Конда́к 1.

Избра́нней Бо́гом от язы́ческаго ро́да, прему́дрой неве́сте Христо́вой, гра́да Антиохи́и засту́пнице небе́сней, благода́рственная воспису́ем ти́, моли́твенницы твои́, свята́я и многострада́льная великому́ченице Мари́но. Ты́ же, иму́щи дерзнове́ние ко Го́споду, от вся́ких бе́д, зо́л и боле́зней свобожда́й на́с, с любо́вию зову́щих:

Ра́дуйся, великому́ченице Мари́но, неве́сто Христо́ва всехва́льная.

И́кос 1.

А́нгелов Творе́ц, ве́дый благо́е произволе́ние твое́, свята́я му́ченице, яви́ тя́ за ве́ру Христо́ву непобеди́му страстоте́рпицу. Ты́ бо добро́тою телесе́ и красото́ю души́ просия́ла еси́ в дому́ отца́ твоего́ идолослужи́теля, оба́че, све́том благода́ти просвеще́нная, ве́ру и́стинную позна́ла еси́, оте́ческое нече́стие отри́нувши. Мы́ же, дивя́щеся таково́му о тебе́ Бо́жию смотре́нию, во умиле́нии серде́ц зове́м ти́:

Ра́дуйся, отрокови́це, Бо́гом избра́нная; ра́дуйся, от ю́ности доброде́тельным житие́м украше́нная.

Ра́дуйся, измла́да суету́ жи́зни земны́я презре́вшая; ра́дуйся, и́стинную му́дрость возлюби́вшая.

Ра́дуйся, кри́не де́вства, посреде́ те́рния язы́ческаго возраще́нная; ра́дуйся, от ма́лых ле́т благода́тию свы́ше осене́нная.

Ра́дуйся, свято́е целому́дрие и де́вство до́бре сохрани́вшая; ра́дуйся, во о́браз христиа́нским де́вам свы́ше пронарече́нная.

Ра́дуйся, Христа́ все́м се́рдцем возлюби́вшая; ра́дуйся, во́льная страда́ния за и́мя Его́ претерпе́вшая.

Ра́дуйся, Це́ркве Правосла́вныя пресве́тлое украше́ние; ра́дуйся, я́ко и́мя твое́ во все́м ми́ре христиа́нстем прославля́ется.

Ра́дуйся, великому́ченице Мари́но, неве́сто Христо́ва всехва́льная.

Конда́к 2.

Ви́дя благоле́пие лица́ твоего́, лю́дие дивля́хуся, не ве́дяще красоты́ души́ твое́й. Ты́ же, свята́я де́во, ми́ра многомяте́жие отве́ргши, к го́рнему возвела́ еси́ у́м тво́й и возжеле́ла еси́ венце́м му́ченическим украси́тися от возлю́бленнаго тобо́ю Жениха́ Христа́, воспева́ющи Ему́ ра́достно пе́снь: Аллилу́ия.

И́кос 2.

Ра́зум тво́й, не просвеще́н еще́ святы́м креще́нием, свята́я Мари́но, просвети́ Госпо́дь, науча́я тя́ сла́вити Еди́наго и И́стиннаго Бо́га, нечести́вый же роди́тель тво́й отрече́ся от тебе́, но не возмо́же отто́ргнути от ве́ры и́стинныя, в не́йже ты́ непоколеби́ма пребыва́ла еси́. Те́мже и на́с в доброде́телех ве́ры и любве́ укрепи́, зову́щих ти́:

Ра́дуйся, нра́в а́нгельский от младе́нчества стяжа́вшая; ра́дуйся, от ю́ности всю́ себе́ Бо́гу преда́вшая.

Ра́дуйся, благоуха́ние доброде́телей от ю́ности возлюби́вшая; ра́дуйся, красото́ю души́ и телесе́ мно́гих удиви́вшая.

Ра́дуйся, де́вственнице, ю́ным де́вам незри́мая помо́щнице; ра́дуйся, ро́да христиа́нскаго украше́ние.

Ра́дуйся, и́стины Ца́рствия Бо́жия уразуме́вшая; ра́дуйся, свы́ше избра́нная на по́двиг испове́дания Христа́.

