Конда́к 1.

Избра́нной от Го́спода во о́браз спасе́ния все́м гре́шным и отча́янным, из глубины́ греха́ восте́кшей на высоту́ безстра́стия, похва́льная пе́ния прино́сим ти́, ма́ти преподо́бная, ты́ же, я́ко име́я дерзнове́ние к ще́дрому Бо́гу, моли́твами твои́ми наста́ви на стезю́ твоего́ покая́ния любо́вию тебе́ зову́щих:

Ра́дуйся, чу́до милосе́рдия Бо́жия, Мари́е равноа́нгельная.

И́кос 1.

А́нгела во пло́ти узре́в тя́ в пусты́ни Иорда́нстей вели́кий Зоси́ма, на возду́се стоя́щую и о ми́ре моля́щуюся, со удивле́нием и у́жасом одержи́м ве́сь тре́петом бы́в, слеза́ми облива́яся, вопия́ше тебе́ такова́я:

Ра́дуйся, благода́ти и све́та испо́лненная; ра́дуйся, прозре́ния да́ром украше́нная.

Ра́дуйся, в моли́твах твои́х к Бо́гу на возду́се вознося́щаяся; ра́дуйся, пусты́нное сокро́вище, от ми́ра утае́нное.

Ра́дуйся, безпло́тных сожи́тельнице; ра́дуйся, Ду́ха Свята́го селе́ние.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 2.

Ви́дяще ста́рца благогове́йнаго у́жаса испо́лнена, ти́хим гла́сом рекла́ еси́ тому́ преподо́бная: не бо́йся, а́вво Зоси́мо, не́смь ду́х, но земля́, пра́х, и пе́пел, и вся́чески пло́ть, ничто́же духо́вное когда́ помы́слившая и ни еди́ныя доброде́тели иму́щая. Жена́ е́смь гре́шница, недосто́йная взира́ти на не́бо, и со стра́хом гре́шными усты́ зову́ Бо́гу: Аллилу́иа.

И́кос 2.

Разуме́ти ища́ ди́вную та́йну, в тебе́ сокрове́нную, ста́рец паде́ пред нога́ма твои́ма, глаго́ля: заклина́ю тя́ и́менем Го́спода на́шего Иису́са Христа́, Его́же ра́ди наготу́ но́сиши сию́, не скры́й от мене́ жития́ твоего́, да вели́чия Бо́жия я́ве сотвори́ши. С ни́мже и мы́ дерза́ем ублажи́ти тя́ си́це:

Ра́дуйся, смире́ния све́тлая высото́; ра́дуйся, дарова́ний духо́вных бога́тство неисчерпа́емое.

Ра́дуйся, любве́ ра́ди Бо́жия те́ло свое́ умертви́вшая; ра́дуйся, в пусты́ни непрохо́дней еди́на, с еди́ным Бо́гом пребы́вшая.

Ра́дуйся, ра́йскою красото́ю сия́ющая; ра́дуйся, безстра́стия све́том озаре́нная.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 3.

Си́лою Вы́шняго укрепля́ема, испове́м ти́, челове́че Бо́жий, грехи́ и беззако́ния моя́,— отвеща́ла еси́ Зоси́ме,— стыжу́ся, о́тче, прости́ мя́, но поне́же те́ло мое́ на́го ви́дел еси́, обнажу́ ти́ и дела́ моя́, оба́че молю́ тя́ пе́рвее: не бежи́ от мене́, не терпя́ слы́шати безме́стная, я́же а́з соде́ях; но, милосе́рдствуя о мне́, моли́ся за мя́, блу́дную, и Бо́гу, не возгнуша́вшуся мно́ю, зови́: Аллилу́иа.

И́кос 3.

