Акафистник

Помочь сайту
·
·
·
·

Канон святому преподобномученику Феодору Начертанному, Константинопольскому

Память: 9 января (27 декабря)

Глас 4.

Припев: Преподобному́чениче о́тче Фео́доре, моли́ Бо́га о на́с.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову си́лу в пусты́ни победи́л е́сть.

Ти́тлу твоего́ честна́го лица́ ви́девше, Херуви́ми отступа́ют от дре́ва жи́зни; пла́менное же ору́жие всеблагогове́йно плещи́ тебе́ дае́т, всему́дре Фео́доре.

Ти́тла над главо́ю лежа́ше Царя́ Христа́, напи́сана на Дре́ве Кре́стнем; твоя́ же ти́тла, всему́дре, на лице́ твое́м начерта́ся, напи́сана благоле́пне.

Возвы́сися у́бо на Кре́ст Госпо́дь и прободе́н бы́сть в ре́бра; ты́ же, протяже́н на скамии́, терпели́вно боде́ния претерпе́л еси́, я́коже ове́н наро́чит, священнотаи́нниче, назна́менаемь.

Му́дростию вся́кою украша́емь, о́тче Фео́доре, предста́теля обличи́л еси́ я́ве злы́я е́реси, терпе́нием же де́л, сего́ мудрова́ния ужаси́л еси́.

Богоро́дичен: Му́дрости прему́дростныя была́ еси́ прия́телище, Пречи́стая Богороди́тельнице, Еди́на ве́рных спасе́ние и пе́ние: Ты́ бо на́м родила́ еси́ дне́сь Боже́ственное избавле́ние.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Не име́я что́ твои́м уче́нием противорещи́, преподо́бне, на ра́ны обраща́ется, е́ллинскаго неи́стовства испо́лненный.

Подъя́л еси́ терпели́вно е́же на ра́мех и на пе́рсех ра́ны Христа́ ра́ди, Богодохнове́нне, и по главе́ ударе́ния.

Му́дростию духо́вною и усе́рдием по́мысла посрами́л еси́ злочести́ваго и беззако́ннаго свяще́ннейшими твои́ми догма́ты.

Богоро́дичен: Дави́д, я́коже ковче́г, в Вифлее́ме проро́ческими очесы́, Ма́ти Бо́жия, ви́дит Тя́, Младе́нца Пребоже́ственнаго нося́щу.

Седа́лен, гла́с 3.

Уста́ бы́л еси́ де́рзости, горды́ню мучи́телеву велему́дренно посрами́в терпе́нием страда́ний твои́х, уязвля́емь бо бы́в в лице́, Фео́доре, за Христо́ву ико́ну всечестну́ю, извести́л же еси́ чти́ти и сла́вити вся́, прося́ на́м ве́лию ми́лость.

Богоро́дичен: Рождество́ безсе́менное смотря́ющи, Всенепоро́чная, дивя́щися, из Нея́ Рожде́нному веща́ше: а́ще и зра́ком челове́ческим обложи́лся еси́, но Бо́га Тя́ пропове́дуют ве́щи, Ча́до Безнача́льное Безнача́льнаго Отца́, Собезнача́льне, все́м подая́й ве́лию ми́лость.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Просте́рт на дсце́, начерта́н бы́сть, я́ко покланя́ющся, Фео́доре, Христо́ве ико́не и Богома́тере, на́глостию свире́пства и ва́рварским суровство́м.

Служи́в от ю́ности Влады́це и к Нему́ непреста́нно жела́ние име́я, блаже́нне, воздержа́нием, му́ченическою кро́вию а́бие украси́лся еси́ светле́йше.

Све́тел, я́ко со́лнце, Богоно́се, от восто́ка устреми́лся еси́, зари́ испуща́я испове́дания твоего́ и велему́дреннаго и до́блественнейшаго противле́ния.

Богоро́дичен: Благослове́н гряды́й Бо́г Сло́во в Вифлее́м, я́ко Благоутро́бен, от неискусобра́чнаго, Пречи́стая, чре́ва Твоего́. Его́же ны́не моли́ спасти́ к Тебе́ прибега́ющия.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

На земли́ стра́нней обита́яй, стра́нничество, озлобле́ние, ра́ны, заточе́ния и темни́цы люте́йшия подъя́л еси́ терпели́вно.

Ны́не ра́дуешися вои́стинну, победоно́сное венча́ние прие́м в де́нь све́тлый и светоно́сный Боже́ственнаго первому́ченика.

Е́же име́л еси́ от де́вства благоче́стия обеща́ние, соблю́л еси́ да́же до конца́, не превраще́н пребы́в, непобеди́ме Фео́доре.

