Акафистник

Помочь сайту
·
·
·
·

Канон святому священномученику Савве Стратилату

Память: 7 мая (24 апреля)

Глас 2.

Припев: Священному́чениче Са́вво, моли́ Бо́га о на́с.

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Ты́ на́ше, Го́споди, от а́довых вра́т естество́ изба́вль, того́ затвори́л еси́ в темни́цах ве́чных и, сме́рть умертви́в, жи́знь источи́л еси́.

И́же на земли́, сла́вне, во́инство оста́вль, небе́сным чино́м и во́инством труды́ боже́ственными сла́вно приче́лся еси́, Са́вво, сла́вя Христа́.

Си́лою, му́дре, свы́ше оде́ян на враги́, неподви́жимь и непобеди́мь яви́лся еси́, си́х побежда́я до́блественно бра́нь, пресла́вне.

Присносия́нен озари́лся еси́ в преле́стней но́щи свети́льник, Христа́ Со́лнца пропове́дуя все́м пра́ведно и отгоня́ тму́ безбо́жия.

Богоро́дичен: От земли́ преиспо́дния на́с исхи́ти из Тебе́ роди́выйся Сы́н Бо́жий, я́ко милосе́рд, Свои́м воскресе́нием к жи́зни ве́чней, при́сно пою́щия Тя́.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Си́лу Христо́с борца́ и держа́ву низло́ж сме́рти, оживи́ естество́ на́ше Свои́м Воскресе́нием и укрепи́.

Те́плая, прему́дре, Христо́ва любы́, тя́ боже́ственно разже́гши, земны́х и тле́нных все́х отлучи́ и пре́лести супоста́та показа́.

Позна́в Творца́, еди́наго Го́спода, да́вшаго Себе́ избавле́ние челове́ком, твою́ кро́вь да́л еси́ за Него́, Са́вво, бу́дущаго ра́ди воздая́ния.

Богоро́дичен: Преста́ мучи́тельство сме́ртное, Пречи́стая, и а́дова сокро́вища упраздни́шася воста́нием Ро́ждшагося из Тебе́, и жи́зни сокро́вища напо́лнишася.

Седа́лен, гла́с 4.

Неподви́жимь я́влься воево́да, ва́рварския ко́зни победи́л еси́ и, пострада́в, сла́вне, кре́пко, полки́ пребори́л еси́ вра́г неви́димых. Отону́дуже венце́м увя́злся еси́ побе́дным, о на́с моли́ приле́жно, Са́вво преблаже́нне, ве́рою пою́щих тя́.

Богоро́дичен: По Бо́зе во Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу. Моле́ние сотвори́, Чи́стая, к Сы́ну Твоему́ от си́х изба́вити мя́.

Крестобогоро́дичен: И́же от Безнача́льнаго Отца́ рожде́ннаго напосле́док Тя́ пло́тию ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя́, Долготерпели́ве.

Пе́снь 4.

Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Ноже́м отсе́кл еси́ и́стинных глаго́л твои́х лжи́ сплете́ния до́блественне, Са́вво пресла́вне.

Цвету́щая телесе́ красота́ в тебе́ и́стинно яви́, страстоте́рпче, души́ твоея́ боже́ственное благоле́пие.

Расту́щим, сла́вне, душе́вным му́жеством дре́вняго страда́ньми победи́л еси́ борца́.

Богоро́дичен: Я́ко от зве́ря, челове́ка Тво́й Сы́н исхи́тив сме́ртна, к животу́, Де́во, сего́ преста́ви.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Ты́ погребе́нием пло́ти борца́ на́шего погре́бл еси́ и, я́ко Бо́г, истощи́в а́да, воскреси́ ме́ртвыя Свои́м Воскресе́нием, Христе́, Тя́ просла́вльшия.

Укра́шене му́дре тва́рей добро́те, позна́л еси́ все́х Влады́ку, те́мже Его́ ра́ди, Са́вво, пострада́в, венце́в сподо́бился еси́.

Та́йных получи́в дарова́ний Христо́вых, сла́вне, и Того́ незави́стным сия́нием боже́ственно уясни́вся, свети́льник показа́лся еси́ в ми́ре, сла́вне.

Богоро́дичен: Исто́чник жи́зни, из Тебе́ вопло́щся, воскре́с, источи́ земноро́дных естество́, Богоро́дице, и сие́ я́ко Бо́г безсме́ртия напои́ вода́ми.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Погуби́в сме́ртию сме́рть, И́же на́с ра́ди во́лею ме́ртв вмени́лся еси́, Христе́, ме́ртвыя оживи́л еси́ и сея́ у́з изба́вил еси́.

Окропи́вся Христа́ Боже́ственною кро́вию, и́дольских тре́б оскверне́ния отступи́л еси́, Са́вво сла́вне, и све́том оде́явся благода́ти.