Ра́дуйся, благоче́стие в себе́ воспита́вшая; ра́дуйся, и́дольскаго служе́ния пре́лесть обличи́вшая.

Ра́дуйся, блаже́нная, земны́м отце́м за ве́ру Христо́ву гони́мая; ра́дуйся, Небе́снаго Отца́ дщи́ честна́я.

Ра́дуйся, великому́ченице Мари́но, неве́сто Христо́ва всехва́льная.

Конда́к 3.

Си́лою свы́ше препоя́санная, возмогла́ еси́ победи́ти искуше́ние, егда́ гони́тель христиа́н епа́рх Оли́мврий удиви́ся красоте́ твое́й и возжела́ взята́ тя́ в жены́, словесы́ ласка́тельными убежда́я тя́ принести́ же́ртву и́долом. Ты́ же, сла́ву ми́ра сего́ презре́вши, испове́дала еси́ себе́ христиа́нку и отве́ргла еси́ жениха́ земна́го, Жениха́ безсме́ртнаго, Жизнода́вца Христа́, взыску́ющи. Таково́му дерзнове́нию твоему́ дивя́щеся, воспое́м укрепи́вшему тя́ Го́споду пе́снь: Аллилу́ия.

И́кос 3.

Иму́щи в се́рдце свое́м тве́рдую ве́ру во Христа́, я́ко овча́ на заколе́ние, привела́ся еси́ мучи́тельскому суди́щу, Мари́но пресла́вная, иде́же дерзнове́нно Вседержи́теля все́х Бо́га пропове́дала еси́ пред наро́дом и, си́лою Боже́ственною укрепля́ема, суде́й нечести́вых посрами́ла еси́. Приими́ у́бо от любве́ на́шея приноси́мыя тебе́ похвалы́:

Ра́дуйся, многобо́жия ле́сть обличи́вшая; ра́дуйся, и́стинныя ве́ры побо́рнице.

Ра́дуйся, от ю́ности идолослуже́ние презре́вшая; ра́дуйся, и́стинное богопочита́ние да́же до сме́рти возлюби́вшая.

Ра́дуйся, кроме́ Небе́снаго ино́го жениха́ зна́ти не восхоте́вшая; ра́дуйся, соблю́дшая чистоту́ де́вства твоего́.

Ра́дуйся, за́мыслы мучи́теля твоего́ Оли́мврия разсе́явшая; ра́дуйся, гне́ва его́ не убоя́вшаяся.

Ра́дуйся, голуби́це кро́ткая и страда́лице Христа́ ра́ди; ра́дуйся, Сы́ном Бо́жиим призва́нная в чу́дный све́т ве́ры и благода́ти Его́.

Ра́дуйся, доброде́тельным житие́м свои́м сосу́д Ду́ха Свята́го соде́лавшаяся; ра́дуйся, звездо́ светоза́рная, во Антиохи́и Бо́гом возжже́нная.

Ра́дуйся, великому́ченице Мари́но, неве́сто Христо́ва всехва́льная.

Конда́к 4.

Бу́рею я́рости одержи́м, безу́мный мучи́тель повеле́ те́ло твое́ лю́тым му́кам преда́ти, тогда́ ору́жие врага́ изнемо́же и кровьми́ твои́ми земля́ освяти́ся. Ты́ же, до́блественне претерпе́вши му́ки злы́я, взира́ющи на воздая́ние бу́дущее и возмога́ющи вся́ о Го́споде, со умиле́нием взыва́ла еси́ укрепи́вшему тя́ Христу́ Бо́гу: Аллилу́ия.

И́кос 4.

Слы́шав от тебе́ нечести́вый мучи́тель му́жественное испове́дание ве́ры Христо́вы, заключи́ тя́ в темни́цу, иде́же са́м кня́зь тьмы́ во о́бразе зми́я яви́ся, хотя́ устраши́ти тя́. Ты́ же, де́во чи́стая, непобеди́мою си́лою Креста́ укрепля́емая, ополче́ние самаго́ диа́вола отрази́ла еси́ и благода́ть прия́ла еси́ отгоня́ти ду́хи нечи́стыя и си́лу вра́жию сокруша́ти. Сего́ ра́ди и мы́, слы́шавше, ка́ко посрами́ся диа́вол, от де́вы побежда́ем, ра́достно вопие́м ти́ си́це:

Ра́дуйся, непра́ведному суди́щи дерзнове́нно предста́вшая; ра́дуйся, христиа́нку себе́ испове́давшая.