Име́я милосе́рдие неизрече́нное, с мытари́ и гре́шники вечеря́вый, То́й и мне́, в глубину́ поги́бели па́дшей, простре́ ру́ку Свою́ Боже́ственную, егда́ бо возжела́х а́з вни́ти в хра́м Госпо́день, не́кая си́ла возбрани́ ми́ вхо́д, се́рдца же моего́ косну́выйся све́т ра́зума, показа́ ми́ ти́ну де́л мои́х; и нача́т пла́катися о гресе́х, в пе́рси бию́щи и го́рько рыда́ющи; мы́ же, покая́нию твоему́ веселя́щеся, пе́ние прино́сим ти́ сицево́е:

Ра́дуйся, я́ко но́щи преше́дшей возсиява́ет ти́ заря́ спасе́ния; ра́дуйся, я́ко гла́с Христо́в призыва́ет овча́ заблу́ждшее от де́брей греха́.

Ра́дуйся, я́ко сле́зными то́ки омыва́еши вся́ твоя́ скве́рны; ра́дуйся, я́ко слеза́ми твои́ми очища́еши одея́ние души́ твоея́.

Ра́дуйся, я́ко Оте́ц щедро́т объя́тия Своея́ любве́ тебе́ отверза́ет; ра́дуйся, я́ко ве́дый твоя́ та́йная рукописа́ния грехо́в твои́х раздира́ет.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 4.

Бу́рею ско́рбных по́мыслов одержи́ма, узре́ла еси́, Мари́е, во у́гле притво́ра церко́внаго ико́ну Пречи́стыя Богома́тери и, стеня́, воззвала́ еси́ к Не́й: повели́, о Влады́чице, да и мне́, недосто́йной, отве́рзутся боже́ственныя вхо́ды, и бу́ди Ты́ ми Спору́чница, я́ко егда́ узрю́ Кре́ст Сы́на Твоего́, ми́ра и я́же в ми́ре отве́ргуся и изы́ду, а́може Ты́ повели́ши мне́, зову́щи Бо́гу: Аллилу́иа.

И́кос 4.

Слы́шавше гла́с, издале́ча глаго́лющ: а́ще Иорда́н пре́йдеши, до́бре поко́й обря́щеши, на коле́на па́дши пред Присноде́вою, рекла́ еси́: о Влады́чице! Не гнуша́ется де́вственная чистота́ Твоя́ моея́ недосто́йныя моли́твы, бу́ди ми́ спасе́ния Учи́тельница, руково́дствующая на пу́ть покая́ния! Те́м у́бо А́нгели Бо́жии, напису́юще испове́дание твое́, возглаша́ху ти́ в то́й ча́с сицева́я:

Ра́дуйся, от тьмы́ греха́ к чи́стому све́ту покая́ния преходя́щая; ра́дуйся, неи́стовство страсте́й и любо́вь плотску́ю отри́нувшая.

Ра́дуйся, вся́ у́зы и се́ти врага́ растерза́вшая; ра́дуйся, тя́жкое бре́мя сту́дныя рабо́ты диа́вола во благо́е и ле́гкое и́го Христо́во премени́вшая.

Ра́дуйся, от сме́рти грехо́вныя к ве́чному животу́ возстаю́щая; ра́дуйся, от вра́т поги́бели к врата́м рая́ восходя́щая.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 5.

Богосве́тлыми луча́ми благода́ти просвеща́ет тя́ Пресвята́я Де́ва, Та́ бо Спору́чница гре́шных к Бо́гу су́щи, отверза́ет тебе́ две́ри милосе́рдия Бо́жия и врата́ хра́ма свята́го, во́ньже вше́дши, со мно́гими слеза́ми поклони́лася еси́ Живоно́сному Дре́ву, и́мже ми́р спасе́н бы́сть, и распе́ншемуся Го́споду, Кро́вь Свою́ за твое́ избавле́ние излия́вшему, благода́рственно воспе́ла еси́: Аллилу́иа.

И́кос 5.

Ви́дев та́йны Бо́жия и ка́ко гото́в е́сть приима́ти ка́ющихся, всехва́льная Мари́е, воззвала́ еси́ все́м се́рдцем: Влады́чице Богоро́дице! Не оста́ви мене́! – и устреми́лася еси́ в пусты́ню об о́н по́л Иорда́на, мы́ же, почита́я бе́гство твое́, срета́ем тя́ пе́нии си́ми:

Ра́дуйся, я́ко всепроща́ющею любо́вию Спа́са ура́нися се́рдце твое́; ра́дуйся, я́ко сокро́вище благода́ти, тобо́ю прия́тое, потща́лася еси́ сокры́ти в пусты́ни.

