Акафистник

Помочь сайту
·
·
·
·

Канон святому преподобному Титу

Память: 15 (2) апреля

Глас 8.

Припев: Преподо́бне о́тче Ти́те, моли́ Бо́га о на́с.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Всего́ мя́, страстьми́ плотски́ми лю́те угле́бша и истле́вша сластьми́, сокро́вище сы́й безстра́стия, Ти́те, моли́твами твои́ми спаси́.

Боже́ственное Ду́ха избра́ние, Бо́гу прине́слся еси́ от пеле́н ма́терних и Неискусому́жныя Богоро́дицы таи́нник и служи́тель бы́л еси́.

Я́ко воздержа́ния сла́дость сса́в, отри́нул еси́ го́ресть страсте́й, отону́дуже па́че ме́да и со́та, о́тче, наслажда́еши ду́ши на́ша.

Но́ваго я́ко Па́влова тя́ ученика́, Ти́те, восхваля́ем: о́наго бо ревни́тель подвиго́в показа́лся еси́, богоблаже́нне, и с ни́м венцы́ восприя́л еси́.

Богоро́дичен: Сло́во Безма́терне из Отца́, безо́тчее сие́ в после́дняя богому́жно родила́ еси́, еди́на Богома́ти, я́ко превы́шши всея́ тва́ри.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Ми́ро освяще́ния от по́стнических, преподо́бне, арома́т, весьма́ сложи́лся еси́ в воню́ благоуха́ния Бо́гу.

Ору́жие — воздержа́ние и щи́т — моли́тву, преподо́бне, име́я при́сно, нача́ла тмы́, обличи́в, посрами́л еси́.

В зако́нех поще́ния поуча́яся, стра́сти погрузи́л еси́, я́коже други́я фараони́ты, пото́ком сле́з твои́х.

Богоро́дичен: Ми́лостива бы́ти мне́ молю́ при́сно, Влады́чице, Твои́ми моли́твами из Тебе́ Рожде́ннаго, в де́нь Су́дный.

Седа́лен, гла́с 1.

Пости́вся на земли́, я́ко безпло́тен, Ти́те, умори́л еси́ врага́ и низложи́л еси́ вку́пе собо́р ересе́й правосла́вными твои́ми уче́нии. Те́мже, дне́сь всесвяту́ю твою́ па́мять пра́зднующе, ра́достно воспева́ем тебе́ Возвели́чившаго.

Богоро́дичен: Упова́ние христиа́н, Пресвята́я Де́во, Его́же родила́ еси́, Бо́га, па́че ума́ же и сло́ва, непреста́нно моли́ с вы́шними си́лами пода́ти оставле́ние грехо́в на́ших все́х и исправле́ние жития́ ве́рою и любо́вию при́сно Тя́ сла́вящим.

Крестобогоро́дичен: Нескве́рная А́гница, А́гнца и Па́стыря, пове́шена на дре́ве, ме́ртва зря́щи, пла́чущи, веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й?

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Гное́ние, блаже́нне, грехо́вное все́ оплева́л еси́ и стрело́ю воздержа́ния де́монския полки́ уязви́л еси́.

Чистоты́ жела́нием ду́шу уязви́в, те́пле после́довал еси́ Христу́ и вше́л еси́ в черто́г сла́вы, всеблаже́нне.

Я́ко цветни́к благоуха́ннейший и доброде́телей ра́й одушевле́н, воздержа́нием процве́л еси́, и́мже вся́ пита́еши, честву́ющия тя́.

Законополо́жника воздержа́ния и неле́стный о́браз кро́тости, я́ко Моисе́я тя́ и Дави́да, вои́стинну стяжа́вше вси́, о́тче, ублажа́ем.

Богоро́дичен: Херуви́м превы́шшу Тя́ и серафи́м, пое́м, Всенепоро́чная, Его́же бо трепе́щут вся́ческая, пло́тию Влады́ку носи́ла еси́ на объя́тиих Твои́х.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Угаси́в вся́ стра́сти росо́ю подвиго́в твои́х, Ти́те блаже́нне, бога́тно вже́г огне́м любве́ и ве́ры воздержа́ния свети́льник, и просвеще́ние безстра́стия, и дне́ сы́н бы́л еси́.

Ве́ры гро́зд боже́ственным возде́ланием, о́тче, воспита́л еси́, и в точи́ла вложи́л еси́, и изгне́л еси́ боле́зньми воздержа́ния и, ча́шу испо́лнив духо́вную поще́ния, весели́ши сердца́ ста́да твоего́.

Претерпе́в до́блественне прило́ги и ра́ны неви́димых вра́г, показа́лся еси́ сто́лп терпе́ния, утвержда́я ста́до твое́ па́лицею боже́ственною на па́житех воздержа́ния и на воде́ воспита́я, блаже́нне.

Богоро́дичен: Я́ко приста́нище Тя́ вси́, сте́ну, и утвержде́ние, и предста́тельницу на́м, и к Ца́рствию непосты́дный вхо́д иму́ще, наде́жди на́шея не отпа́сти, мо́лимся, ма́терними Твои́ми мольба́ми, Всенепоро́чная.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Разруши́в страсте́й мглу́ и мра́чную тму́, де́нь восто́ка и све́т во стезя́х твои́х возсия́л еси́, преподо́бне, от мно́гих по́двиг и бе́д, су́щих по ве́ре.