Ра́дуйся, всемо́щную си́лу благода́ти Христо́вы позна́вшая; ра́дуйся, зло́бы неве́рных не устраши́вшаяся.

Ра́дуйся, свята́я де́во, мучи́телей свои́х посрами́вшая; ра́дуйся, па́че си́льных муже́й крепча́йшая.

Ра́дуйся, темни́чное заключе́ние Христа́ ра́ди претерпе́вшая; ра́дуйся, си́лою Креста́ главу́ диа́вола сокруши́вшая.

Ра́дуйся, во пло́ти су́щи, безпло́тнаго врага́ попра́вшая; ра́дуйся, ко́зней диа́вола победи́тельнице.

Ра́дуйся, и́стинная Христо́вых Страсте́й прича́стнице; ра́дуйся, я́ко мзда́ твоя́ мно́га на Небесе́х.

Ра́дуйся, великому́ченице Мари́но, неве́сто Христо́ва всехва́льная.

Конда́к 5.

Боготе́чней звезде́ подо́бна была́ еси́, Мари́но, егда́, в темни́це заключе́нная, лику́ющи славосло́вила еси́ Христа́, Жениха́ своего́. Сего́ ра́ди удосто́и тя́ Госпо́дь ди́внаго виде́ния Креста́ и голуби́цы и исцели́ тя́ от все́х ра́н, ра́дость да́руя и на но́вый по́двиг укрепля́я. Те́мже мо́лим: уврачу́й ра́ны грехо́вныя все́х любо́вию чту́щих тя́ и воспева́ющих Бо́гу: Аллилу́ия.

И́кос 5.

Ви́дя епа́рх Оли́мврий святу́ю Мари́ну, изведе́ну из темни́цы, здра́ву и све́тлу, разъяри́ся зло́бою и па́ки предаде́ ю́ на му́ки, повеле́в пригвозди́ти на дре́ве и свеща́ми горя́щими пали́ти те́ло ея́. Оба́че о́гнь веще́ственный не возмо́же изнури́ти тя́, свята́я отрокови́це, огне́м бо любве́ Боже́ственныя озаря́ема и трие́м отроко́м подо́бящися, попра́ла еси́ о́гнь се́й. Те́мже нестерпи́маго огня́ ве́чнаго изба́ви все́х чту́щих тя́ и воспева́ющих та́ко:

Ра́дуйся, кро́вию свое́ю торжество́ ве́ры и́стинныя утверди́вшая; ра́дуйся, я́ко Са́м Госпо́дь свы́ше призре́ на твоя́ страда́ния.

Ра́дуйся, в темни́це ди́внаго виде́ния сподо́бившаяся; ра́дуйся, честны́й Кре́ст Го́спода твоего́ узре́вшая.

Ра́дуйся, я́звы Христо́вы на те́ле твое́м носи́вшая; ра́дуйся, от все́х я́зв те́х Го́сподем исцеле́нная.

Ра́дуйся, на по́двиг му́ченичества свы́ше укрепле́нная; ра́дуйся, Боже́ственным све́том осия́нная.

Ра́дуйся, огне́м земны́м Христа́ ра́ди опале́нная; ра́дуйся, Боже́ственным огне́м се́рдца на́ша возжига́ющая.

Ра́дуйся, велиа́ра лю́таго победи́вшая; ра́дуйся, я́ко си́лы а́дския трепе́щут сла́вы твоея́.

Ра́дуйся, великому́ченице Мари́но, неве́сто Христо́ва всехва́льная.

Конда́к 6.

