Конда́к 1.

Избра́нный и ди́вный о́тче Ону́фрие, сия́ющий трисия́ннаго живота́ заре́ю, ты́ мя́, омраче́ннаго грехо́вными страстьми́, просвети́, от смертоно́сныя ра́ны исхити́ и твои́ми моли́твами от все́х бе́д изба́ви, да зову́ тебе́: Ра́дуйся, о́тче Ону́фрие, пресве́тлый свети́льниче всея́ вселе́нныя.

И́кос 1.

А́нгельстии чи́ни твои́м, о́тче, удиви́шася по́двигом, и́миже в пусты́ни непреста́нно упражня́лся еси́; три́ бо и шестьдеся́т ле́т пости́лся еси́, Боже́ственныя же Христо́вы Та́йны от ру́к а́нгельских приима́ти сподо́бился еси́, и ны́не у́бо почита́я тя́ единовсе́льника и собесе́дника А́нгелов, сицева́я вопию́ тебе́, свя́те Ону́фрие:

Ра́дуйся, А́нгелов преди́вное чу́до; ра́дуйся, душетле́нных страсте́й разруши́телю.

Ра́дуйся, непроходи́мыя пусты́ни просвети́телю; ра́дуйся, воздержа́ния наказа́телю и учи́телю.

Ра́дуйся, пустынножи́телей удобре́ние; ра́дуйся, мона́хов богодухнове́нное свети́ло.

Ра́дуйся, уго́дниче Христо́в преизя́щный; ра́дуйся, безмо́лвия рачи́телю тепле́йший.

Ра́дуйся, бесо́вския си́лы кре́пкое попра́ние; ра́дуйся, спасе́ния и́стинный наста́вниче.

Ра́дуйся, пода́телю ра́дости ве́рным; ра́дуйся, ско́рый помо́щниче к тебе́ притека́ющим.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 2.

Ви́дяще стра́нный и чу́дный жития́ твоего́ о́браз преподо́бный Пафну́тий вельми́ удиви́ся; те́м же и а́з, размышля́я твоя́ па́че ме́ры трудолю́бныя пусты́нныя по́двиги, пою́ Бо́гу, на сия́ тебе́ укрепи́вшему: Аллилу́иа.

И́кос 2.

Ра́зуму да́тися мне́ боже́ственному, помоли́ся преподо́бне Ону́фрие, ты́ бо, боже́ственным сия́ющи све́том и с А́нгелы водворя́ющися посо́бствуеши па́мять твою́ соверша́ющим и ра́достно похва́льная тебе́ си́це принося́щим:

Ра́дуйся, стра́нно доброде́тельми просия́вый; ра́дуйся, со́лнечнаго све́та светле́йший.

Ра́дуйся, А́нгелом в пусты́ню проводи́мый; ра́дуйся, го́рлице пустыннолю́бная.

Ра́дуйся, рожо́ багряноцвету́щая; ра́дуйся, хра́ме всечестны́й и Бо́гу освяще́нный.

Ра́дуйся, Бо́жиих дарова́ний исполне́ние; ра́дуйся, пречу́дное в челове́цех удивле́ние.

Ра́дуйся, бесо́в стра́нное и гро́зное устраше́ние; ра́дуйся, предраги́й адама́нте.

Ра́дуйся, Тро́ичнаго све́та зри́телю; ра́дуйся, те́плый в моли́твах предста́телю.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 3.

Си́ла Вы́шняго от ложе́сн ма́терних осени́ тя́, преподо́бне Ону́фрие, и показа́ тя́ селе́ние и жили́ще Свята́го Ду́ха, Его́же и а́з недосто́йный усе́рдно прия́ти жела́юще, пою́ пе́снь Бо́гу: Аллилу́иа.

И́кос 3.

Иму́ще тя́ вели́ка, о́тче, засту́пника и ско́раго в напа́стех помо́щника, разли́чными одержи́мии напа́стьми тя́ на по́мощь призыва́ем, и ве́село в твое́й све́тлой па́мяти торжеству́юще, сия́ тебе́ вопие́м:

Ра́дуйся, ско́рый послу́шателю моля́щихся тебе́ с ве́рою; ра́дуйся, пра́веднаго Судии́ изве́стное умоле́ние.

Ра́дуйся, честно́е Пресвята́го Ду́ха селе́ние; ра́дуйся, непоро́чный Пресвяты́я Тро́ицы служи́телю.