Богоро́дичен: Тя́ ору́жие непобеди́мое на враги́ предлага́ем, Тя́ по́мощь и наде́жду на́шего спасе́ния, Богоневе́сто, стяжа́хом.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

По́том подвиго́в еще́ ка́пая, Подвигополо́жнику предста́л еси́, пра́ведным судо́м всю́ тва́рь пра́вящему, Богоно́се всеблаже́нне Фео́доре.

Ничто́же тя́ Христо́вы любве́ отлучи́, ни уране́ние те́ла, ни сме́ртнаго осужде́ния преще́ние, ни тщета́ прису́щих, всеблаже́нне Фео́доре.

Сы́н сы́й и све́та и дне́ пресве́тлый, по́лн све́та, преста́вился еси́, к Боже́ственному сия́нию возраста́емь, дне́м и но́щию неоскудева́емь, Богоприя́тне.

Богоро́дичен: Тя́ еди́ну посреди́ те́рния обре́т, я́ко честне́йший кри́н и удо́льный цве́т, о Богома́ти, Жени́х мы́сленный в Тя́ всели́ся.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Распаля́емь правосла́вною ре́вностию, всему́дре, снеде́ние скве́рныя е́реси и лю́тыя де́рзостне отри́нул еси́, благослове́н еси́, Бо́же мо́й,— зовя́,— и Го́споди.

Сло́во му́дрости, сло́во догма́тов, сло́во зна́ния, сло́во уче́ний, о́тче, всеблагочести́вых Бо́г Сло́во тебе́ дарова́, благослове́н еси́, Бо́же мо́й,— зову́щу,— и Го́споди.

Возсия́в от восто́ка, я́коже со́лнце, зарю́ благоче́стия се́ял еси́ на земли́, ико́ны поклоне́ние Христо́вы, просвеща́ющую и уча́щую, о́тче Фео́доре.

Богоро́дичен: Укра́шена, препросла́влена, пресия́ющая све́том де́вства яви́лася еси́, Ма́ти, Бо́га те́лом ро́ждшая и пелена́ми пови́вшая, вся́ я́ве повива́ющаго.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Я́ко ле́в, всеблаже́нне, упова́в души́ тве́рдостию, не устраши́лся еси́ ерети́ческаго стремле́ния, неи́стовства тезоимени́таго, его́же оплева́в, лю́дем, ра́дуяся, вопия́л еси́: благослови́те, вся́ дела́ Госпо́дня, Го́спода.

Украси́в му́жеством ду́шу, целому́дрием же, блаже́нне, жела́ние, у́м, ра́зума испо́лнен, стяжа́в, соверши́л еси́, пра́вдою же твоя́ смы́слы упра́вил еси́ и вопие́ши: благослови́те, вся́ дела́ Госпо́дня, Го́спода.

Стремли́во теку́щий то́к е́реси, о́тче, изсуши́л еси́, твои́ми наказа́нии, преподо́бне, и всему́дрыми указа́ньми хи́трости злочести́вых разоря́я и зовя́: благослови́те, вся́ дела́ Госпо́дня, Го́спода.

Богоро́дичен: Созда́вый естество́ в нача́тцех челове́ческое, Бо́г в сие́ облачи́тся от пречи́стаго Твоего́, Всечи́стая, и свята́го чре́ва, дне́сь в Вифлее́ме проро́чески ражда́яся; те́м Тя́ вси́ благослови́м, Мари́е Богоневе́сто.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Боже́ственным побежда́емь жела́нием, гоне́ний ополче́ния удо́бо претерпе́л еси́, Богому́дре, и, гони́теля свире́пство низложи́в, восприя́л еси́ подвиго́в, о́тче, вене́ц.

Бога́тство Небе́сное обре́л еси́ и пребыва́ющую хра́мину вме́сто го́рькаго заточе́ния, и стра́нничества, и прехожде́ния, и ны́не пита́ешися, прие́мля ве́чное наслажде́ние.

Пе́ние Влады́це принося́, о́тче, и мольбы́, не преста́й о мое́й не́мощи, и сообита́нии, и бра́тстве, я́ко да, вку́пе пожи́вше, улучи́м вку́пе обоже́ние.

Богоро́дичен: Тя́, па́че ума́ же и сло́ва в Вифлее́ме Бо́га Сло́ва дне́сь ро́ждшую, Де́во, и в пелена́х Сего́ пови́вшую, я́ко вои́стинну Богоотрокови́цу и Богоро́дицу велича́ем.

Yandex Metrika