Акафистник

Помочь сайту
·
·
·
·

Канон святому пророку Малахии

Память: 16 (3) января

Глас 8.

Припев: Святы́й проро́че Бо́жий Малахи́е, моли́ Бо́га о на́с.

Пе́снь 1.

Ирмо́с: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися.

Го́рнему ли́ку сра́дуяся, и сему́ сликовству́я и свеселя́ся, и Боже́ственнаго просвеще́ния досто́йно насыща́яся, богодохнове́нне, ве́рою твою́ честну́ю па́мять пра́зднующия, Го́споду пою́щия, моли́твою твое́ю сохрани́.

Ангелообра́зныя души́ красото́ю и добро́тою сия́я, па́ки теле́сною, вы́шнюю зарю́ Боже́ственнаго сия́ния прия́л еси́, богоглаго́ливе, све́тло и, ра́дуяся, взыва́л еси́: Го́споду пои́м, сла́вно бо просла́вися.

Непоро́чно соверша́я житие́ твое́, и о́бразом благоукраше́ния украша́яся, и нра́вы благи́ми, преблаже́нне, чи́стя себе́, проро́к благоче́стия и́стиннаго, зовы́й, бы́л еси́: Го́споду пои́м, сла́вно бо просла́вися.

Богоро́дичен: Чи́стая Ма́ти Бо́га Вседержи́теля, Я́же от ца́рскаго коле́на, Влады́чице, возра́стши и Еди́наго Бо́га, все́ми ца́рствующаго, ро́ждши пло́тию па́че естества́, от бе́д мя́ спаси́, Сы́ну Твоему́ пою́ща: сла́вно бо просла́вися.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Ра́дуешися ны́не, зря́ прорече́ний сбытие́, блаже́нне, твои́х и соверше́ние, Малахи́е богоприя́тне.

Исцеле́ние в крила́х име́яй, возсия́ Со́лнце мы́сленное пра́вды, я́коже проре́кл еси́, богодохнове́нне.

Богоро́дичен: Всю́ наде́жду мою́ на Тя́, Всенепоро́чная, возлага́ю, всю́ к Тебе́, ра́дуяся, простира́ю и ду́шу, и помышле́ние.

Седа́лен, гла́с 8.

Проро́чествия благода́тию обога́щся, бу́дущих зна́нию боголе́пно научи́лся еси́ ду́хом, Малахи́е богодохнове́нне, и предглаго́леши все́м Христо́во прише́ствие, и язы́ков, пребога́те, Боже́ственное призва́ние. Те́мже честну́ю твою́ пра́зднуем па́мять, и любо́вию пое́м тя́, и ве́рно ублажа́ем, взыва́юще тебе́, сла́вне: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не: Ли́к проро́ческий, пропове́дуя, ра́дуется, креще́ние Христо́во, живо́т источа́ющее. Зове́т Иса́ия: почерпи́те во́ду чисти́тельную. Пи́шет богооте́ц: ка́ко от лица́ бежи́т мо́ре благоволе́нием спаса́ющаго Бо́га ро́д челове́ческий?

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Проро́к бы́в богонача́льныя, блаже́нне, бла́гости, все́м язы́ком пропове́дал еси́ бы́вшее избавле́ние.

Научи́вся Ду́хом преесте́ственному Сло́ва воплоще́нию, неизглаго́ланное та́инство, Малахи́е блаже́нне, провозгласи́л еси́.

Богоро́дичен: На Тя́ возложи́х вся́ко ча́яние спасе́ния моего́ и жития́ окормле́ние, обра́дованная Ма́ти Де́во.

Пе́снь 5.

Ирмо́с: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Стра́шный де́нь Христо́ва прише́ствия провозвести́л еси́, Малахи́е богому́дре, Боже́ственным просвеща́емь Ду́хом.

Ду́ш скве́рну отъе́мля и омыва́я благода́тию, я́коже бели́лом перу́щих, си́це тя́, богому́дре, просла́ви.