Пропове́дница чуде́с и сла́вы Бо́жия яви́лася еси́, великому́ченице Мари́но, егда́ вве́рже тя́ в во́ду мучи́тель, повеле́в утопи́ти тя́ свя́зану. Тогда́ дарова́ Госпо́дь зна́мение всему́ наро́ду: возсия́ над главо́ю му́ченицы све́т несказа́нный, яви́ся сто́лп о́гненный с кресто́м и бе́лая голуби́ца с венце́м златы́м. И бы́сть гла́с свы́ше, глаго́ляй: ми́р тебе́, неве́сто Христо́ва Мари́но, ны́не же прии́меши вене́ц неувяда́емый от руки́ Госпо́дни и почие́ши в Ца́рствии Небе́снем. Сего́ ра́ди мы́ прославля́ем Бо́га, да́вшаго тебе́ благода́ть такову́ю, и пое́м Ему́: Аллилу́ия.

И́кос 6.

Возсия́ла еси́, я́ко светоза́рная звезда́, и Боже́ственною благода́тию отгна́ла еси́ многобо́жия тьму́, свята́я Мари́но, просвети́вши мно́гия лю́ди, и́же ви́деша чудеса́ Бо́жия, на тебе́ явле́нная; тогда́ вели́кое мно́жество муже́й и же́н уве́роваша во Христа́ и му́ченическую кончи́ну прия́ша, крестя́щеся кро́вию свое́ю. Просвети́ и на́с, о Мари́но, омраче́нных мгло́ю грехо́вною, и све́том невече́рним озари́ тя́ сла́вящих и пою́щих ти́ такова́я:

Ра́дуйся, в страда́ниих, я́ко зла́то в горни́ле, очи́стившаяся; ра́дуйся, тверде́йшая адама́нта в терпе́нии твое́м показа́вшаяся.

Ра́дуйся, язы́ческое служе́ние попра́вшая; ра́дуйся, си́лу Бо́жию пред нечести́выми пропове́довавшая.

Ра́дуйся, све́том Боже́ственным ду́ши собра́вшихся озари́вшая; ра́дуйся, к ве́ре и́стинней мно́гих приве́дшая.

Ра́дуйся, преди́вная побо́рнице ве́ры Христо́вы; ра́дуйся, путево́дная звездо́ все́м и́щущим спасе́ния.

Ра́дуйся, страда́нии свои́ми ко Христу́ люде́й возводя́щая; ра́дуйся, чуде́с Его́ пропове́днице.

Ра́дуйся, огне́м ре́вности по сла́ве Бо́жией горе́вшая; ра́дуйся, непоро́чная голуби́це, возлете́вшая в Небе́сныя оби́тели.

Ра́дуйся, великому́ченице Мари́но, неве́сто Христо́ва всехва́льная.

Конда́к 7.

Хотя́щим на́м просла́вите по́двиги твоя́ и чудеса́, великому́ченице пресла́вная, воспомина́ем слова́ псалмопе́вца, и́же дре́вле, Ду́хом Госпо́дним озаре́нный, проро́чески поя́ше: проидо́хом сквозе́ о́гнь и во́ду, и изве́л еси́ ны́ в поко́й. Ты́ же, свята́я Мари́но, де́лом сие́ испо́лнила еси́, я́ко огне́м и водо́ю искуше́на была́ еси́, и, врага́ неви́димаго порази́вши, вошла́ еси́ в черто́г Небе́сный со Христо́м, Женихо́м твои́м, пою́щи Ему́: Аллилу́ия.

И́кос 7.

Я́ко но́вое свети́ло на тве́рди небе́сней, возсия́ла еси́ всему́ христиа́нскому ро́ду, свята́я страда́лице Мари́но, егда́, во главу́ усече́нная, ду́шу свою́ предала́ еси́ Христу́, Жениху́ твоему́. Те́мже мы́, благогове́йне воспомина́юще страда́ния и по́двиги твоя́, с любо́вию зове́м ти́ си́це:

Ра́дуйся, ве́ру, наде́жду и любо́вь до конца́ сохрани́вшая; ра́дуйся, сме́рти теле́сныя не устраши́вшаяся.

Ра́дуйся, ра́достно за Главу́ Це́ркве, Христа́, под ме́ч главу́ свою́ приклони́вшая; ра́дуйся, вене́ц сла́вы из ру́к Го́спода прия́вшая.

