Акафистник

Помочь сайту
·
·
·
·

Канон святому преподобному Давиду Солунскому

Память: 9 июля (26 июня)

Глас 5.

Припе́в: Преподо́бне о́тче Дави́де, моли́ Бо́га о на́с.

Пе́снь 1.

Ирмо́с: Коня́ и вса́дника в мо́ре Чермно́е сокруша́яй бра́ни мы́шцею высо́кою Христо́с истрясе́, Изра́иля же спасе́, побе́дную пе́снь пою́ща.

Пе́сньми светоно́сную и Боже́ственную па́мять твою́, соше́дшеся, почти́м, Дави́де преблаже́нне, све́та позна́вше тя́ и дне́, преподо́бне, насле́дника Боже́ственным Ду́хом.

У́ды умертви́в, о́тче, на земли́ теле́сныя, жи́знь все́льшуюся в се́рдцы име́л еси́, Христа́, умори́вшаго диа́вола си́лу, умертви́вшаго челове́чество.

Зако́ном Влады́ки повину́яся, преподо́бне, кре́ст тво́й на ра́мо взя́л еси́ и, стопа́м Сего́ после́дуя, ты́ низложи́л еси́ возноше́ния льсти́ваго, смиря́яся.

Богоро́дичен: Яви́лася еси́ укра́шена добро́тою доброде́телей и Христа́ кра́снаго, Де́во, породила́ еси́, челове́ки украси́вшаго кра́сными добро́тами Божества́, Присноде́во.

Пе́снь 3.

Ирмо́с: Водрузи́вый на ничесо́мже зе́млю повеле́нием Твои́м и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х Це́рковь Твою́ утверди́, еди́не Бла́же и Человеколю́бче.

Увяди́в воздержа́нием добро́ту теле́сную, зари́ прия́т Боже́ственнаго Ду́ха и безстра́стия светоза́рными облиста́л еси́ луча́ми и исцеле́ний дарова́нии, о́тче, проро́ку тезоимени́те.

Святы́х после́дуя житию́, пребога́те, ве́сь освяти́лся еси́ Боже́ственными дея́нии. Те́мже освяща́еши та́йно ве́рою свято́е соверша́ющия твое́ торжество́, о́тче Богоно́се всеблаже́нне.

Успи́в сла́сти теле́сныя, преподо́бне, моли́твами, и бде́нии, и по́двиги, о́тче, в ми́ре вои́стинну усну́в, почи́л еси́. Те́мже тя́ неусы́пна стяжа́хом храни́теля, любо́вию чту́щии тя́.

Богоро́дичен: А́нгелов честне́йши яви́лася еси́, ро́ждши те́х, Де́во, Созда́теля. Те́м молю́ Тя, Чи́стая: освяти́ у́м мо́й и се́рдце просвети́, о́блак страсте́й отгоня́щи.

Седа́лен, гла́с 8.

Воздержа́нием стра́сти плотски́я души́ повину́в, о́тче му́дре, яви́лся еси́, блаже́нне, с те́лом А́нгел: се́нь же водрузи́в, я́ко пти́ца благопе́снива на садо́вне дре́ве, на высоту́ у́м впери́л еси́. Те́мже чуде́с де́йством обога́щся, преше́л еси́ ко Го́споду, Его́же от младе́нства вожделе́л еси́, Дави́де пресла́вне, моли́ Христа́ Бо́га грехо́в оставле́ние пода́ти чту́щим тя́.

Богоро́дичен: В напа́сти многоплете́нныя впа́д от вра́г ви́димых и неви́димых, бу́рею одержи́м безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти́ ся́, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Крестобогоро́дичен: А́гнца, и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмо́с: Боже́ственное Твое́ разуме́в истоща́ние прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Глаго́лов живото́чных Ду́ха послу́шав, сла́ное жития́ оста́вль мо́ре и ка́плями сле́з страсте́й изсуши́л еси́ пото́ки.