Богоро́дичен: Держа́ву сме́рти, Отрокови́це, живоно́сным Твои́м рождество́м разори́ла еси́, Всесвята́я Де́во, и Жи́знь источи́ла еси́ неразори́му.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Просве́щшися твоя́ му́драя мы́сль от самаго́ Боже́ственнаго светозаре́ния, и до́льных отлучи́лся еси́ веще́й, бу́дущих сподо́бися ра́зума: зва́ние бо язы́ков и зако́на преста́тие проре́кл еси́.

Прии́де вои́стинну Госпо́дь, Его́же мы́ ра́достно иска́хом, во хра́м, Его́же Са́м от Де́вы благослове́нныя му́дре созда́, я́коже рече́, от Бо́га осия́вся, Малахи́й сла́вный.

Богоро́дичен: Безнача́льный Отцу́ и Единоро́дный, То́йже Единоча́дый от Де́вы вопло́щся, и неизрече́нно роди́ся, и Ро́ждшую Де́ву сохрани́: Бо́г бо бе́ и́стинен, а́ще и естество́ челове́ческое прия́т.

Конда́к, гла́с 4.

Проро́чества дарова́нием богате́я, проро́че, Христо́во предвозвести́л еси́ прише́ствие я́ве и ми́рови спасе́ние, Его́же сия́нием ми́р просвети́ся.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Ты Влады́чествующаго все́ми всечестно́е проре́кл еси́ прише́ствие, Малахи́е проро́че сла́вне, зовы́й: благослове́н еси́, Го́споди Бо́же, во ве́ки.

Приими́ моля́щагося, Ще́дре, сла́внаго проро́ка Малахи́ю, о и́же благоче́стно пою́щих и вопию́щих: благослове́н еси́, Го́споди Бо́же, во ве́ки.

Богоро́дичен: Всему́ мне́ ве́сь неслия́нно по Ипоста́си соедини́лся еси́, Бо́жий Сло́ве, от Де́вы Чи́стыя обо́лкся в мя́, Ще́дре, благослове́н еси́, Го́споди Бо́же, во ве́ки.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Отчужди́вся вся́каго ве́щнаго явле́ния, священноявле́нне, Боже́ственныя зари́ яви́лся еси́ нескве́рно зерца́ло, поя́: благослови́те, вся́ дела́, Го́спода и превозноси́те Его́ во ве́ки.

Неизрече́нныя сла́вы зри́тель ты́ бы́л еси́ и та́ин небе́сных, блаже́нне, пропове́дник бы́в, поя́ непреста́нно: благослови́те, вся́ дела́, Го́спода и превозноси́те Его́ во ве́ки.

Богоро́дичен: Жи́зни Тя́ Ма́терь и Бо́жию Роди́тельницу позна́вше, правосла́вною ве́рою вси́ блажи́м, Де́во Ма́ти, благословя́ще вку́пе Рождество́ Твое́ Пречи́стое и превознося́ще, Чи́стая, во вся́ ве́ки.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Наста́ богосия́нный проро́ка пра́здник и честны́й, озаря́я приходя́щия ве́рою и пою́щия проро́ческими блиста́нии, и все́м точа́щий душа́м исцеле́ния, и просвеща́ющий я́сно богому́дрыя.

Соблюди́ живонача́льною десни́цею Твое́ю держа́вною, Многоми́лостиве, Це́рковь Твою́, мольба́ми Твоего́ уго́дника, проре́кшаго на́м Твое́ вочелове́чение, и́мже возсия́ спасе́ние и душа́м избавле́ние.

Богоро́дичен: Зре́лу объе́млю жи́знь, неврежде́н дре́вом ра́зума: Ты́ бо, Всенепоро́чная, Жи́зни дре́во — Христа́, прозябла́ еси́, вхо́ды живота́ все́м показа́вшаго. Те́м Тя́, Всечи́стая, Богоро́дицу, ве́рнии, возвеща́ем.

Yandex Metrika