Ра́дуйся, предраги́й Христа́ Бо́га би́сере; ра́дуйся, неизрече́нная вели́кому Пафну́тию ра́досте.

Ра́дуйся, того́жде Пафну́тия наста́вниче и учи́телю; ра́дуйся, скорбя́щих ско́рое утеше́ние.

Ра́дуйся, уныва́ющих всежела́тельный посети́телю; ра́дуйся, слепы́х врачу́ и хромы́х цели́телю.

Ра́дуйся, боля́щих здра́вие и неду́гующих врачева́ние; ра́дуйся, ве́рных спасе́нное прибе́жище.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 4.

Бу́рю страсте́й многомяте́жнаго ми́ра возненави́девши, о́тче, все́х его́ устрани́лся еси́ красо́т, всели́вся же в пусты́ню, преподо́бне, Крести́телю в житии́ после́довал еси́ и проро́ка Илию́ подража́л еси́, ны́не же ве́чнующую в небе́сных дво́рех сла́ву получи́вши, с небе́сными Бо́гу предстои́ши жи́тели и пое́ши ку́пно с ни́ми: Аллилу́иа.

И́кос 4.

Светоно́сное со́лнце и златоза́рное свети́ло иму́ще тя́ ве́рнии, свя́те Ону́фрие, уми́льно тя́ мо́лим, просвети́, вразуми́, научи́ вопи́ти тебе́ си́це:

Ра́дуйся, пусты́ни све́тлое озаре́ние; ра́дуйся, златоза́рный ми́ра свети́льниче.

Ра́дуйся, Фиве́ев пречу́дная красото́; ра́дуйся, Ливи́и прекра́сная добро́то.

Ра́дуйся, Еги́пта пресве́тлое украше́ние; ра́дуйся, Месопота́мии превели́кий наста́вниче.

Ра́дуйся, Иоа́нна Крести́теля и́стинный и при́сный подража́телю; ра́дуйся, благово́нный пусты́ни ке́дре.

Ра́дуйся, я́ко равноа́нгельно слу́жиши Бо́гу; ра́дуйся, я́ко заступа́еши все́х, те́пле тя́ на по́мощь призыва́ющих.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 5.

Боготе́чную зарю́ уви́девши тя́, о́тче, в пусты́ни, вели́кий Пафну́тий тща́тельно после́дова тебе́, и я́ко учи́тельна свети́льника придержа́ся тебе́, и о пусты́нном любопы́тно испыта́в житии́, его́же от тебе́ до́бре навы́к, уми́льно воспева́я Бо́гу пе́снь: Аллилу́иа.

И́кос 5.

Ви́дя твое́ стра́нное житие́, Собо́р церко́вный, Ону́фрие преподо́бне, с благогове́нием твою́ блаже́нную па́мять вели́т почита́ти. Сего́ ра́ди и а́з, спасе́ние хотя́ получи́ти, с весе́лием почита́ю и си́це тебе́ вопию́:

Ра́дуйся, пресве́тлая красото́ Це́ркве Христо́вы; ра́дуйся, неусы́пный предста́телю и́щущим хода́тайства твоего́.

Ра́дуйся, я́ко к Го́споду вы́ну вопие́ши за ны́; ра́дуйся, я́ко тобо́ю просвети́шася вну́тренняя пусты́ни.

Ра́дуйся, я́ко просия́ша до́брая дела́ твоя́, а́ки со́лнце на земли́ и на небеси́; ра́дуйся, я́ко впери́л еси́ у́м тво́й к Бо́гу.

Ра́дуйся, я́ко обогати́лся еси́ нището́ю ду́ха; ра́дуйся, орле́ гнезда́ небе́снаго.

Ра́дуйся, пре́лести бесо́вския, я́ко тро́сть, попаля́ющий; ра́дуйся, послу́шателю Ева́нгелия Христо́ва.

Ра́дуйся, мудрова́ние пло́ти кре́постию Боже́ственнаго Ду́ха смири́вый; ра́дуйся, земны́й а́нгеле, небе́сный челове́че.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 6.

Про́поведи Ева́нгельския творца́, е́же не пещи́ся о ри́зе или́ что́ я́сти, и́стинна тя́, Ону́фрие, узре́ Влады́ка Госпо́дь и а́бие власы́ бе́лыми, я́ко оде́ждою, оде́я тя́ чу́дно, и сла́вою свы́ше обогати́л тя́ е́сть в преставле́нии твое́м; ю́же и на́м от Христа́ получи́ти моли́, вопию́щим Ему́: Аллилу́иа.

