Акафистник

Помочь сайту
·
·
·
·

Канон святому мученику Иулиану Тарсийскому

Память: 4 июля (21 июня)

Глас 8.

Припев: Святы́й му́чениче Иулиа́не, моли́ Бо́га о на́с.

Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко еди́н сла́вно просла́вися.

Свяще́нными да восхва́лится пе́сньми страда́лец Тво́й сла́вный и пречестна́я па́мять: непристу́пною бо сла́вою просла́вися.

Поползе́нием не па́лся еси́, подвиза́яся му́ченически, Христо́в во́ине, не́мощию пло́ти да́же до кро́ве.

Па́че сия́ния зла́та му́ченическими ра́нами украси́лся еси́, облиста́яся, и многоце́ннаго ка́мене, святы́й.

Богоро́дичен: Чи́стая Богоро́дице, Я́же воплоще́нное Присносу́щное и Пребоже́ственное Сло́во па́че естества́ ро́ждши, пое́м Тя́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Ка́мению не повеле́но ми́ бы́сть, я́ко бо́гу служи́ти ручны́х де́л, – Иулиа́н умовре́дному судии́ отвещава́ше.

Стоя́л еси́ пред суди́щем мучи́теля, Христу́, му́чениче Иулиа́не, я́ко Судии́ живы́х и ме́ртвых предстоя́.

Безу́мен не бы́х, испове́дая Бо́га, – рече́ Иулиа́н, Еди́наго в Тро́ице, неразде́льно пева́ема.

Богоро́дичен: Да́ждь на́м по́мощь моли́твами Твои́ми, Пречи́стая, прило́ги отрева́ющи лю́тых обстоя́ний.

Седа́лен, гла́с 1.

Во́д потопле́нием блаже́нную кончи́ну прия́л еси́, му́дре, многообра́знаго зми́я в си́х удави́в, побе́ду взя́л еси́. Те́мже любо́вию твою́ достохва́льную па́мять пра́зднующе, о на́с моли́ Христа́, мо́лимся.

Богоро́дичен: Наста́ви на́с на пу́ть покая́ния, укло́ншияся при́сно к безпу́тием зо́л и Преблага́го прогне́вавшия Го́спода, Неискусобра́чная Благослове́нная Мари́е, прибе́жище отча́янных челове́ков, Бо́жие жили́ще.

Крестобогоро́дичен: Зря́щи Тя́, Христе́, Всенепоро́чная Ма́ти ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Многообра́зным ра́нам Иулиа́н те́ло предая́ше, не чу́вствуя боле́зней, Христо́вою бо любо́вию сохраня́шеся.

Небе́сныя, пресла́вне Иулиа́не, хлами́ды жела́я, гони́телем земну́ю, я́ко Христо́в уго́дник, оста́вил еси́.

Победи́теля де́монския ле́сти не теле́сная си́ла, пребога́те, но жела́ние непобеди́мое Христо́вых страсте́й тя́ соде́ла.

Богоро́дичен: Очище́ние на́шим да́руй неве́дением, я́ко безгре́шен, и умири́ ми́р Тво́й, Бо́же, моли́твами ро́ждшия Тя́.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Подо́бяся во все́м Влады́це, прехва́льне, ста́л еси́ пред суди́щем беззако́ннующих, осужда́емь.

Зако́нно подвиза́вся, закла́лся еси́ Влады́це, я́ко а́гня незло́биво, рука́ми беззако́нных, блаже́нне.

Ни ро́д, ни са́н земны́й вмени́л еси́, проти́ву твоему́, му́чениче сла́вне, христоимени́тству превы́шши.

Богоро́дичен: Мари́е, Богоро́дице Безневе́стная, упова́ние враго́в су́етно сотвори́, пою́щия же Тя́ возвесели́.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Ко дре́ву пригвожде́на Тя́, Христе́, сла́вный уго́дник Тво́й не стыдя́шеся, но, я́ко сла́вы сокро́вище, непщева́ше.

Умолко́ша пре́лести скве́рныя, Богогла́сными же язы́ки Боже́ственная та́инства му́ченик Христо́вых откры́шася.

Исцеле́ния страсте́й вся́ческих и согреше́ний проси́ оставле́ния, сла́вне страда́льче Христо́в, пою́щим тя́.

Богоро́дичен: Привнеси́ мольбу́ на́шу Сы́ну Твоему́, Пречи́стая, Ты́ бо еси́ похвала́ ро́да на́шего и заступле́ние.

Конда́к, гла́с 2.

