Акафистник

Помочь сайту
·
·
·
·

Канон святителю Афанасию III, патриарху Константинопольскому, Лубенскому чудотворцу

Память: 15 (2) мая

Глас 8.

Припев: Святи́телю, о́тче Афана́сие, моли́ Бо́га о на́с.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Безсме́ртию бы́в тезоимени́т, в ве́ре тве́рдей житие́ твое́ проше́д, блаже́ннаго безсме́ртия прича́стник яви́лся еси́, о́тче святи́телю Афана́сие, ны́не Христо́ви предстоя́, помина́й на́с, почита́ющих тя́.

Пе́снь хвале́бную прино́сим ти́, святи́телю, в прославле́ние па́мяти твоея́, а́ще и не довле́ет у́м на́ш по достоя́нию благохвали́ти тя́, но ты́ са́м помози́ на́м почива́ющею на тебе́ неоску́дною благода́тию.

Очи́стив от вся́кия скве́рны ду́шу и те́ло, святи́телю Афана́сие, хра́м досто́ин Бо́гу показа́лся еси́ и Тро́ицы жили́ще яви́лся еси́, священнотаи́нниче пребога́те.

Богоро́дичен: Хра́м освяще́н и ле́потою благоукраше́н воздви́же уго́дник Бо́жий Афана́сий во сла́ву Твою́ и че́сть, Пречи́стая Влады́чице, те́мже не преста́й моля́щися со святи́телем Христу́ Бо́гу о душа́х на́ших.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Све́том благода́ти вои́стинну просия́л еси́, святи́телю Афана́сие, и бы́л еси́ священноде́латель Ева́нгелия Христо́ва.

Благода́тными словесы́ твои́ми напая́ема па́ства твоя́, го́рькости ересе́й отрица́ется.

До́бре упа́сл еси́ ста́до Влады́ки твоего́, о́тче Афана́сие, те́мже во оби́тели Небе́сныя всели́лся еси́.

Богоро́дичен: Да́ждь на́м по́мощь моли́твами Твои́ми, прило́ги отгоня́ющи лю́тых обстоя́ний, Де́во Всепе́тая.

Седа́лен, гла́с 4:

В пра́вей ве́ре Це́рковь Христо́ву упа́сл еси́, святи́телю Афана́сие, и ерети́чества исто́ргл еси́ го́рькия пле́велы. Те́мже в Вы́шних черто́зех водворя́ешися, блаже́нне.

Богоро́дичен: Сло́во О́тчее, Христа́ Бо́га на́шего, от Тебе́ воплоти́вшагося, позна́хом, Богоро́дице Де́во, Еди́на Чи́стая, Еди́на Благослове́нная, те́м, непреста́нно Тя́ воспева́юще, велича́ем.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Уста́ богодухнове́нная стяжа́в, святи́телю Афана́сие, обличи́л еси́ злы́я нра́вы лука́вых челове́к и, сконча́вся в непра́веднем изгна́нии, при Фаво́ре Мга́рстем, оста́вил еси́ на́м, недосто́йным, честно́е те́ло твое́, точа́щее чудеса́.

Блаже́н яви́лся еси́, изгна́н пра́вды ра́ди, за́вистию злонра́вных челове́к, и на́с посети́л еси́ твои́м благослове́нием. Те́мже ны́не от все́х почита́ешися свяще́нными пе́сньми, му́дре святи́телю Афана́сие.

Пе́рвее бы́л еси́ архиере́й нача́льнаго гра́да Кри́тскаго, та́же, по взя́тии того́ от ага́рян, Патриа́рх Константи́ню гра́ду поста́влен бы́л еси́, иде́же богодухнове́нными уче́нии ста́до твое́ напая́л еси́, блаже́нне святи́телю Афана́сие.

Богоро́дичен: Тя́, Блаже́нную, Еди́ну избра́нную и непоро́чную обре́т, воплоща́ется Пребоже́ственное Сло́во, Богора́дованная.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Безсме́ртен по и́мени досто́йно наре́клся еси́, о́тче на́ш святи́телю Афана́сие, зане́, житие́ твое́ чи́сте соверши́в, во Христа́ обле́клся еси́, те́мже Ца́рь Сла́вы и Бо́г ве́чный избра́ тя́ в жили́ще Себе́.