И́кос 6.

Возсия́л еси́ от Еги́пта, столпо́м Боже́ственнаго све́та наставля́ем, преподо́бне Ону́фрие, не терпя́ще же тя́ бесо́встии полцы́ в пусты́ни, бежа́ша; от и́хже наве́тов и на́с изба́ви моли́твами твои́ми, вопию́щих ти́ си́це:

Ра́дуйся, пре́лести бесо́вския потреби́телю; ра́дуйся, бесо́в стра́шный прогони́телю.

Ра́дуйся, главу́ зми́еву уязви́вый моли́твами твои́ми; ра́дуйся, дарова́ний Свята́го Ду́ха преиспо́лненный.

Ра́дуйся, ду́хи лука́вствия смиренному́дрием покори́вый; ра́дуйся, я́ко кре́ст тво́й на ра́ме поне́сл еси́.

Ра́дуйся, я́ко те́м амали́ка мы́сленнаго си́лу низложи́л еси́; ра́дуйся, я́ко бре́мя ле́гкое Христо́во восприя́л еси́ на ра́мо.

Ра́дуйся, я́ко от ю́ности возлюби́л еси́ и́го Христо́во; ра́дуйся, я́ко спасе́н от вра́жиих сете́й, благода́рственно Бо́гу вопие́ши.

Ра́дуйся, я́ко и ве́рным на враги́ мо́щно посо́бствуеши; ра́дуйся, я́ко те́пле к тебе́ притека́ющих треволне́ния страсте́й изменя́еши.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 7.

Изше́дшу Пафну́тию от оби́тели во вну́тренняя пусты́ни, е́же ви́дети Го́сподеви рабо́тающия, Бо́жиим смотре́нием узре́ тя стра́нным о́бразом и ужасе́ся; по глаго́лании же твое́м к нему́, позна́в тя́ бы́ти челове́ка, ве́рне и ди́вне Бо́гу рабо́тающа, возгласи́: Аллилу́иа.

И́кос 7.

Но́вый вои́стинну победоно́сец на плотски́я стра́сти яви́лся еси́, преподо́бне, и кто́ дово́лен воспе́ти боре́ния твоя́? Кто́ изочте́т труды́, боле́зни и по́двиги, в ни́хже тече́ние по́стничества соверши́л еси́? К си́х же похвале́нию недово́льни су́ще, любо́вию па́че почита́ем тя́ и ве́рно тебе́ сицева́я вопие́м:

Ра́дуйся, гла́дом и жа́ждею пло́ть твою́ удручи́вый; ра́дуйся, тьмы́ предста́теля всеконе́чно победи́вый.

Ра́дуйся, я́ко вся́ко сладостра́стие всено́щными бде́нии увяди́л еси́; ра́дуйся, я́ко зако́нно в моли́твах и поще́ниих претерпева́я, в безстра́стие обле́клся еси́.

Ра́дуйся, преди́вное воздержа́ния зерца́ло; ра́дуйся, преподо́бных ли́ку вели́кая сла́во.

Ра́дуйся, я́ко мра́зом померза́емей пло́ти твое́й, теплото́ю любве́ Христо́вы согрева́шеся ду́х тво́й; ра́дуйся, я́ко зно́ем опаля́ема тя́ роса́ Боже́ственныя благода́ти прохлажда́ше, преподо́бне.

Ра́дуйся, пусты́ни ле́пое украше́ние; ра́дуйся, по́двигов и соверше́нства о́бразе.

Ра́дуйся, я́ко вся́ку доброде́тель в тебе́ изобрази́л еси́; ра́дуйся, я́ко вселюби́мый подвигополо́жнику Христу́ уго́дник показа́лся еси́.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 8.

Стра́нное твое́ житие́ бы́сть, Ону́фрие: взира́я бо на возра́стшаго при пеще́ре твое́й фи́ника, воздержа́нием па́че пита́лся еси́. Сего́ ра́ди, улучи́в вы́шнюю трапе́зу, пое́ши Бо́гу: Аллилу́иа.

И́кос 8.