Благоче́стия непобеди́маго во́ина и и́стины согла́сника и ору́жника, вси́ досто́йно восхва́лим Иулиа́на дне́сь и к нему́ возопии́м: моли́ Христа́ Бо́га о все́х на́с.

И́кос:

Путе́м Госпо́дним от младе́нства ше́ствовал еси́, треблаже́нне, и Того́ благоче́стно свиде́ния вожделе́л еси́, и, кре́ст на ра́мо, Иулиа́не Богому́дре, усе́рдно взе́м, ле́сть лю́тую идолонеи́стовства разори́л еси́, сокруши́в ка́пища вра́жия, ко́зни же и ла́яния. Те́мже ве́рою притека́ем в тво́й покро́в, вопию́ще, пребога́те: моли́ Христа́ Бо́га о все́х на́с.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Ми́ро благово́нно иска́пает хва́льная и сла́вная твоя́ па́мять, во́ине Христо́в, пою́щим непреста́нно: благослове́н еси́, Го́споди Бо́же, во ве́ки.

Неизглаго́ланная сла́ва венчава́ет и́же к хвале́ твое́й со́бранныя, во́ине Христо́в, пою́щия непреста́нно: благослове́н еси́, Го́споди Бо́же, во ве́ки.

Глаго́лу мучи́теля не повину́вся, не послужи́л еси́, непобеди́ме, тва́ри, но еди́ному Бо́гу Жи́ву вопия́л еси́: благослове́н еси́, Го́споди Бо́же, во ве́ки.

Богоро́дичен: Разреша́я Е́вину кля́тву, в Пренепоро́чную всели́ся Де́ву, благослове́ния исто́чник прозяба́я вопию́щим: благослове́н, Влады́чице, Пло́д Твоего́ чре́ва.

Пе́снь 8.

Ирмо́с: Мусики́йским орга́ном согласу́ющим и лю́дем безчи́сленным, покланя́ющимся о́бразу в Деи́ре, три́ о́троцы не повину́вшеся, Го́спода воспева́ху и славосло́вяху во вся́ ве́ки.

Ласка́ше у́бо льсте́ц и му́ками тя́ призыва́ше к пре́лести, Иулиа́не, ты́ же вопия́л еси́: Го́спода по́йте и превозноси́те во вся́ ве́ки.

Крепча́йше, я́коже ле́в, мучи́теля низлага́я, Иулиа́не, по му́ках взыва́л еси́ ве́село: Го́спода по́йте и превозноси́те во вся́ ве́ки.

Лю́тость огня́ не отлучи́т мя́, ни сече́ние меча́ отто́ргнет от Соде́теля Бо́га, – вопия́ше, взыва́я: Го́спода по́йте и превозноси́те во вся́ ве́ки.

Богоро́дичен: Я́ко все́х Го́спода ро́ждшую и Де́ву пребы́вшую, Мари́е, и по рождестве́, ве́рнии, досто́йно воспева́юще, ра́дуйся, Тебе́ вопие́м и превозно́сим во вся́ ве́ки.

Пе́снь 9.

Ирмо́с: Чи́стую сла́вно почти́м, лю́дие, Богоро́дицу, О́гнь Божества́ прии́мшую во чре́ве неопа́льно, пе́сньми велича́ем.

Превзя́тое о́ко низложи́л еси́, Бо́жий во́ине, безпло́тнаго лестца́, бра́вся с пло́тию му́жески, Христа́ же велича́я при́сно.

Гне́зд избежа́л еси́ зми́я, врага́ злонача́льника, в морски́я, блаже́нне, глубины́ вве́ржен, му́дре. Те́м тя́ пе́сньми велича́ем.

Я́ко до́бре страда́ньми подвиза́лся еси́ по Влады́це, я́ко красно́ венча́лся еси́ десни́цею Влады́ки, те́мже тя́ досто́йно ублажа́ем.

Богоро́дичен: Моисе́й в купине́ Тя ви́де, Чи́стая, в горе́, прие́млющу нестерпи́мый Божества́ о́гнь неопа́льно. Те́мже Тя́ вси́ велича́ем.

Свети́лен.

Я́коже со́лнце светоно́сно, чуде́сными заря́ми наставля́еши всю́ тва́рь, пресла́вне страстоте́рпче. Те́мже, твою́ соверша́юще па́мять, про́сим от бе́д вся́ изба́вити.

Богоро́дичен: Твое́ достоя́ние, Сло́ве, утверди́ во бране́х, оте́честву побе́ды на ва́рвары подая́ Богоро́дицы мольба́ми, Ю́же дарова́ христиа́ном Засту́пницу.

Yandex Metrika