Ра́зума и благода́ти испо́лнен бы́в, о́тче Дави́де, в безмо́лвии поиска́л еси́ Благоде́теля все́х и Сего́ сия́ния получи́л еси́.

Житие́ твое́ ну́ждею естества́ све́тло показа́в и соде́йствием Ду́ха, от ну́жд зло́бных челове́ки изба́вил еси́, преподо́бне.

Богоро́дичен: Пое́м Тя́, Всепе́тая Влады́чице, Препе́таго Бо́га несказа́нно ро́ждшую и ли́ки А́нгельския несравни́тельно добро́тою преше́дшую.

Пе́снь 5.

Ирмо́с: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко еди́н Благоутро́бен.

Просте́р твои́ о́чи и помышле́ния ко И́же на Дре́ве просте́ршемуся, на садо́вне дре́ве претерпе́л еси́, зно́ем пожига́емь, о́тче, и сту́дению померза́емь.

Ве́сь молниезра́чен яви́лся еси́, преподо́бне, о́гнь дла́ньми, Дави́де, держа́ и ца́рствующаго кадя́ чу́дным, всеблаже́нне, кажде́нием.

Ны́не не в гада́ниих, ниже́ мечта́нием Боже́ственную добро́ту зри́ши, всеблаже́нне, лице́м же, преподо́бне, к лицу́ па́че, разре́шшимся зерца́лом.

Гре́зн прекра́сен Боже́ственнаго, Дави́де преподо́бне, виногра́да яви́лся еси́, источа́я вино́ умиле́ния от пия́нства, о́тче, страсте́й объюроде́вшим.

Богоро́дичен: Напра́ви жи́знь мою́ и движе́ния у́мная, Богороди́тельнице, к Боже́ственному хоте́нию из Тебе́ неизрече́нно к на́м прише́дшаго.

Пе́снь 6.

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Хра́м Боже́ственнаго Ду́ха позна́лся еси́, преподо́бне Дави́де, в ма́ле хра́мине затворе́н и те́сною простра́нную искупу́я.

Зако́ном Влады́ки преклони́л еси́, о́тче, твою́ ду́шу, и све́та испо́лнен бы́л еси́, и прии́мник дарова́ний Ду́ха.

Чудесы́ житие́ твое́, Богоно́се о́тче, вои́стинну укра́шено конце́м яви́ся. Те́мже ве́рно восхваля́ем тя́.

Богоро́дичен: От чи́стых крове́й Твои́х истка́ся пло́ть, па́че естества́, Созда́вшему челове́ка, Богоро́дице. Те́мже досто́йно пое́м Тя́.

Конда́к, гла́с 1.

Са́д присноцвету́щ, доброде́телей плоды́ принося́й, яви́лся еси́ на садо́вне дре́ве, я́ко благопе́снивая пти́ца; ра́й же па́че, жи́зни дре́во, Го́спода, в се́рдцы твое́м прие́м, я́ко возде́лав, Богому́дре, и́мже пита́еши на́с благода́тию; при́сно моли́ о на́с, Дави́де всеблаже́нне.

И́кос:

Сласте́й мои́х пе́щь вжига́ет ми́ ве́чный пла́мень, преподо́бне Дави́де, погаси́ моли́твами твои́ми, я́коже многотеку́щими слеза́ми твои́ми, вже́г у́глие любве́, блаже́нне, Зижди́теля моего́, я́коже дре́вле в руку́ твое́ю носи́в, я́ко же́ртву, и царя́ удиви́л еси́, я́ко да пою́ тебе́, светоно́сче, Дави́де всеблаже́нне.

Пе́снь 7.

Ирмо́с: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: Бо́же, благослове́н еси́.

Стоя́л еси́ неукло́нно на ве́твех са́да, преподо́бне, напое́нии сле́з твои́х ча́сто напоя́я и поя́ немо́лчно: Бо́же, благослове́н еси́.