Ра́дуйся, я́ко, муче́ния твоя́ зря́ще, мно́жество люде́й к Бо́гу обрати́шася; ра́дуйся, твоя́ бо кончи́на просвети́ умы́ помраче́нныя.

Ра́дуйся, сквозе́ о́гнь и во́ду муче́ний в поко́й небе́сный вше́дшая; ра́дуйся, стру́й ми́лости ве́рным излива́ющая.

Ра́дуйся, во успе́нии твое́м мно́гая и вели́кая чудеса́ сотво́ршая; ра́дуйся, цве́том неувяда́емым украше́нная на Небеси́.

Ра́дуйся, прему́драя ева́нгельская де́во, свети́льник горя́щий иму́щая; ра́дуйся, к му́ченическому во́инству сопричте́нная.

Ра́дуйся, великому́ченице Мари́но, неве́сто Христо́ва всехва́льная.

Конда́к 8.

Стра́нствие земно́е соверши́вши и пу́ть му́ченический проше́дши, страстоте́рпице свята́я Мари́но, водвори́лася еси́ в Ца́рстве Све́та, оба́че лю́ди, с любо́вию тебе́ моля́щияся, не оста́вила еси́, прия́ла бо еси́ благода́ть побежда́ти врага́ ро́да челове́ческаго и мно́гия неду́ги ду́ш и теле́с на́ших врачева́ти. Те́мже благода́рно тя́ сла́вим и Бо́гу, тя́ возвели́чившему, пое́м а́нгельскую пе́снь: Аллилу́ия.

И́кос 8.

Вся́ Небе́сныя си́лы возра́довашася, воспева́юще Бо́га, дарова́вшаго тебе́, свята́я Мари́но, таково́е му́жество и непоколеби́мую тве́рдость во испове́дании ве́ры Христо́вы. Те́м и по сме́рти честно́е те́ло твое́, нетле́нно сохране́нное, положе́но бы́сть Бо́жиим изволе́нием во гра́де Антиохи́и, источа́юще оби́лие чуде́с с ве́рою к твоему́ заступле́нию прибега́ющим и моли́твенно тебе́ взыва́ющим:

Ра́дуйся, нетле́нием моще́й сла́вно от Бо́га возвели́ченная; ра́дуйся, я́ко моще́й твои́х де́мони трепе́щут.

Ра́дуйся, я́ко честны́я мо́щи твоя́ во гра́де Антиохи́и мно́гими чудесы́ просла́вишася; ра́дуйся, те́ми бо и вели́кий Царьгра́д освяти́ся.

Ра́дуйся, я́ко честны́я мо́щи твоя́ доны́не Госпо́дь сохрани́ в земли́ Итали́йстей; ра́дуйся, я́ко благоволи́ Бо́г пренести́ десни́цу твою́ на Святу́ю Го́ру Афо́нскую.

Ра́дуйся, все́х правосла́вных христиа́н засту́пнице; ра́дуйся, ра́дости на́м и благода́ти ве́чныя хода́таице.

Ра́дуйся, пресла́вная чудотво́рице; ра́дуйся, огне́м моли́твы стре́лы вра́жия попаля́ющая.

Ра́дуйся, беды́ и печа́ли от лю́бящих тя́ отгоня́ющая; ра́дуйся, все́м призыва́ющим тя́ ско́рую по́мощь подаю́щая.

Ра́дуйся, великому́ченице Мари́но, неве́сто Христо́ва всехва́льная.

Конда́к 9.

Вси́ правове́рнии лю́дие росси́йстии пропове́дуют благода́тную твою́ по́мощь стране́ на́шей, от ле́т бо дре́вних и до ны́не отцы́ и ма́тери нарека́ют и́менем твои́м дще́рей свои́х, и ли́ка твоего́ изображе́ния чудесы́ просла́вишася в це́рквах на́ших. Те́мже тя́ по до́лгу ублажа́юще, пое́м тобо́ю чудоде́йствующему Бо́гу: Аллилу́ия.

И́кос 9.