Весьма́ изступи́л еси́ к Бо́гу жела́нием воздержа́ния, ми́р оста́вив, и миродержа́теля восхи́тил еси́, богоприя́тне, преми́рнаго Ца́рства наслажде́ние.

Собра́л еси́ в души́ боже́ственное бога́тство Ду́ха: непоро́чную моли́тву, чистоты́ целому́дрие, бде́ние спротяже́нное, воздержа́ния боле́зни, и́миже до́м позна́лся еси́ Бо́га.

Ве́щи до́льния, му́дре, прете́кл еси́ ху́дость, невеще́ственною же моли́твою у́м впери́л еси́ и вы́шняго прия́тия насле́дник яви́лся еси́ жития́ соверше́нством.

Богоро́дичен: Зачала́ еси́ вои́стинну Боже́ственное Сло́во во утро́бе Твое́й и Сие́ преесте́ственно, Всенепоро́чная, родила́ еси́, Его́же моли́твами уми́лостиви от бе́д вся́ изба́вити рабы́ Твоя́.

Конда́к, гла́с 4.

Жития́ молву́ оста́вил еси́ и ти́хо, все́ житие́ твое́ пожи́в, му́дре, к Бо́гу преше́л еси́, чудоно́сне о́тче на́ш, Ти́те преподо́бне.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Не оскверни́вся грехми́, река́ воздержа́ния, о́тче, показа́лся еси́ на́м, стра́сти потопля́я и скве́рну очища́я вопию́щих ве́рно: оте́ц на́ших Бо́же, благослове́н еси́.

Ны́не с невеще́ственными ли́ки бесе́дуя, богоблаже́нне, и све́тлости вы́шняго гоще́ния непреста́нно наслажда́яся, уще́дри пою́щия: оте́ц на́ших Бо́же, благослове́н еси́.

Во испове́дании ве́ры, о́тче, пре́был еси́ невра́щен, Христа́ бо вообража́я пло́тию и напису́я, покланя́ешися и зове́ши: оте́ц на́ших Бо́же, благослове́н еси́.

Иису́са Влады́ки на телеси́, о́тче, нося́ я́звы, и мене́, уя́звеннаго стрело́ю велиа́ра, уврачу́й, зову́ща: оте́ц на́ших Бо́же, благослове́н еси́.

Богоро́дичен: Па́че естества́ и сло́ва Влады́ку все́х чревоноси́ла еси́ и пита́еши от сосе́ц Твои́х, все́м благовре́менную уготовля́юща трапе́зу, Его́же приле́жно, Чи́стая, о на́с моли́.

Пе́снь 8.

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

Сто́лп тя́ вдохнове́н я́ко вои́стинну, и о́браз воздержа́ния, о́тче, стяжа́вше, вси́ твою́ па́мять честву́ем по до́лгу.

Ли́к ра́дуется мона́шествующих, и лику́ет преподо́бных собо́р и пра́ведных: вене́ц бо досто́йно с си́ми прия́л еси́.

Укра́шен доброде́тельми, в черто́зе неизрече́нныя сла́вы восклони́лся еси́, пе́снь воспева́я Христу́ во ве́ки вся́.

Оде́ждею свяще́нною оде́явся и соверша́я же́ртвы безкро́вныя, же́ртва прине́слся еси́ Бо́гу во ве́ки.

Богоро́дичен: Во утро́бе Твое́й су́щаго пре́жде Тебе́ заче́нши, Богома́ти Чи́стая Де́во, родила́ еси́ несказа́нно Бо́га и Царя́.

Пе́снь 9.

Ирмо́с: Чи́стую сла́вно почти́м, лю́дие, Богоро́дицу, о́гнь Божества́ прии́мшую во чре́ве неопа́льно, пе́сньми велича́ем.

Вра́чь неду́гующих во страсте́х от Бо́га показа́лся еси́, потреби́тель же, блаже́нне, и отгони́тель лука́вых де́монов, те́мже тя́ блажи́м.

Зе́млю я́ко тле́ния жили́ще оста́вил еси́, о́тче, и в зе́млю всели́лся еси́ кро́тких, и с ни́ми ра́дуешися, боже́ственныя наслажда́яся сла́дости.

Уста́в непоро́чен ве́ры и воздержа́ния о́браз иму́ще по́двиги твоя́, непреста́нно Зижди́теля в пе́снех велича́ем.

Дне́сь де́нь пра́здничный, созыва́ет бо Ти́т мона́шествующих стада́ на ликова́ние духо́вное и чрежде́ние и пи́щу нетле́нныя жи́зни.

Богоро́дичен: В Тя́ всели́выйся, Всенепоро́чная, роди́ся, И́же пе́рвее родонача́льным злонра́вно запе́нша, человекоуби́йцу низложи́в, и вся́ ны́ спасе́.

Yandex Metrika