в пе́снех Твои́х и моли́твами Тимофе́я уще́дри.

Кре́постию богоде́льною свяще́ннаго су́щи ко́рене израсти́л еси́ свяще́нный, Тимофе́е, са́д, доброде́телей яви́лся еси́ благоукраше́ние: процве́л бо еси́ страда́ний плоды́ оби́льны и все́х Влады́це прине́сл еси́.

Ума́ чистото́ю и души́ све́тлостию, твои́ми кро́вными омоче́нии испещре́н я́влься, богоно́се Тимофе́е, горе́ ны́не ца́рствуеши со Влады́кою тва́ри и ста́ду твоему́ ве́рою предста́л еси́.

Богоро́дичен: Одушевле́нный Бо́жий и пресве́тлый до́м, Богоро́дице Блага́я, ми́ра Ра́досте, не отри́ни мене́ дале́че от Тебе́, уще́дри же и все́х искуше́ний изба́ви, я́ко да вну́трь лику́ю покро́ва Твоего́.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

С му́ченики Христо́вы му́ченик я́влься све́тел, сла́вне, во свяще́нницех му́дрых яви́лся еси́ свяще́нником удобре́ние.

Хра́м Христо́в, прему́дрости сокро́вище, дне́сь прииди́те, ве́рнии, воспое́м ста́до пру́сскаго первонача́льника.

С по́ты доброде́тельными кро́вь твою́ растворя́я, чи́сто, прему́дре, пи́во Го́сподеви прине́сл еси́, боже́ственно и красно́, о Тимофе́е!

Богоро́дичен: Мари́е, Ма́ти Бо́жия, вы́шшая херуви́м, Чи́стая и всея́ земли́ Влады́чице, спаси́ мя боже́ственными Твои́ми мольба́ми.

Седа́лен, гла́с 5.

Кро́вными ту́чами напоя́емь, священному́чениче Госпо́день, пло́д прине́сл еси́ в земли́ бла́зей се́рдца твоего́, неиждива́емую пи́щу, ю́же прия́л еси́ от Бо́га. Те́мже тя́ мо́лим изба́витися от бе́д творя́щим па́мять твою́.

Богоро́дичен: Тя́ приста́нище, и сте́ну, и прибе́жище, и наде́жду, и покро́в, и заступле́ние те́плое обре́тше, ве́рнии, к Тебе́ притека́ем, и вопие́м приле́жно, и зове́м ве́рно: поми́луй, Богоро́дице, упова́ющих на Тя́ и от прегреше́ний изба́ви.

Крестобогоро́дичен: Кресто́м Сы́на Твоего́, Богоблагода́тная, и́дольская пре́лесть вся́ упраздни́ся и де́монская кре́пость попра́ся. Сего́ ра́ди, ве́рнии, по до́лгу Тя́ при́сно пое́м, и благослови́м, и, Богоро́дицу вои́стинну испове́дающе, Тя́ велича́ем.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Небому́дренно житие́ я́ко стяжа́в и возгреме́нии Ду́ха ве́сь облиста́я, зми́я всепа́губнаго попали́л еси́, сла́вне, благода́тию Боже́ственною укрепля́емь.

Виде́нием и дея́нием украша́емь, в леви́тсте о́бразе, ору́жием обою́ду о́стрым зми́я вну́тренняя ссеца́еши, о Тимофе́е, хле́бов свяще́нных покрыва́лом.

Позна́в Христа́, Вели́каго Архиере́я, не чужде́ю кро́вию, но твое́ю, му́чениче, ко Отцу́ приводи́ма, я́ко собесе́дник Ему́, кро́вь твою́ принося́, поже́рл еси́.

Богоро́дичен: Многоочи́тая, Твоея́ чистоты́ неусы́пно, Богороди́тельнице Чи́стая, побежда́ются зре́ти: си́х бо, я́ко Влады́чица, предваря́еши всегда́ и при́сно предви́диши рабы́ Твоя́.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Я́коже секи́ра тверда́, я́ко си́льно ору́жие, к полко́м беззако́нных бра́нь соста́вль, побе́дою венча́ся.

Свети́ло дневно́е светоно́сно показу́ется, озари́л еси́ цари́цу, ю́же во мра́це зло́бы скончава́ющу лице́, сла́вне.

Зря́ и́дольских скверне́ний смеше́ние, пре́дал еси́ кро́ви излия́телем, я́ко а́гня, себе́, блаже́нне, и же́ртва Бо́гу прине́слся еси́.