Вети́и ми́ра сего́ не возмо́гут по достоя́нию восхвали́ти страда́ния и доброде́тели твоя́, великому́ченице Мари́но. Те́мже и мы́, недосто́йнии, воспе́ти жела́юще Влады́ку и Жизнода́вца, да́вшаго тебе́ кре́пость сама́го диа́вола не убоя́тися и мучи́телей победи́ти, мо́лим тя́, при́зри на сие́ воздыха́ние серде́ц на́ших и неотсту́пна бу́ди на́м помо́щница, вся́ блага́я да́рующи предста́тельством твои́м все́м пою́щим тебе́ та́ко:

Ра́дуйся, де́во, ра́йскою красото́ю сия́ющая; ра́дуйся, ли́лие благоуха́нная, благода́тию Бо́жиею возраще́нная.

Ра́дуйся, страстоте́рпице, вся́ у́зы и се́ти врага́ растерза́вшая; ра́дуйся, ма́слино благопло́дная, еле́й ми́лости оби́льно на́м источа́ющая.

Ра́дуйся, хра́ме непоро́чности и чистоты́; ра́дуйся, о спасе́нии гре́шных те́плая хода́таице у Отца́ Небе́снаго.

Ра́дуйся, су́щим в темни́цах и у́зах уте́шительнице; ра́дуйся, лю́дем, за Христа́ пострада́вшим, пу́ть к Не́бу показа́вшая.

Ра́дуйся, на ду́хи нечи́стыя вла́сть от Го́спода прие́мшая; ра́дуйся, в напа́стех вра́жиих ко Христу́ Бо́гу прибега́ти на́с науча́ющая.

Ра́дуйся, неду́гов лю́тых прогони́тельнице; ра́дуйся, боле́зней неисце́льных цели́тельнице.

Ра́дуйся, великому́ченице Мари́но, неве́сто Христо́ва всехва́льная.

Конда́к 10.

Спасти́ хотя́ все́х, благоизво́ли Госпо́дь святы́я мо́щи твоя́, великому́ченице Мари́но, сохрани́ти во утеше́ние все́м ве́рным, я́ко, от Восто́ка возсия́вши, ны́не в страна́х За́пада просвеща́еши все́х чту́щих тя́ и припа́дающих к цельбоно́сным моще́м твои́м, да твои́ми чудесы́ и моли́твами пробужда́ются лю́дие от жи́зни грехо́вныя к жи́зни святе́й, воспева́юще Творцу́ своему́ и Бо́гу: Аллилу́ия.

И́кос 10.

Стено́ю моли́тв твои́х, великому́ченице Мари́но, сохраня́й страну́ на́шу Росси́йскую, и вся́ ве́рныя, в не́й живу́щия и подвиза́ющияся, путе́м пра́вым во Ца́рствие Небе́сное руководи́, зане́ даде́ся тебе́ благода́ть моли́тися о лю́дех правосла́вных не то́кмо зе́мли Гре́ческия, но и во все́х страна́х христиа́нских. Сего́ ра́ди и от на́с с любо́вию приноси́мое благода́рное славосло́вие приими́:

Ра́дуйся, я́ко тобо́ю и́мя Христо́во в ми́ре прославля́ется; ра́дуйся, я́ко тобо́ю ве́рнии бла́г ве́чных сподобля́ются.

Ра́дуйся, се́ бо А́нгели с тобо́ю лику́ют на Небеси́; ра́дуйся, я́ко и челове́цы восхваля́ют тя́ на земли́.

Ра́дуйся, все́х правосла́вных на пу́ть спасе́ния направля́ющая; ра́дуйся, гре́шных на покая́ние наставля́ющая.

Ра́дуйся, от люде́й росси́йских с любо́вию прославля́емая; ра́дуйся, о стране́ на́шей пред Бо́гом и Пресвято́ю Богоро́дицею хода́таице.

Ра́дуйся, де́вам и жена́м росси́йским помо́щнице ми́лостивая богодарова́нная; ра́дуйся, о все́х лю́дех земли́ на́шея моли́твеннице усе́рдная.

Ра́дуйся, лю́бящим тя́ свято́ю любо́вию воздаю́щая; ра́дуйся, с Цари́цею Небесе́ и земли́ о все́м ми́ре моля́щаяся.

Ра́дуйся, великому́ченице Мари́но, неве́сто Христо́ва всехва́льная.