Изба́ви чту́щия тя́, святи́телю Афана́сие, от грехо́вныя бу́ри, от бе́д и скорбе́й, к ти́хому приста́нищу приводя́ богоприя́тными твои́ми моли́твами.

До́брый па́стырь ста́да Христо́ва яви́лся еси́, уго́дниче святи́телю Афана́сие, не преста́й моля́ся ко Го́споду, да спасе́т ду́ши на́ша.

Богоро́дичен: Досто́йно Тя́ сла́вят святи́тельстии собо́ри и вси́ преподо́бных ли́цы: Зижди́теля бо все́х, Бо́жие Сло́во, на руку́ Твое́ю носи́ла еси́.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Оби́тель сию́, с ве́рою почита́ющую тя́, святи́телю Афана́сие, храни́ от находя́щих искуше́ний, лю́тых обстоя́ний и вся́ких скорбе́й, непреста́нно моля́ся ко Влады́це Христу́ о ста́де твое́м.

Ты́ и по сме́рти, я́ко жи́в сы́й, чудоде́йствуеши, да́руя немощны́м исцеле́ния Боже́ственною благода́тию, рече́ бо Госпо́дь: прославля́ющия Мя́ просла́влю.

Напа́стей о́блацы покры́ша ны́, и теле́сныя боле́зни умно́жишася. К тебе́ прибега́ем и тебе́ призыва́ем, святи́телю Афана́сие: потщи́ся на по́мощь, ускори́ на моли́твы, от бе́д и ско́рбных обстоя́ний на́с избавля́я.

Богоро́дичен: Очи́стив свое́ се́рдце, Авраа́м, пра́отец Тво́й, Чи́стая Де́во, прия́т обеща́ние от Бо́га: благослови́тися о се́мени его́ все́м язы́ком. Тобо́ю исполне́ние обетова́ния прие́млем дне́сь.

Конда́к, гла́с 8:

О всесвяте́йший па́стырю и учи́телю вселе́нныя, преблаже́нне о́тче на́ш святи́телю Афана́сие! К ра́це моще́й твои́х припа́дающе, усе́рдно мо́лим тя́: приими́ от убо́гих ду́ш на́ших любо́вию приноси́мая тебе́ моле́ния и, я́ко име́я дерзнове́ние у Престо́ла Влады́чня, испроси́ моли́твами твои́ми чту́щим тя́ со А́нгелы и все́ми святы́ми непреста́нно Пресвяте́й Тро́ице воспева́ти: аллилу́ия.

И́кос:

Ле́ностию окая́нный а́з во глубину́ греха́ впадо́х, но, я́ко па́стырь до́бр, воздви́гни мя́, святе́йший о́тче, и стра́сти угаси́, зле́ му́чащия мя́, я́ко да, воста́в, чи́сте воспою́ твое́ светоно́сное торжество́, и́мже Влады́ка вселе́нныя просла́ви тя́ досто́йно, я́ко раба́ ве́рнейша, учи́теля прему́дра, соверши́теля Та́ин Бо́жиих и блюсти́теля за́поведей, я́же до́бре сохрани́л еси́, пома́зание свято́е, Афана́сие прему́дре. Того́ при́сно моли́, да да́рует чту́щим тя́ со А́нгелы и все́ми святы́ми непреста́нно Пресвяте́й Тро́ице воспева́ти: аллилу́ия.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Во глубину́ зо́л впадо́х, страстьми́ погружа́емь, и ко врато́м а́да прибли́жихся, грехми́ побежда́емь. Спаси́ мя́ моли́твами твои́ми, Богоблаже́нне, и воздви́гни, пою́ща: благослове́н Бо́г отце́в на́ших.

Вся́ких лю́тых неду́гов вра́ч всеизря́ден яви́лся еси́, о́тче Афана́сие. Исцели́ у́бо не́мощь души́ моея́ и сподо́би во умиле́нии се́рдца взыва́ти: отце́в на́ших Бо́же, благослове́н еси́.

Ди́вный во святы́х Свои́х, просла́ви Госпо́дь и в земли́ Росси́йстей уго́дника Своего́, преблаже́ннаго святи́теля Афана́сия, па́стыря до́браго и моли́твенника о душа́х на́ших.

