Акафистник

Помочь сайту
·
·
·
·

Канон святому преподобному Иоанну Ветхопещернику

Память: 2 мая (19 апреля)

Глас 4.

Припев: Преподо́бне о́тче Иоа́нне, моли́ Бо́га о на́с.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Наде́ждею, я́же к Бо́гу, укрепля́емь от ю́ности, благо́му прите́кл еси́ Бо́гу, Иоа́нне блаже́нне, мона́шескими поще́нии лу́чшими составля́яся.

Бога́тыя и светоно́сныя благода́ти испо́лнен и в честны́х ме́стех живы́й, че́стно положи́л еси́ к доброде́телем веды́й восхожде́ния, преблаже́нне.

Кре́постию наста́влен бы́в Ду́ха, в Харито́нову богоно́снаго огра́ду прите́к, в то́й пре́был еси́, священноде́йственник бы́в просвеще́н, чисти́телю.

Отчужди́в от земны́х, преподо́бне, твою́ мы́сль, небе́сным сию́ благи́м, Иоа́нне, пригвозди́л еси́ и е́же отту́ду улучи́л еси́ светле́йшее сия́ние.

Богоро́дичен: Из Тебе́, обра́дованная Всечи́стая, на́м яви́ся Пра́вды Со́лнце — Христо́с и све́том просвети́ седя́щия пе́рвее в те́мных тве́рдех.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Умертви́в плотско́е воздержа́нием изве́стным мудрова́ние, Животворя́щему Ду́ху, о́тче Иоа́нне, прибли́жился еси́.

Боже́ственное и светоза́рное в се́рдце твое́м я́ве сия́ние све́тло всели́ся, о́тче Иоа́нне блаже́нне.

Богоро́дичен: Ты́ еди́на су́щим на земли́ па́че естества́ благи́м Хода́таица, Ма́ти Бо́жия, была́ еси́: те́мже Тебе́ — ра́дуйся! — зове́м.

Седа́лен, гла́с 8.

Боже́ственным жела́нием, блаже́нне, ду́шу уязви́в, устрани́лся еси́, бога́тство оста́вль, пи́щу, и све́тлость, и жития́ нестоя́тельное, и во страна́х чужди́х всече́стно пожи́л еси́; воздержа́ния боле́зньми увяди́л еси́ те́ло твое́ и, безмо́лвием пожи́в му́жески, дости́гл еси́, преподо́бне, доброде́телей соверше́ние. Те́мже ве́рою вопие́м ти́: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не, богоро́дичен: Я́ко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии, о́гнь бо всели́ся в Тя́ Божества́, и я́ко младе́нца млеко́м пита́еши Зижди́теля и Го́спода. Те́м, а́нгельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Крестобогоро́дичен: А́гнца, и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмо́с: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы, Ты́ бо еси́, Человеколю́бче, кре́пость моя́ и хвале́ние.

В Богоза́рных страна́х воспита́н и светоза́рным проли́тием, о́тче, просвеща́емь, доброде́тельми и воздержа́ньми, богому́дре, пожи́л еси́.

Отчужди́вся оте́чества и твои́х, ко Христу́ приступи́л еси́ во́льным хоте́нием, кре́ст взе́м, богому́дре блаже́нне.

Ме́ртв все́м ви́димым жи́зненною Вино́ю, воздержа́нием пожи́л еси́, Иоа́нне прему́дре, к Нему́же и отше́л еси́.

Богоро́дичен: И́же во Твою́ утро́бу, Де́во, богоприя́тную, па́че естества́ всели́ся, Се́й и по рождестве́ Боже́ственною си́лою Тя́ Де́ву соблюде́.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

У́м, о́тче, чи́ст безмо́лвием стяжа́в, Ду́ха Свята́го си́лою вра́жиих се́тей отбе́гл еси́.

Благода́тию Бо́жиею, и прему́дростию, и уче́нии пожи́л еси́, богоявле́нне, свяще́нник бы́в, преблаже́нне святи́телю.

Богоро́дичен: Вси́ ро́ди благоче́стно блажа́т Тя́, Пречи́стая, ро́ждшую па́че естества́ и сло́ва вои́стинну Блаже́ннаго.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Прему́дрости рачи́тель бы́в боже́ственныя, богодухнове́нне, благода́тей венце́м от нея́ венча́лся еси́, все́ми о́бразы светоно́сному учени́к бы́в Харито́ну.

Поста́вил еси́ на Христо́ве ка́мени но́зе твои́, де́тельми восходя́ доброде́телей, богому́дре, богоразу́мно восхожде́ния в се́рдцы твое́м, о́тче, полага́я.

Богоро́дичен: Кля́твы пе́рвыя ма́тере, Е́вы, рождество́м Твои́м свободи́хомся: Ты́ бо, Христа́ ро́ждши, Де́во Ма́ти, вме́сто сея́ благослове́ние все́м источи́ла еси́.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Си́лою Боже́ственною, я́ко оде́ждею, обложе́н, вся́кия напа́сти ерети́ческия отбе́гнути возмо́гл еси́, преблаже́нне, благослове́н еси́, — вопия́, — в хра́ме сла́вы Твоея́, Го́споди.

Стра́нствовавый на́с ра́ди на земли́ Госпо́дь, Се́й во стра́нничестве, блаже́нне, тя́ я́ве сохрани́, зову́ща: благослове́н еси́ в хра́ме сла́вы Твоея́, Го́споди.

Богоро́дичен: Вы́шняго освяще́нное Боже́ственное селе́ние, ра́дуйся! Тобо́ю бо даде́ся ра́дость, Богоро́дице, зову́щим: благослове́на Ты́ в жена́х еси́, Всенепоро́чная, Влады́чице.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Красе́н те́лом и душе́ю и благоче́стием твои́м, преподо́бне, и боже́ственнаго ра́зума орга́н, и за́поведем бли́жнейший, и пе́ния чи́стаго цевни́ца бы́л еси́, воспева́я: благослови́те, вся́ дела́ Госпо́дня, Го́спода.

К безсме́ртней у́бо жи́зни, и неконча́емому блаже́нству преше́л еси́, преподо́бне, и нетле́нное сподо́бился еси́ ра́дование улучи́ти, поя́, блаже́нне: благослови́те, вся́ дела́ Госпо́дня, Го́спода.

Богоро́дичен: Оттряса́ем пра́х ме́ртвенный, нетле́нни бы́вше Боже́ственным рождество́м Твои́м, Пречи́стая: есте́ственную бо и́стинную Жи́знь и присносу́щную, Чи́стая Влады́чице, родила́ еси́. Те́мже вси́ Тя́ благослови́м, Мари́е Богоневе́стная.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Кончи́ну всеблаже́нную обре́л еси́ воздержа́ния по́двигом, о́тче Иоа́нне, ко Христу́ отше́д, и по сме́рти к безстра́стней и неболе́зненней жи́зни всели́лся еси́, свяще́нне.

В земли́, о́тче, кро́тких всели́тися сподо́бился еси́, я́коже подо́бник бы́в молча́льным и богоно́сным муже́м, с ни́миже я́ве восприя́л еси́, преподо́бне блаже́нне, наслажде́ние.

Богоро́дичен: Исто́чник безсме́ртия на́м источи́ла еси́, Де́во, и оставле́ния во́ду, Христа́ ро́ждши, И́мже очища́емся от вся́кия скве́рны грехо́вныя, Богоневе́сто.

Yandex Metrika