Конда́к 11.

Пе́ние Еди́ному и И́стинному Бо́гу принесла́ еси́, Мари́но, не то́чию сло́вом, но во́льным себе́ в же́ртву принесе́нием; подража́ющи бо распя́тому за ны́ Христу́, положи́ла еси́ ду́шу свою́ за ве́ру и́стинную и возлете́ла еси́, я́ко голуби́ца, во оби́тели Небе́сныя крила́ми чистоты́ и любве́ Боже́ственныя. Ны́не же со А́нгелы и все́ми святы́ми ра́дующися, воспева́еши Человеколю́бцу Бо́гу побе́дную пе́снь: Аллилу́ия.

И́кос 11.

Возсия́вши на́м, я́ко звезда́ многосве́тлая, мра́к де́монский твои́ми моли́твами отгоня́еши, свята́я великому́ченице Мари́но; те́мже мо́лим ти́ ся́: омраче́нная страстьми́ сердца́ на́ша просвети́ и благода́ть Боже́ственную пода́ждь, испроси́ на́м грехо́в оставле́ние у Всеми́лостиваго Бо́га, я́ко да ве́рою, ра́достию духо́вною и любо́вию зове́м ти́:

Ра́дуйся, Це́ркве Христо́вы пресве́тлая звездо́; ра́дуйся, свети́льниче, ми́р озаря́яй.

Ра́дуйся, в немерца́ющем све́те душе́ю пребыва́ющая; ра́дуйся, я́ко па́че луче́й со́лнечных благода́тию просия́ла еси́.

Ра́дуйся, я́ко све́том невеще́ственным ду́ши просвеща́еши; ра́дуйся, я́ко заблу́ждших на пу́ть и́стины наставля́еши.

Ра́дуйся, пред Престо́лом Госпо́дним лампа́до неугаси́мая; ра́дуйся, озари́вшая всю́ вселе́нную све́том по́двига твоего́.

Ра́дуйся, всесве́тлая, благода́тию, я́ко ри́зою све́та, облече́нная; ра́дуйся, Трисия́нным све́том озаре́нная.

Ра́дуйся, свеще́, Бо́гом возжже́нная; ра́дуйся, я́ко зри́ши ны́не све́т неизрече́нный.

Ра́дуйся, великому́ченице Мари́но, неве́сто Христо́ва всехва́льная.

Конда́к 12.

Благода́тию исполня́ется оби́тель Ватопе́дская, иму́щи сокро́вище неоску́дное, десни́цу твою́, великому́ченице Мари́но, от нея́же ми́ро Боже́ственное исцеле́ний ми́ру источа́ется, и отгоня́ются де́монстии полцы́ призыва́вшем и́мене твоего́ свята́го. Те́мже и на́с, па́мять твою́ све́тло пра́зднующих, благода́ти испо́лни моли́твами твои́ми, да воспое́м вку́пе со святого́рцы чуде́с пода́телю Бо́гу: Аллилу́ия.

И́кос 12.

Пою́ще Бо́га, ди́внаго во святы́х Свои́х, ублажа́ем тя́, неве́сто Христо́ва и великому́ченице Мари́но, почита́ем страда́ния твоя́, сла́вим долготерпе́ние и непобеди́мое му́жество, хва́лим му́ченическую кончи́ну твою́. Ты́ бо на земли́ си́лою Бо́жиею победи́ла еси́ сатану́, я́вльшагося пред очи́ма твои́ма, ны́не же, предстоя́щи Престо́лу Царя́ Сла́вы, моли́ся о на́с, да изба́вит Госпо́дь от де́йства диа́вольскаго и от вся́ких бе́д чту́щих святу́ю па́мять твою́ и воспева́ющих си́це:

Ра́дуйся, благода́тию Бо́жиею просла́вленная; ра́дуйся, в дому́ Отца́ Небе́снаго оби́тель себе́ сотвори́вшая.

Ра́дуйся, Христу́, Жениху́ твоему́, спострада́вшая; ра́дуйся, блаже́нства святы́х удосто́енная.

Ра́дуйся, де́в христиа́нских украше́ние; ра́дуйся, го́рняго ми́ра досто́йная обита́тельнице.