Богоро́дичен: Всесла́вная все́х Цари́це, мольба́ми святи́теля Афана́сия сохрани́ невреди́мы от вся́каго зла́го обстоя́ния лю́ди Твоя́, всегда́ Тя́ моля́щия, я́ко Предста́тельницу ми́рови.

Пе́снь 8.

Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Бога́тство уче́ний твои́х неску́дно расточа́л еси́, святи́телю Афана́сие, и́мже обогати́ся у́м а́лчущих словесе́ твоего́. Изгна́н же бы́в непра́ведно от престо́ла Царягра́да, к ве́рным лю́дем Росси́йския земли́ прише́л еси́ и в Фаво́ре Мга́рстем блаже́нныя кончи́ны сподобля́ешися. Те́мже вопие́м: благослови́те, дела́ Госпо́дня, Го́спода, по́йте и превозноси́те Его́ во ве́ки.

Я́ко весна́, яви́лся еси́, блаже́нне, та́инственными цве́ты даро́в Боже́ственных благоуха́я, разреша́я от напа́стей и скорбе́й ве́рная ча́да твоя́, к тебе́ притека́ющая и Бо́гу вопию́щая: благослови́те, дела́ Госпо́дня, Го́спода, по́йте и превозноси́те Его́ во ве́ки.

Я́ко лоза́ многопло́дная, доброде́телей плоды́ израща́ющая, яви́шася словеса́ твоя́, благода́ти испо́лненная: прише́д бо ко ага́ряном, мольбу́ о лю́дех твои́х прине́сл еси́. Ти́и же, ви́девше тя́, умили́шася и, моле́ния ра́ди твоего́, преста́ша убива́ти кри́тския лю́ди, вопию́щий: благослови́те, дела́ Госпо́дня, Го́спода, по́йте и превозноси́те Его́ во ве́ки.

Богоро́дичен: Вы́шний Престо́ле, Де́во Богоневе́сто, до́лу лежа́щее естество́ на́ше к Небеси́ возво́диши, те́мже Тя́ вси́ по до́лгу сла́вим.

Пе́снь 9.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с Те́м Тя́, Богоро́дицу, А́нгелов и челове́к чинонача́лия велича́ют.

Дне́сь све́тло красу́ется свята́я па́мять твоя́, и ты́, святи́телю Афана́сие, я́ко со́лнце, блиста́еши, ве́рных озаря́я, во Мга́рстей же оби́тели мно́зи, приходя́щий к тебе́ с ве́рою, прие́млют исцеле́ния. Те́мже тя́ велича́ем.

Соше́дшеся дне́сь, досто́йно хва́лим тя́, святи́телю Афана́сие, и моще́й твои́х чти́м ра́ку, прося́ще пода́ти на́м моли́твами твои́ми от страсте́й избавле́ние, боле́зней исцеле́ние, грехо́в оставле́ние, от напа́стей свобожде́ние, и я́ко уго́дника Бо́жия вси́ тя́ велича́ем.

Сла́ву твою́ воспе́ти по досто́инству невозмо́жно е́сть: чудеса́ бо мно́га соверша́еши и исцеле́ния незави́стно источа́еши с ве́рою приходя́щим к тебе́, Афана́сие, Росси́йская похвало́. Те́мже я́ко уго́дника Бо́жия вси́ тя́ велича́ем.

Богоро́дичен: Ты́ еси́, Богоро́дице, ору́жие на́ше и стена́, Ты́ еси́ заступле́ние к Тебе́ прибега́ющих, Тя́ ны́не на моли́тву подвиза́ем, да изба́вимся от вра́г на́ших.

Свети́лен:

Све́тло пра́зднуется дне́сь церко́вное торжество́, в прославле́ние жития́ и чуде́с твои́х, святи́телю о́тче Афана́сие, ты́ же, предстоя́ во све́те сла́вы лицу́ Бо́жию, помяни́ на́с, чту́щих святу́ю па́мять твою́.

Сла́ва, и ны́не: По Бо́зе на Тя́, Пречи́стая, упова́ние возлага́ем: не пре́зри на́с в лю́тых ско́рбех и напа́стех, но Твои́ми мольба́ми ко Христу́, Сы́ну Твоему́, невреди́мы да́же до конца́ на́с сохрани́.

Yandex Metrika