Ве́сь бы́л еси́ в вы́шних и горе́ о́ком твоея́ души́ взира́л еси́ непреста́нно в се́м стра́нном по́стничестве твое́м, ны́не же дерзнове́ние стяжа́в к Бо́гу, преподо́бне, заступа́еши все́х, на по́мощь тя́ призыва́ющих и вопию́щих ти́ си́це:

Ра́дуйся, пустынножи́телю вели́кий; ра́дуйся, а́ки звезда́, в пусты́нях просия́вый.

Ра́дуйся, подража́вый стопа́м Христо́вым от младе́нства твоего́; ра́дуйся, а́нгельскаго жития́ ревни́телю.

Ра́дуйся, наве́тов неви́димых вра́г прогони́телю; ра́дуйся, воздержа́ния чу́днаго показа́телю.

Ра́дуйся, соверше́нства преизя́щный учи́телю; ра́дуйся, стра́нный и ди́вный к небеси́ пу́ть показа́вый.

Ра́дуйся, я́ко равноа́нгельно на земли́ пожи́л еси́; ра́дуйся, я́ко равноа́нгельную сла́ву и че́сть досто́йно получи́л еси́.

Ра́дуйся, я́ко в небе́сных дво́рех ны́не о все́х мольбы́ Творцу́ прино́сиши; ра́дуйся, я́ко тебе́ хода́тая стяжа́вшим вели́кия благода́ти Бо́жия испроша́еши.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 9.

Вся́кое естество́ удиви́ся тебе́, Ону́фрие свя́те: ми́ра бо кра́сная от се́рдца возненави́дев и еди́наго Бо́га от души́ возлюби́в, пусты́ню пости́гл еси́. Иде́же в еди́нех то́кмо виде́ниих упражня́яся, яви́лся еси́ я́ко А́нгел, с пло́тию живы́й, поя́ Бо́гу: Аллилу́иа.

И́кос 9.

Вити́йстии язы́цы восхвали́ти тя́ по достоя́нию не мо́гут, о́тче богому́дре Ону́фрие: ты́ бо от утро́бы ма́терни Бо́гу прибли́зив тво́й смы́сл, весьма́ прилежа́л еси́ Царю́ Вседержи́телю, плоды́ досто́йны принося́ Ему́ от твои́х по́двиг во все́м житии́, преподо́бне. А́з у́бо от Це́ркве Бо́жия сла́вима тя́ о те́х уве́дев, ве́рно тебе́ сицева́я вопию́:

Ра́дуйся, от младе́нства мона́шескому обуче́нию вда́нный; ра́дуйся, в ю́ности Бо́жиим наставле́нием в пусты́нное безхра́мие введе́нный.

Ра́дуйся, я́ко Христо́вым словесе́м после́дуя, ми́ра, оте́чества же и ро́да отре́клся еси́; ра́дуйся, я́ко кре́ст тво́й ева́нгельски на ра́ме твое́м поне́сл еси́.

Ра́дуйся, небреги́й о ри́зе, да нетле́ния ри́зу себе́ самому́ соде́лаеши; ра́дуйся, се́явый слеза́ми, да с ра́достию рукоя́ти твоя́ по́жнеши.

Ра́дуйся, я́ко неяде́нием, ну́ждною нището́ю и всегда́шним на моли́тве стоя́нием пло́ть изнури́л еси́; ра́дуйся, я́ко пути́ же́стоки за словеса́ усте́н Го́спода твоего́ сохрани́л еси́.

Ра́дуйся, по́двиги твои́ми стра́сти теле́сныя до конца́ умертви́вый; ра́дуйся, равноа́нгельную чистоту́ сохрани́вый.

Ра́дуйся, я́ко многоле́тне а́ки безпло́тен пожи́л еси́; ра́дуйся, я́ко от Венцепода́теля безпло́тным лико́м ны́не счи́слился еси́.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 10.

Спасти́ся хотя́ще ве́рнии от напа́стей разли́чных, о́тче, предста́теля тя́ себе́ и побо́рника поставля́ют и не лиша́ются наде́жд свои́х: ты́ бо моли́твами к Бо́гу твои́ми от бе́д лю́тых и скорбе́й, одержа́щих ны́, и многоразли́чных злы́х изыма́еши, наставля́еши же на спасе́ния стези́ усе́рдно к тебе́ притека́ющия и Бо́гу ве́рно вопию́щия: Аллилу́иа.

И́кос 10.