Ра́дуйся, я́ко ми́ра грехо́вныя сла́дости скороте́чно и невозвра́тно отбе́гла еси́; ра́дуйся, я́ко бе́гством твои́м де́моны огне́м попали́ла еси́.

Ра́дуйся, я́ко те́м бе́гством Небеса́ возра́довала еси́.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 6.

Пропове́дуеши все́м па́дшим и отча́янным, всечестна́я, Бо́жие человеколю́бие и си́лу покая́ния, ка́ко гре́шную ду́шу омыва́ет, очища́ет, све́тлит и возво́дит горе́ и весе́лие твори́т А́нгелом Бо́жиим, с ни́миже и мы́ бре́нными усты́ зове́м: Аллилу́иа.

И́кос 6.

Возсия́ ми́рови от пусты́ни Иорда́нския све́т вели́ких по́двигов твои́х, Мари́е присносла́вная, мно́гая бо ле́та, а́ки адама́нт тве́рд и сто́лп непоколеби́м, пребыла́ еси́, я́ко со зверьми́ лю́тыми, с похотьми́ твои́ми борю́щися и ору́жием креста́ отража́я разжже́нныя стре́лы лука́ваго, сего́ ра́ди дивя́щеся пачеесте́ственному терпе́нию твоему́, любо́вию зове́м ти́:

Ра́дуйся, я́ко злострада́ния и тру́д в пусты́ни четы́редесять и о́смь ле́т понесла́ еси́; ра́дуйся, я́ко со́лнечнаго зно́я опале́ние, наготу́ и мра́з нощны́й претерпе́ла еси́.

Ра́дуйся, я́ко гла́дом и жа́ждою истаява́ла еси́; ра́дуйся, я́ко вся́кое пожела́ние пло́ти коне́чно умертви́ла еси́.

Ра́дуйся, я́ко в борьбе́ со грехо́м, в тебе́ живу́щим, до кро́ве подвиза́лася еси́.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 7.

Хотя́ препя́тие сотвори́ти твоему́ све́тлому к небеси́ ше́ствию, всеблаже́нная, иско́нный вра́г ро́да челове́ческаго не престая́ше влага́ти ти́ по́мыслы нечи́стыя, о́гнь грехо́вный во удесе́х твои́х разжига́я и предлага́я тебе́ на па́мять пре́жняя жития́ твоего́; ты́ же, многострада́льная, поверга́лася еси́ на зе́млю, слеза́ми облива́яся и призыва́я в по́мощь Присноде́ву, и не возстава́ла еси́ от земли́ де́нь и но́щь, до́ндеже сла́дкий све́т осиява́ше тя́, воздвиза́я благода́рственно пе́ти Бо́гу: Аллилу́иа.

И́кос 7.

Но́вый челове́к, по о́бразу Бо́жию созда́нный, яви́лася еси́, преподо́бная, умертви́в бо всеконе́чно ве́тхаго челове́ка, во Христа́ облекла́ся еси́, всечу́дная, седмьна́десять ле́т безчи́сленныя беды́ претерпе́х. Зоси́ме рекла́ еси́: «Отто́леже и до дне́сь си́ла Бо́жия гре́шную мою́ ду́шу и те́ло смире́нное соблюде́». Приими́ у́бо и от на́с, недосто́йных, похвалы́ сицевы́я:

Ра́дуйся, я́ко умертви́ла еси́ страсте́й взыгра́ния; ра́дуйся, я́ко са́мое естество́ победи́ла еси́.

Ра́дуйся, я́ко вся́кий гре́х от души́ и пло́ти твоея́ потреби́ла еси́; ра́дуйся, я́ко в се́рдце и умерщвле́нных удесе́х твои́х но́сиши Иису́са, тобо́ю люби́маго.

Ра́дуйся, я́ко облекла́ся еси́ в оде́жду весе́лия духо́внаго; ра́дуйся, я́ко вошла́ еси́ в ве́чный поко́й Сы́на Бо́жия.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 8.