Богоро́дичен: Чи́стая Голуби́це, моли́тв Твои́х криле́ на рабы́ Твоя́, и́же в ми́ре, и покро́в просте́рши, Де́во, не пре́зри и мене́.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Возвесели́ся вселе́нная дне́сь, ра́дующися о па́мяти твое́й, блаже́нне: просвеща́еши бо свы́ше чуде́с заря́ми ду́ши пою́щих тя́.

Яви́лся еси́ ны́не не на земли́ су́щей трапе́зе служи́тель, но, в небе́сная входя́, пита́ешися на трапе́зе неизрече́нней, в не́йже пода́ждь и на́м твою́ пи́щу и наслажде́ние.

Зако́нно свяще́нный по́двиг творя́, со дерзнове́нием, богому́дре, царя́ безу́мие изобличи́л еси́ и и́дольская разори́л еси́ тре́бища, Тимофе́е.

Богоро́дичен: Пое́тся гла́сы а́нгельскими, Богоневе́сто, Тво́й Сы́н, все́х Зижди́тель и Бо́г, Сы́й пре́жде ве́к, и с Ни́м у́бо ца́рствующи, спаси́ мя́, Влады́чице.

Пе́снь 7.

Ирмо́с: В пе́щи авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Достодо́лжно в доброде́телех бога́тное тя́ сокро́вище венча́ет пре́жде страда́ний благода́ть богоде́льная и, чуде́сными дарова́нии просвеща́ющи, све́тла в ми́ре соверши́.

Ору́жна преще́ния и огнено́сна пла́мене, му́чениче, зря́, ве́рою вооружи́в у́м тво́й и ду́шу, и безбоя́зненным ра́зумом Христа́ пропове́дал еси́, твоего́ Соде́теля, и Зижди́теля, и Го́спода.

Богоро́дичен: Ты́, держа́щаго дла́нию вся́ческая, Ма́ти Бо́жия, вну́трь во чре́ве иму́щи боголе́пно, соблюда́еши зову́щия: благослове́нна Ты́ в жена́х еси́, Пренепоро́чная.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Си́лою боже́ственныя ве́ры укре́плься, му́дре Тимофе́е, но́в показа́лся еси́ я́коже Дании́л на́м, зми́я низлага́я всегуби́тельнаго, и, на высоте́ предста́в, зове́ши, поя́ при́сно: благослови́те, вся́ дела́ Госпо́дня, Го́спода.

Вну́трь, я́ко ра́б свяще́нный, Го́спода твоего́ ра́дости бы́л еси́: ты́ бо тала́нт, сла́вне, ве́ры боле́зньми твои́ми израсти́л еси́ многосугу́бо, страда́нии и чудесы́, взыва́я: благослови́те, вся́ дела́ Госпо́дня, Го́спода.

Неду́ги отгоня́ челове́ков, пома́зании твои́ми благоуха́еши, прему́дре, ду́ши, си́льным твои́м дарова́нием боле́зней отъе́млеши я́звы и от духо́в лука́вых избавля́еши при́сно вопию́щия: благослови́те, вся́ дела́ Госпо́дня, Го́спода.

Богоро́дичен: Я́ко сла́вен вене́ц, естество́ прия́т боже́ственным рождество́м Твои́м, враго́в на бра́ни у́бо да́руй победи́телю бы́ти ми́, Твои́х дарова́ний све́тлым венце́м венча́тися и взыва́ти: благослови́те, вся́ дела́ Госпо́дня, Го́спода.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Ви́дехом пресла́вная в тебе́, Тимофе́е богоно́се, вои́стинну чудеса́: источа́ет бо моще́й твои́х ра́ка исцеле́ний исто́чники на́м и уставля́ет неду́гов боле́зни. Те́мже, чту́ще тя́, сла́вим.

Ве́сь лику́я вои́стинну, Тимофе́е, со а́нгельскими во́инствы, ра́дуяся с му́ченическими собо́ры и поя́ со свяще́нными чи́ны, моли́ непреста́нно Го́спода спасти́ ве́рою хва́лящия тя́.

Пе́ний и моле́б гла́сы услы́ши, му́чениче Христо́в всече́стне, вонми́ к жела́нию и любви́, и воззри́ во гне́ве Непобеди́мому, и свы́ше покро́в тво́й да́руй все́м, ве́рою хва́лящим тя́.

Богоро́дичен: Возвы́си благода́ть Твою́, Чи́стая, возвели́чи моли́тву и приведи́ чи́ны а́нгельския ко Влады́це, ли́ки апо́стол и проро́к и вся́ пра́ведники с му́ченики, я́ко да спасе́мся, чту́щии Тя́.