Все́ твое́ жела́ние к Бо́гу просте́рл еси́, все́ се́рдце твое́ прия́телище сотвори́л еси́ Боже́ственных дарова́ний, Богоно́се, воспева́я: Бо́же, благослове́н еси́.

Тя́, светови́дна, о́тче, бы́вша, у́глие держа́ща в руку́, я́ко ви́де ца́рь, удиви́ся и нога́м твои́м поклони́ся.

Богоро́дичен: Разреши́ся Рождество́м Твои́м кля́тва челове́ча, Еди́на Всеблагослове́нная, те́мже Тя́ славосло́вим, я́ко Благода́тную, Богоро́дице, во ве́ки.

Пе́снь 8.

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: /дела́ вся́кая, Го́спода по́йте и превозноси́те во вся́ ве́ки.

У́тро разу́мное су́щим во тьме́ яви́лся еси́ жития́, блаже́нне, све́т разуме́ния все́м озаря́я, любо́вию тя́ чту́щим и превознося́щим Христа́ во вся́ ве́ки.

Бы́л еси́ пра́в, и смире́н, и кро́ток, Дави́да тезоимени́таго изобража́я ве́рно. Те́мже с ни́м зе́млю кро́тких, о́тче, насле́довал еси́ во вся́ ве́ки.

Богосия́нен мона́шествующих сто́лп, Дави́де блаже́нный, проро́к Боже́ствен други́й яви́лся еси́, бу́дущая предглаго́ля Боже́ственная явле́ния Ду́ха Боже́ственнаго.

Богоро́дичен: Тя́, добро́ту Иа́ковлю, Де́во, Бо́г Ю́же возлюби́, Ю́же избра́, вси́ я́ко Еди́ну Благослове́нную песносло́вим во вся́ ве́ки.

Пе́снь 9.

Ирмо́с: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Свяще́нное торжество́, соше́дшеся дне́сь, ве́рнии, соверши́м, свяще́ннаго вси́ отца́, воздержа́нием возсия́вшаго и себе́ всего́ Бо́гу освяти́вшаго житие́м соверше́ния.

Я́коже дре́во насади́лся еси́ на вода́х, преподо́бне, то́ки духо́вных доброде́телей нося́ плоды́, на садо́вне же дре́ве водрузи́в, я́ко оре́л, о́тче, гнездо́, к Небе́сным тво́й у́м впери́л еси́.

Тво́й проро́чески узре́в, Дави́де, исхо́д, провозглаша́еши си́й лю́дем, егда́ посыла́емь, е́же на ни́х поста́вил еси́, му́дре, ца́рствующаго мно́гое негодова́ние.

Свята́я па́мять твоя́ освяща́ет дне́сь на́с, творя́щих сию́ ве́рно, преподо́бне Дави́де: свя́то бо препроводи́л еси́ твою́, свя́те, жи́знь и по успе́нии ра́дуешися со святы́ми при́сно.

Богоро́дичен: Светоно́сну две́рь Тя́ предзря́ше Иезеки́иль, е́юже про́йде Све́т и́стинный, Христо́с, Бо́г на́ш, Его́же приле́жно моли́, Чи́стая, покая́ния ми́ две́ри отве́рсти, молю́ся.

Свети́лен.

Мирска́го весе́лия, я́ко от скве́рны, уклони́лся еси́, и, неяде́нием пло́ть увяди́в, обнови́л еси́ души́ кре́пость, преподо́бне, сла́вою обогати́лся еси́ Небе́сною, сла́вне. Те́мже моля́ не преста́й о на́с Го́спода.

Богоро́дичен: Вои́стинну Богоро́дицу Тя́ испове́дуем, Влады́чице, Тобо́ю спа́сшиися: и́бо Го́спода неизрече́нно родила́ еси́, разо́ршаго Кресто́м сме́рть, к Себе́ же привле́кша преподо́бных собо́ры. С ни́миже Тя́ восхваля́ем, Де́во.

Yandex Metrika