Сте́ну тя́, засту́пника и моли́твенника те́пла обре́т, преподо́бне, из глубины́ се́рдца, я́ко благоуха́нное кади́ло, с воздыха́нием Бо́гу возсыла́ю хвалу́; тебе́ же, при́сному су́щу моли́твеннику, сицева́я приношу́ пе́ния:

Ра́дуйся, плодо́в доброде́тельных благопроцве́тшая ни́во; ра́дуйся, благоче́стия преизря́дное удобре́ние.

Ра́дуйся, земны́м засту́пниче кре́пкий; ра́дуйся, послу́шателю притека́ющим к тебе́ те́плый.

Ра́дуйся, свети́льниче, де́монский мра́к отрева́яй; ра́дуйся, душетле́нных неду́гов тьму́ отгоня́яй.

Ра́дуйся, я́ко заблужда́ющих преподо́бными нра́вы на пу́ть пра́вый руково́дствуеши; ра́дуйся, я́ко к исполне́нию Бо́жиих хоте́ний управля́еши.

Ра́дуйся, я́ко многоразли́чная благодея́ния тобо́ю свы́ше подае́ма быва́ют; ра́дуйся, я́ко духо́в зло́бных наве́ты от призыва́ющих тя́ бе́гают.

Ра́дуйся, я́ко все́х моле́ния дерзнове́нно Вы́шнему прино́сиши; ра́дуйся, я́ко все́х в ну́ждах и печа́лех защища́еши.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 11.

Пе́ние а́нгельское слы́шашеся в боже́ственнем преставле́нии твое́м, о́тче, святе́й бо и богоуго́днейшей души́ твое́й, в небе́сная селе́ния пресла́вно восходя́щей, си́лы небе́сныя дивля́хуся, пою́ще: Аллилу́иа.

И́кос 11.

Све́тло по преставле́нии лице́ твое́ ви́де, о́тче, Пафну́тий святы́й удиви́ся. Раздели́в же на две́ ча́сти ря́су свою́, покры́ мо́щи твоя́ и погребе́ тя со львы́ че́стно. Сия́ и а́з ду́хом благогове́йно почита́я, си́це ти́ вопию́:

Ра́дуйся, я́ко всего́ тебе́ Бо́гу освяти́л еси́; ра́дуйся, я́ко до́бре Боже́ственныя зако́ны соблю́л еси́.

Ра́дуйся, изше́ствие твое́ от жития́ проро́чески предве́девый; ра́дуйся, в те́плей к Бо́гу любви́ и благогове́нии многотру́дныя твоя́ по́двиги око́нчивый.

Ра́дуйся, в преставле́нии благоуха́нием чу́дным, а́ки ра́йским, почте́нный; ра́дуйся, мо́лнии тогда́ и блиста́нии ди́вно просла́вленный.

Ра́дуйся, его́же мо́щи а́нгельстии ли́цы с пе́нием, кади́лы и свеща́ми окружи́ша; ра́дуйся, ему́же го́рняя си́лы врата́ ра́йския отверзо́ша.

Ра́дуйся, я́ко в то́мже часе́ сия́ние ве́лие, облиста́вшее тя́, зря́шеся; ра́дуйся, я́ко сла́дкий гла́с, к восприя́тию ве́чных бла́г призыва́ющ тя́, слы́шашеся.

Ра́дуйся, я́ко святу́ю твою́ ду́шу венцеда́вец Христо́с сла́вно прия́т в го́рняя селе́ния; ра́дуйся, я́ко ны́не ве́чнаго изоби́льно наслажда́ешися весе́лия.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 12.

Благода́ть, да́нную ти́, и по́двиги твоя́ никто́же от земны́х изрещи́ мо́жет, о́тче Ону́фрие: в пусты́ни бо нестяжа́тельно жи́вый, пи́щу име́л еси́ хле́б а́нгельский, от челове́к бе́гая, с Бо́гом и А́нгелы бесе́довал еси́. Сего́ ра́ди в небе́сных черто́зех ра́дуешися и пое́ши пе́снь: Аллилу́иа.

И́кос 12.

Пое́м до́блественныя по́двиги твоя́, ублажа́ем достохва́льную кончи́ну, почита́ем и свяще́нную па́мять твою́, преподо́бне, к не́йже и я́ко еди́ному тебе́ от два́десяти четыре́х ста́рец, окружа́ющих Престо́л Вы́шняго, председя́щему похва́льная си́це вопие́м:

Ра́дуйся, стра́нно на земли́ пожи́вый; ра́дуйся, стра́нную и кончи́ну насле́дивый.