Ра́дуйся, испове́днице ве́ры во Христа́ неустраши́мая; ра́дуйся, с му́ченики и все́ми святы́ми ликовству́ющая.

Ра́дуйся, уго́днице Бо́жия, житию́ вели́ких святы́х соприча́стнице; ра́дуйся, я́ко со все́ми избра́нными Бо́жиими при́сно торжеству́еши.

Ра́дуйся, на Небеси́ со дерзнове́нием Бо́гу предстоя́щая; ра́дуйся, ди́вная все́м правосла́вным христиа́ном помо́щнице.

Ра́дуйся, великому́ченице Мари́но, неве́сто Христо́ва всехва́льная.

Конда́к 13.

О преди́вная и чи́стая голуби́це, свята́я великому́ченице Мари́но, неве́сто Христо́ва всехва́льная, приими́ сие́ ма́лое моле́ние от лю́бящих тя́ и благоприя́тными твои́ми к Бо́гу моли́твами от вра́г ви́димых и неви́димых изба́ви, от вся́ких боле́зней душе́вных и теле́сных свободи́ и от ве́чнаго муче́ния твои́м хода́тайством сохрани́, да сподо́бимся с тобо́ю в ра́йских селе́ниих воспева́ти Бо́гу побе́дную пе́снь: Аллилу́ия.

Этот конда́к читается трижды, затем и́кос 1-й и конда́к 1-й.

Моли́тва.

О свята́я де́во и великому́ченице Мари́но, и́стинная Жениха́ твоего́ Христа́ неве́сто, во гра́де Антиохи́и за ве́ру Христо́ву пострада́вшая, сквозе́ о́гнь и во́ду проше́дшая и в Ца́рствии Небе́снем водвори́вшаяся! Ты́ от ю́ности все́ю душе́ю и все́м се́рдцем возлюби́ла еси́ Христа́, Бо́га на́шего, Тому́ еди́ному послужи́ти жела́ющи. Ты́ си́лою благоче́стия своего́, целому́дрием и пра́ведностию просия́ла еси́, пожи́вши свя́то и непоро́чно посреде́ неве́рных. Ты́, благода́тию Бо́жиею от ра́н ди́вно исцеле́нная, изуми́ла еси́ мучи́телей твои́х и мно́гих неве́рных привела́ еси́ к позна́нию И́стиннаго Бо́га. Ты́ си́лою Бо́жиею попра́ла еси́ диа́вола, я́вльшагося пред очи́ма твои́ма, и благода́ть прия́ла еси́ во бра́ни врага́ ро́да челове́ческаго побежда́ти. Ты́ еси́ всея́ Це́ркве Христо́вы свети́льник пресве́тлый, те́плая к Бо́гу моли́твенница и все́м прибега́ющим к тебе́ с ве́рою ско́рая засту́пница. О свята́я Мари́но, руководи́ на́с к Небе́сному Оте́честву, пода́ждь на́м ре́вность о спасе́нии, напра́ви стопы́ на́ша к де́ланию за́поведей Христо́вых, на пу́ть по́двига духо́внаго и исправле́ния жи́зни. Помина́й на́с моли́твою твое́ю, помози́ все́м на́м жи́ти целому́дренно, пра́ведно и благочести́во. Услы́ши ны́, страстоте́рпице Христо́ва, и умоли́ Человеколю́бца Бо́га, да пода́ст О́н хода́тайством твои́м Оте́честву на́шему ми́р и благоустрое́ние, все́м правосла́вным христиа́ном утвержде́ние в ве́ре, благоче́стии и чистоте́, да укрепи́т в на́с бра́тскую любо́вь, да очи́стит на́с, гре́шных, от скве́рны и поро́ков, да сохрани́т на́с от де́йства вра́жия, и поми́лует Свое́ю благода́тию, и Ца́рствия Небе́снаго насле́дники соде́лает, иде́же ку́пно с тобо́ю просла́вим ди́внаго во святы́х Свои́х Бо́га, Отца́ и Сы́на и Свята́го Ду́ха, всегда́, ны́не и при́сно, и во ве́ки веко́в. Ами́нь.