Стра́нное и пресла́вное измене́ние твое́, преподо́бная, ви́дяще, де́монов те́мныя полки́ го́рько рыда́ху, вся́ же си́лы небе́сныя ра́достию игра́юще, пе́снь Христу́ воспева́ху, прославля́юще Бо́жие милосе́рдие, греха́ми людски́ми непреодоле́нное, ве́лиим гла́сом зову́ще: Аллилу́иа.

И́кос 8.

Вся́ была́ еси́ в Бо́зе, Мари́е всебога́тая, егда́ Зоси́ма, обходя́ пусты́ню, ви́дети тя́ сподо́бися. «Заклина́ю тя́, о́тче, Спаси́телем Бо́гом, да никому́же рече́ши, я́же слы́шал еси́ от мене́, до́ндеже Бо́г от земли́ во́змет мя́», – веща́ла еси́ тому́ – ны́не с ми́ром отыди́, в посте́ же гряду́щаго ле́та причасти́ мя Святы́х Христо́вых Та́ин на бре́зе Иорда́нском, то́ ре́кши, а́ки го́рлица пустыннолюби́вая и неудержи́мая, от о́чию ста́рца скры́лася еси́, то́й же поклони́ся до земли́ и целова́ ме́сто, иде́же стоя́сте стопы́ но́г твои́х, зовы́й такова́я:

Ра́дуйся, я́ко обнажи́вшися студа́ грехо́внаго, па́че сне́га убели́лася еси́; ра́дуйся, я́ко па́че луче́й со́лнечных просвети́лася еси́.

Ра́дуйся, я́ко вся́ грехи́ твоя́ забве́ни и проще́ни су́ть у Бо́га; ра́дуйся, я́ко ча́сть твоя́ со святы́ми.

Ра́дуйся, я́ко мзда́ твоя́ мно́га на Небесе́х; ра́дуйся, я́ко пе́рвее блудни́ца, дне́сь неве́ста Христо́ва сотвори́лася еси́.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 9.

Вся́к по́мысл и у́м ужаса́ют боле́зни твоя́, всехва́льная, ка́ко тру́д пусты́ни любве́ ра́ди Бо́жией претерпе́ла еси́, взыва́ше превели́кий во отце́х Зоси́ма, рыда́я: О ма́ти духо́вная! Ты́ Бо́гу прибли́зилася еси́, хоте́л бы́х, а́ще бы мо́щно бы́ло, во сле́д тебе́ ходи́ти и зре́ти честно́е лице́ твое́ и ку́пно с тобо́ю немо́лчно пе́ти: Аллилу́иа.

И́кос 9.

Вети́йство земноро́дных не довле́ет досто́йно похвали́ти твоя́ по́двиги, всечестна́я, кто́ же дово́лен изрещи́ сле́зныя то́ки, я́же пролия́ла еси́ в моли́твах к Бо́гу! Кто́ боле́зни твоя́ изочте́т, кто́ испове́сть всено́щныя бде́ния, боре́ния и тесноту́ жития́ твоего́! Пусты́ню всю́ чудесы́ просвети́вши, я́ко со́лнце, просия́ла еси́, всечу́дная, те́м у́бо мо́лим тя́: озари́ луча́ми све́та твоего́ на́ша сердца́ и испроси́ оставле́ние грехо́в все́м вопию́щим тебе́ такова́я:

Ра́дуйся, помраче́нный о́браз Бо́жий в све́тлости вели́цей в себе́ возобрази́вшая; ра́дуйся, небе́сными арома́ты благоуха́ющая.

Ра́дуйся, звезда́ми чуде́с украше́нная; ра́дуйся, луча́ми доброде́телей сия́ющая.

Ра́дуйся, вели́чия Бо́жия все́м конце́м земли́ благовеству́ющая; ра́дуйся, не́бо и зе́млю к пе́нию сла́вы Го́спода твоего́ призыва́ющая.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 10.