Зимы́ пре́лести отбе́гл еси́ и к ти́хой весне́ дости́гл еси́ Христо́вым позна́нием, и́мже и озари́лся еси́, пресла́вне.

Богоро́дичен: Истле́вшия ны́ прегреше́ньми, Сы́н Тво́й, Пречи́стая, Воскресе́нием Свои́м обнови́, и онебеси́, и бо́ги соде́ла благода́тию.

Конда́к, гла́с 4.

Непобеди́мый я́влься стратила́т, ва́рварския ко́зни победи́л еси́ и, страда́льчествовав, сла́вне, тверде́йши, мно́жество враго́в неви́димых побори́л еси́, те́мже вене́ц испле́л еси́ побе́ды. О на́с моли́ Христа́, Са́вво всеблаже́нне, ве́рою почита́ющих тя́.

Пе́снь 7.

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Усну́в Христо́с во́лею я́ко ме́ртв, пло́тию во гро́бе, ме́ртвыя, и́же во а́де спя́щия, от ве́ка возбуди́ и живоно́сным воста́нием си́х воскреси́, пою́щия: благослове́н Бо́г оте́ц на́ших.

Ору́жие, му́дре, боже́ственных слове́с, я́ко но́ж держа́в, в сердца́ си́х вонзи́л еси́ нече́ствующих, и уязви́л еси́ сопроти́вных ло́жная беззако́ния, и взыва́л еси́: благослове́н Бо́г оте́ц на́ших.

Запе́н бы́в от вра́г, не поколеба́л еси́ души́, ни низложе́н бы́л еси́, Христа́ бо име́я, назира́юща и укрепля́юща тя́ непоколеби́ма. Ему́же и взыва́л, Са́вво, и благода́рно воспева́л еси́: благослове́н Бо́г оте́ц на́ших.

Ме́ртва врага́ подложи́ под но́ги твои́, страда́льче, я́коже коры́сть сего́ взя́л еси́ прельще́нныя и да́л еси́ си́х Влады́це все́х, позна́нием зову́щия: благослове́н Бо́г оте́ц на́ших.

Богоро́дичен: В кре́пость держа́вную оде́явся, челове́ческое немощно́е естество́, Де́во Пресла́вная, в воста́нии Рождества́ Твоего́, и, вооруже́но му́жески на сме́рть, сла́вит Тя́, безсме́ртия и жи́зни Ма́терь Чи́стую.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Сме́рти обрета́теля, сме́ртию твое́ю плотско́ю уби́в, Ще́дре, сего́ все́м показа́л еси́ челове́ком ве́чную сме́рть: Тя́ превозно́сим, Животе́ и Нетле́ние.

Тиме́ния всего́ очи́щся безбо́жнаго и служе́ния и́дольскаго ба́нею, страстоте́рпче, креще́ния, Зижди́телю чи́сте приступи́л еси́, Са́вво, в по́двизех терпя́ до́блественне.

Медото́чным сло́вом, му́дре, и взо́ром сла́дким удивля́я мучи́теля, де́лы победи́тельныя на ни́х поста́вил еси́ и взыва́л: Тя́ превозно́сим, Го́спода, во ве́ки.

Богоро́дичен: Живота́ моего́ Нача́льник, к сме́рти пло́тию приступи́в, умертви́ сию́. Оживи́, Де́во, любо́вию пою́щия Тя́ и превознося́щия Того́ во ве́ки.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Ты́, утро́бу а́дову расто́рг, Ще́дре, истощи́л еси́ того́, я́ко си́лен, и небе́сный оскуде́вший напо́лнил еси́ ми́р, воздви́г и оживи́в ме́ртвыя, и челове́ки вся́ возне́сл еси́ разуме́нием Твои́м.

Восте́к на высоту́ у́мно, страстоте́рпче, боже́ственнаго позна́ния Христо́ва, пре́лесть, до́лу влеку́щую, оста́вил еси́ и крилы́ страда́ния к Сему́ возне́слся еси́, приле́жно велича́я и сла́вя Его́ я́ко Пребла́га.

Стре́лы младе́нец вменя́я стреля́ния мучи́телей, си́лою отража́я те́х Христо́вою, Са́вво пресла́вне, спобо́рника име́л еси́ Того́ и помога́юща ти́ при́сно, Его́же ве́рою и любо́вию непреста́нно велича́л еси́.

Богоро́дичен: Облиста́, Де́во, Сы́н и Бо́г Тво́й, от гро́ба воста́в, Боже́ственныя зари́ и сла́вы испо́лни вселе́нную и сия́нием нетле́ния и́же ве́рою све́тел Тя́ о́блак сла́вящия просвети́л е́сть.

Yandex Metrika