Акафистник

Помочь сайту
·
·
·
·

Канон святому мученику Кодрату и дружине его

Память: 13 февраля (31 января), 23 (10) марта

Глас 4.

Припев: Святи́и му́ченицы, моли́те Бо́га о на́с.

Пе́снь 1.

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Му́чеников свяще́нных, свяще́нно страда́вших, свяще́нный и чу́дный наста́ пра́здник, светозаре́нием Ду́ха вся́ световодя́щи, соше́дшеся, празднолю́бцы, по до́лгу си́х ублажи́м.

Я́ко со́лнце све́тлое, доброде́телей светоно́сием возсия́л еси́ на́м, Кодра́те страда́льче, светолу́чными твои́ми сия́нии тму́ многобо́жия отгоня́, блаже́нне, и просвеща́я ве́рных составле́ния.

Ка́мень жи́зни Иису́са Спа́са возвеща́юще Бо́га, пострада́сте тве́рдо, и исто́чник свяще́ния, ка́мень, прие́мшии, крове́й тече́ния соде́ласте, му́ченицы сла́внии.

Богоро́дичен: От тиме́ния страсте́й, помышле́ний треволне́ния, от стре́л вра́жиих, от вся́каго прило́га сопроти́вна спаси́, Чи́стая Богороди́тельнице, ду́ши пою́щих Твое́ несказа́нное Рождество́, Всенепоро́чная.

Пе́снь 3.

Ирмо́с: Я́ко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди.

Тве́рдии адама́нти, убива́емии мече́м и боле́зней ви́дом приобща́ющеся терпели́вно, чу́дному Бо́гу на́шему взыва́ху: Свя́т еси́, Го́споди.

Прему́дростию Кодра́т богода́нною упраздни́ е́ллинскую му́дрость, любопре́ния стражда́, и свои́ми кровьми́, Ду́хом Боже́ственным удобря́яся.

С Кодра́том Ане́кта и с Па́влом Криске́нта, Киприа́на боже́ственнаго и Диони́сия, ве́рнии, благочестному́дренно пе́сньми венча́ем, ве́рою пострада́вших.

Богоро́дичен: Ниже́ небе́сный у́м па́че ума́ Рождества́ Твоего́ мо́жет сказа́ти, Отрокови́це, Ума́ бо пе́рваго во утро́бе Сло́во, Чи́стая, зачала́ еси́, вся́ческая сло́вом соста́вльшаго.

Седа́лен, гла́с 4.

Терпе́нием лю́тых умертви́л еси́ го́рдаго врага́, страстоте́рпче, ме́чную сме́рть претерпе́л еси́, вку́пе со стра́ждущими с тобо́ю всему́дрыми, Кодра́те. Те́мже пра́зднуем честну́ю ва́шу па́мять, вопию́ще: помяни́те на́с ко Влады́це, непобеди́мии му́ченицы.

Сла́ва, и ны́не, богоро́дичен: Нечи́стых помысло́в мои́х мно́жество и безме́стных мы́слей обурева́ния кто́ изрещи́ мо́жет, Всенепоро́чная? Настоя́ния же безпло́тных вра́г мои́х кто́ испове́сть и си́х зло́бу? Но Твое́ю мольбо́ю, Блага́я, си́х мне́ все́х избавле́ние да́руй.

Крестобогоро́дичен: И́же от Безнача́льнаго Отца́ рожде́ннаго напосле́док Тя́ пло́тию ро́ждшая, на Кресте́ ви́сяща зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́ распина́ешися? Пою́ тя́, Долготерпели́ве.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Му́дростию твои́х слове́с нему́дрыя посрами́л еси́, и наказа́нием богови́дных уче́ний твои́х, му́чениче Кодра́те, улови́л еси́ боже́ственнаго Ане́кта, Влады́це твоему́ приво́диши терпели́ва му́ченика.

От пеле́н присво́ился еси́ вся́ Сотво́ршему, изде́тска соверше́нна му́жа смы́сл избра́в и прему́дрости возжеле́в, ве́сь бы́л еси́ чисте́йшее, му́чениче, Христо́во оби́телище.

Шестосве́тлый све́щник му́чеников Твои́х, Го́споди, та́йным еле́ем напои́вся, отгна́ многобо́жия но́щь и озари́ зову́щия: сла́ва, Христе́, си́ле Твое́й.

Богоро́дичен: Свята́я Богоро́дица, в Не́йже всели́тися благоволи́, я́ко благово́нен хра́м, Сло́во О́тчее единосу́щное, не опали́ ложе́сн, не боле́знова, и́бо роди́ Емману́ила, Бо́га и Челове́ка.

Пе́снь 5.

Ирмо́с: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны́, Бла́же, Тво́й ми́р да́руяй.

Просвеще́нием ра́зума неразу́мия мглу́ отгоня́, Го́сподеви приво́диши собо́р страда́лец, му́дре Кодра́те, с ни́ми венча́емь.