Спаси́теля Бо́га животворя́щее Те́ло и Кро́вь взе́мше, в де́нь та́инственныя Христо́вы ве́чери, а́вва Зоси́ма, по завеща́нию твоему́, в ве́чер зело́ по́зден изы́де на бре́г Иорда́на, неукло́нно в пусты́ню лу́нным све́том осиява́емую, зря́, и моля́шеся к Бо́гу, глаго́ля: покажи́ ми, Го́споди, сокро́вище Твое́, е́же в пусты́ни сокры́л еси́! Покажи́ ми а́нгела во пло́ти, да не отиду́ то́щ, нося́ моя́ грехи́ на обличе́ние, но да ра́дуяся, зову́ Тебе́: Аллилу́иа.

И́кос 10.

Сте́ну непрохо́дну мы́сляше ста́рец бы́ти Иорда́н реку́, между́ ни́м и тобо́ю, преподо́бная: оба́че ты́, ста́в на одно́й стране́ реки́, зна́мением кре́стным Иорда́н зна́менала еси́ и ку́пно с те́м зна́мением взошла́ еси́ на во́ду; Зоси́ма же, ви́дев иду́щу тя́ к себе́ верху́ воды́, ужасе́ся и ра́достию вопия́ше тебе́:

Ра́дуйся, го́рняго рая́ Бо́жия обита́тельнице; ра́дуйся, я́ко тва́рь повину́ется веле́нию твоему́.

Ра́дуйся, я́ко во́лны сте́лются под честны́я но́зе твои́; ра́дуйся, я́ко Иорда́н тебе́ слу́жит, луна́ и зве́зды небе́сныя дивя́тся святы́ни твое́й.

Ра́дуйся, си́лы Бо́жией ди́вное проявле́ние; ра́дуйся, хра́ме одушевле́нный Бо́га Жива́го.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 11.

«Пе́ние подоба́ше приноси́ти Всемогу́щему Бо́гу, а́вво,– по воде́ ше́ствующи, рекла́ еси́ тому́,– что́ твори́ши, свяще́нник сы́й, ка́ко дерза́еши кла́нятися мне́, убо́зей, са́м нося́й стра́шныя Та́йны Христа́ Бо́га! Ему́же ве́рою и любо́вию, пра́х и земля́ покланя́ющися, со стра́хом зову́: Аллилу́иа».

И́кос 11.

Све́том небе́сным блиста́яся, причасти́лася еси́ Боже́ственных Та́ин и ра́дости преми́рныя испо́лнися, на не́бо ру́це возде́вши, рекла́ еси́: ны́не отпуща́еши рабу́ Твою́, Влады́ко! Обра́щся же к ста́рцу, веща́ла еси́: прости́, а́вво Зоси́мо! В гряду́щее же ле́то у́зриши мя́ па́ки в пусты́ни, я́коже хо́щет Госпо́дь, моли́ Его́ о мне́, о́тче мо́й, моли́, помина́я всегда́ мое́ окая́нство. И па́ки Иорда́н зна́менавши, прешла́ еси́ верху́ воды́. Ста́рец же, не сме́я надо́лзе держа́ти тя́, стеня́ и рыда́я, взыва́ше всле́д тебе́ такова́я:

Ра́дуйся, ме́ртвость Иису́са в те́ле нося́щая; ра́дуйся, Воскресе́ния Его́ сла́вою сия́ющая.

Ра́дуйся, благода́тию, я́ко ри́зою све́та, облече́нная; ра́дуйся, я́ко а́нгели Бо́жии дивя́тся чистоте́ твое́й.

Ра́дуйся, я́ко си́лы а́дския ужаса́ются и трепе́щут от сла́вы твоея́; ра́дуйся, светоза́рная оби́тель Всесвяты́я Тро́ицы.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 12.

Благода́тию Боже́ственною окриля́ема во еди́н ча́с долготу́ пусты́ни прешла́ еси́ и в но́щь спаси́тельныя Христо́выя стра́сти, по причаще́нии Боже́ственныя Та́йныя ве́чери, сно́м святы́м усну́ла еси́, о ми́ре моля́ся, ду́х тво́й Го́споду предала́ еси́, Ему́же со а́нгелы в неисповеди́мой ра́дости зове́ши ны́не: Аллилу́иа.

И́кос 12.