Ра́дуйся, я́ко све́тлыми по́двиги твои́ми к све́ту невече́рнему вше́л еси́; ра́дуйся, я́ко преми́рное насле́дие бога́тно стяжа́л еси́.

Ра́дуйся, я́ко с безпло́тными Трисвяту́ю пе́снь Бо́гу немо́лчно вопие́ши; ра́дуйся, неизрече́нных бла́г насле́дниче.

Ра́дуйся, преподо́бных и пра́ведных собесе́дниче; ра́дуйся, я́ко ны́не разре́шшимся зерца́лом Тро́ицу Святу́ю зри́ши непосре́дственно.

Ра́дуйся, я́ко в па́мяти твое́й Це́рковь Христо́ву весели́ши неизрече́нно; ра́дуйся, я́ко тобо́ю по́стницы и пустынножи́тели в по́двиг укрепля́ются.

Ра́дуйся, я́ко ве́рнии хода́тайством твои́м все́х бла́г свы́ше сподобля́ются.

Ра́дуйся, о́тче Ону́фрие, пресве́тлый свети́льниче всея́ вселе́нныя.

Конда́к 13.

О всехва́льный и преди́вный уго́дниче Христо́в о́тче Ону́фрие, молю́ ти ся и вопию́ всеусе́рдно: приими́ сие́ ма́лое, от мене́ приноси́мое моле́ние и потщи́ся ско́ро умоли́ти ми́лостиваго Бо́га и Влады́ку, да изба́вит мя́ от вся́ких бе́д и бу́дущия и́змет му́ки, вопию́щаго: Аллилу́иа.

Этот конда́к читается трижды, затем и́кос 1-й и конда́к 1-й.

Моли́тва пе́рвая.

О преизя́щный и превели́кий пустынножи́телю, преподо́бне о́тче Ону́фрие! Похваля́ю твоя́ неизрече́нная чудотворе́ния и житие́ пресве́тло, е́же еси́ препроводи́л от ю́ности твоея́, да́же и до ста́рости: никто́же бо исчести́ возмо́же терпе́ния и по́двигов твои́х, прече́стне. Удиви́ся преподо́бный Пафну́тий твоему́ жесто́кому е́же в пусты́ни житию́, вку́пе же и зело́ возра́довася, обре́т тя́ еди́наго толи́ких по́двигов и соверше́нства су́ща о́браз. Сего́ ра́ди и по́длинно испыта́ о труде́х твои́х святы́х и о е́же коли́ко име́л еси́ вре́меннаго жития́. Те́мже и написа́, я́ко шестьдеся́т ле́т и три́ в трудолю́бии пребыва́я, в наготе́ претерпева́я мра́з и зно́й, в глубо́цей пусты́не со зверьми́ и пти́цы обита́я, моли́твы непреста́нно творя́, пожи́л еси́. Сего́ ра́ди ны́не ра́дость тебе́ приношу́ от недосто́йных усте́н мои́х, преподо́бне о́тче, преподо́бному Пафну́тию ра́досте вели́кая (сподо́бися бо при кончи́не с львы́ послужи́ти тебе́, погребсти́ те́ло твое́ и с тобо́ю на небеси́ жи́ти), Илии́ Фесви́тянину ревни́телю, Иоа́нну Крести́телю насле́дниче, дру́же Христо́в и снасле́дниче и́стинный, Еги́пту у́мная красото́, Фиве́ом вели́кое свети́ло, Ливи́и кра́сная добро́то, фи́никс краснопроцвета́ющий, орле́ высокопа́рный, лета́ющий в поднебе́сная, на небесе́х гражда́нство обреты́й, иде́же и водвори́ся у Престо́ла Влады́ки Сла́вы, с два́десять четы́рми ста́рцы жили́ще обреты́й, с ни́ми же и пребыва́еши. И ны́не молю́ тя́, пречу́дный граждани́не небе́сный, святы́х лико́в А́нгельских совсе́льниче, услы́ши мя́, гре́шнаго и недосто́йнаго раба́ твоего́, в ча́с се́й и приими́ сие́ ма́лое моле́ние мое́ Ака́фистово, вели́кий засту́пниче, ско́рый помо́щниче притека́ющим к тебе́ усе́рдно. Загла́ди рукописа́ние де́л мои́х скве́рных и нечи́стых, я́же держа́т де́монския полки́. Покры́й мя́ твои́м заступле́нием, причти́ мя ко угото́ванному пресве́тлому ме́сту моли́твами твои́ми и сподо́би мя́ вы́шняго Иерусали́ма, и́бо по Преблагослове́нней Влады́чице на́шей Богоро́дице и Присноде́ве Мари́и, тебе́ между́ тепле́йшими помо́щницы, моле́бницы и засту́пницы мои́ми почита́ю. Присеща́еши бо и дае́ши ру́ку по́мощи припа́дающим к тебе́ в хра́ме твое́м и повсю́ду. Те́м же и а́з недосто́йный ны́не тебе́ молю́ся и призыва́ю: умоли́ ми́лостиваго Бо́га, да отпу́стит ми́ вся́ прегреше́ния моя́, во́льная и нево́льная, сотворе́нная вся́ зла́я дела́ моя́, и да изба́вит мя́ твои́м предста́тельством от ве́чных му́к, научи́т мя́ твори́ти до́брая дела́, наста́вит мя́ на пу́ть к спасе́нию и́стинному и сподо́бит мя́ ку́пно ра́дости ве́чныя наслади́тися со все́ми святы́ми, ны́не и при́сно, и во ве́ки веко́в, ами́нь.