По́стнически пе́рвее победи́в страсте́й привозста́ния, второ́е погуби́л еси́ держа́ву злочести́вых, Кодра́те му́чениче, пострада́в крепча́йше.

Исполня́ется невла́жный ка́мень пролия́ньми честны́х твои́х крове́й и струи́ све́тлы дае́т ве́рным, освяща́я Боже́ственными манове́ньми.

Богоро́дичен: Созда́вый, Пречи́стая, Е́ву от ребра́, из Твоея́ чи́стыя утро́бы зи́ждется, спасти́ Ада́ма за благоутро́бие восхоте́в, я́ко Человеколю́бец.

Пе́снь 6.

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Шесточи́сленный страстоте́рпец ли́к на́м возсия́, я́коже зве́зды на церко́вней честне́й тве́рди, ве́рныя просвеща́яй и пре́лести тму́ разгоня́яй.

Пучи́ну му́к преидо́сте, му́ченицы, нево́лненно и вы́шнюю тишину́ получи́сте, ве́рных приста́нище бы́вше и моли́твенницы тепле́йшии.

Да похва́лим со Ане́ктом Кодра́та сла́внаго и с Па́влом Диони́сия, Криске́нта, Киприа́на, Христо́ва виногра́да добропло́дныя ро́зги.

Богоро́дичен: Онебеси́ла еси́ озе́мствованное естество́, Всенепоро́чная, челове́ков и истле́вшее сие́ новосоде́лала еси́, сего́ ра́ди, Отрокови́це, вси́ немо́лчными гла́сы Тя́ сла́вим.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Во огни́ муче́ний свы́ше прие́млюще ро́су терпе́ния, со о́троки до́блии взыва́ху му́ченицы: препе́тый Го́споди, Бо́же оте́ц на́ших, благослове́н еси́.

Одожде́нием честны́я кро́ве ва́шея, страстоте́рпцы, ка́мень невла́жный пре́жде испо́лнися, струи́ пролива́ющь исцеле́ний пою́щим: Бо́же оте́ц, благослове́н еси́.

Я́ко мирополо́жница мы́сленная, ми́ро врачева́ний, Кодра́те, моще́й твои́х ра́ка источа́ет, страсте́й отгоня́щи злосмра́дие и опаля́ющи де́монов ополче́ния си́лою Боже́ственною.

Богоро́дичен: Благослове́н Пло́д благослове́нныя утро́бы Твоея́, Его́же благословя́т небе́сныя си́лы и челове́честии собо́ри, на́с изба́вльшаго от кля́твы дре́вния, Благослове́нная.

Пе́снь 8.

Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Просве́щся страда́ний све́тлостию, венцено́сец Го́споду предстои́ши со страда́вшими с тобо́ю, сла́вне, воспева́я, Кодра́те: вся́ дела́, благослови́те, по́йте Го́спода.

Доброде́телей све́том удобря́емь, при кончи́не му́ченическую све́тлость насле́довал еси́, всему́дре, воспева́я, Кодра́те: вся́ дела́, благослови́те, по́йте Го́спода.

Предогражде́ния Кори́нф стяжа́, святы́х честны́я мо́щи, и врачева́ние безме́здно хра́м, иде́же ве́рою вся́к притека́яй боле́зни и страсте́й изменя́ется.

Богоро́дичен: Изба́вльшися кля́твы прама́терния Тобо́ю, Чи́стая Богома́ти, благослове́нная Влады́чице, благослови́м Тя́ ве́рою и песносло́вим, Пресвята́я Де́во Богоневе́сто.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Гное́ния ва́ша му́ченическая испуща́ют благово́ние, по́лно благода́ти, кро́ви си́х целе́б излива́ют то́ки Боже́ственным Ду́хом и стра́сти душетле́нныя исцеля́ют, я́же досто́йно ублажи́м.

Красе́н я́зв добро́тами бы́в, а́нгелом уподо́бился еси́: кро́вию же излия́нною, Кодра́те, все́д, я́ко на колесни́цу, возлете́л еси́ к Вы́шним Ца́рством, по́чести боле́зней прие́мля.

Источа́я боже́ственную сла́дость из у́ст, страда́льческий собо́р увеща́л еси́, му́чениче Кодра́те, страда́ти с тобо́ю, Ане́кта, и Па́вла, и Криске́нта, Киприа́на же и боже́ственнаго Диони́сия, с ни́миже лику́еши, досточу́дне.

Де́нь пра́здника ва́шего страда́ния, страстоте́рпцы, вси́ почита́ем, в се́й бо, вене́ц нетле́ния взе́мше, сы́нове бы́сте све́та же и дне́, лику́юще о́крест престо́ла Всецаря́.

Богоро́дичен: Я́вльшися все́х Творца́ Роди́тельница па́че вся́каго ума́, Всенепоро́чная, небе́с вы́шши показа́лася еси́ и все́ми влады́чествующи, Де́во Богороди́тельнице нескве́рная, те́м Тя́ вси́ непреста́нно велича́ем.

Yandex Metrika