Моли́тва втора́я.

О пречу́дне и преблаже́нне уго́дниче Христо́в и а́вво на́ш, Ону́фрие Вели́кий! Ты́ ди́вную любо́вь ко Го́споду твоему́ показа́л еси́, и на ди́вныя по́двиги благода́тию Его́ укрепи́лся еси́, и сего́ ра́ди ве́лия дерзнове́ния к Нему́ сподо́бился еси́: мно́га бо чудеса́ и зна́мения си́лы Бо́жия лю́дем о тебе́ яви́шася. Воззри́ у́бо и ны́не, о́тче преди́вный, благосе́рдым о́ком любве́ твоея́ на ны́ недосто́йныя рабы́, и да́руй все́м по коего́ждо потре́бе, по ве́ре же и упова́нию: скорбя́щыя обра́дуй, пла́чущыя уте́ши, неду́гующия исцели́, тружда́ющымся помози́, борю́щыяся со страстьми́ и прило́ги вра́жиими укрепи́ и благослови́, изнемога́ющыя поддержи́, оби́тель твою́ и все́х на́с от вра́г ви́димых и от вся́каго зла́ сохрани́. Возвели́чи ве́ру святу́ю правосла́вную во оте́чествии на́шем, обрати́ заблу́ждшыя, вразуми́ отпа́дшыя, утверди́ коле́блющыяся, умягчи́ упо́рствующыя, просвети́ неве́рныя, и вся́ приведи́ в ти́хое приста́нище Оте́чествия Небе́снаго. О преди́вное сло́во мона́шествующих и все́х ве́рных утеше́ние! сла́вными по́двиги твои́ми и сла́дким лицезре́нием чудотво́рнаго о́браза твоего́ и на́с озари́ и на вся́к по́двиг, тру́д и терпе́ние укрепи́ во сла́ву И́мени Бо́жия, да спасе́ннии сподо́бимся с тобо́ю и все́ми святы́ми Ве́чнаго и Преблагослове́ннаго Ца́рствия сла́вы Отца́, и Сы́на, и Свята́го Ду́ха во ве́ки веко́в. Ами́нь.

Моли́тва тре́тия.

О преподо́бне о́тче Ону́фрие! Мо́лим тя́: услы́ши на́с, гре́шных и недосто́йных ра́б Бо́жиих (имена́), в ча́с се́й. И приими́ сие́ ма́лое моле́ние на́ше: рукописа́ние де́л на́ших скве́рных и нечи́стых моли́твою твое́ю изгла́ди, твои́м заступле́нием при́сно на́с покрыва́й и ко угото́ванному ве́рным пресве́тлому черто́гу моли́твами твои́ми приведи́; умоли́ у́бо Ми́лостиваго Бо́га, да отпу́стит на́м вся́ прегреше́ния на́ша во́льная и нево́льная и вся́ зла́я дела́, на́ми сотворе́нныя, и да изба́вит на́с твои́м предста́тельством от ве́чных му́к и сподо́бит на́с ра́дости ве́чныя наслади́тися, ку́пно со все́ми святы́ми, во ве́ки веко́в. Ами́нь.