Пою́ще надгро́бное пе́ние, богому́дрый Зоси́ма, но́зе твои́ честны́я слеза́ми омыва́ше, и мно́го моли́вся, покры́ те́ло твое́ земле́ю, на́го су́щее и ничто́же име́ющее, то́чию ве́тхую ма́нтию, ю́же испе́рва тебе́ даде́. Те́мже ра́достию и стра́хом мно́гим одержи́м, вели́чию Бо́жию дивя́ся, стоя́ше, зовы́й к тебе́ такова́я:

Ра́дуйся, я́ко ча́до све́та су́щи, прешла́ еси́ к Све́ту невече́рнему; ра́дуйся, я́ко ду́х тво́й с весе́лием прия́ша селе́ния святы́х.

Ра́дуйся, я́ко те́ло твое́ упоко́ися в моги́ле, ю́же ле́в от пусты́ни тебе́ ископа́; ра́дуйся, я́ко тобо́ю показа́ мне́ Госпо́дь, коли́ко отстою́ от ме́ры соверше́нства.

Ра́дуйся, о все́м ми́ре к Бо́гу хода́таице; ра́дуйся, по́стников высото́, преподо́бных сла́во, страда́льцев красото́.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 13.

О преподо́бная ма́ти, богоблаже́нная Мари́е! Приими́ от на́с ны́не приноси́мое тебе́ моле́ние и, Све́ту непристу́пному предстоя́, моли́ся Всеще́дрому Бо́гу, да ми́лостив бы́в, низпо́слет светоза́рную благода́ть покая́ния все́м заблу́ждшим ча́дом Небе́снаго Отца́ и от греха́ к оте́ческому до́му восте́кших в ра́йских селе́ниих сподо́бит вку́пе с тобо́ю во ве́ки благода́рственно пе́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгела во пло́ти узре́в тя́ в пусты́ни Иорда́нстей вели́кий Зоси́ма, на возду́се стоя́щую и о ми́ре моля́щуюся, со удивле́нием и у́жасом одержи́м ве́сь тре́петом бы́в, слеза́ми облива́яся, вопия́ше тебе́ такова́я:

Ра́дуйся, благода́ти и све́та испо́лненная; ра́дуйся, прозре́ния да́ром украше́нная.

Ра́дуйся, в моли́твах твои́х к Бо́гу на возду́се вознося́щаяся; ра́дуйся, пусты́нное сокро́вище, от ми́ра утае́нное.

Ра́дуйся, безпло́тных сожи́тельнице; ра́дуйся, Ду́ха Свята́го селе́ние.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 1.

Избра́нной от Го́спода во о́браз спасе́ния все́м гре́шным и отча́янным, из глубины́ греха́ восте́кшей на высоту́ безстра́стия, похва́льная пе́ния прино́сим ти́, ма́ти преподо́бная, ты́ же, я́ко име́я дерзнове́ние к ще́дрому Бо́гу, моли́твами твои́ми наста́ви на стезю́ твоего́ покая́ния любо́вию тебе́ зову́щих:

Ра́дуйся, чу́до милосе́рдия Бо́жия, Мари́е равноа́нгельная.

Моли́тва.

О, равноа́нгельная и всесве́тлая Мари́е преподо́бная, убели́вшая ри́зу души́ своея́ в Кро́ви А́гнчей и зря́щая ны́не на Небеси́ невече́рний све́т Ца́рствия Небе́снаго! Помяни́ мя́, гре́шнаго и убо́гаго раба́ твоего́, в богоприя́тных твои́х к Бо́гу моли́твах и защити́ мя́ от ловле́ния врага́, ве́си бо его́ ко́зни и лю́тую в се́м житии́ на ны́ бра́нь. Да́руй ми́ сле́зы покая́ния, омыва́ющия душе́вную мою́ скве́рну, испроси́ ми́ оставле́ние грехо́в и жития́ исправле́ние, изба́ви мя́ от злы́х мои́х обы́чаев, ле́ности и нераде́ния, научи́ мя́ постоя́нству и кре́пости в борьбе́ с мои́ми грехо́вными на́выками, и помози́ напечатле́ти в се́рдце мое́м и уме́ Пресве́тлый О́браз тобо́ю люби́маго Христа́, уязви́ мою́ ду́шу Его́ всепроща́ющею любо́вию, да не оскорблю́ милосе́рдие Его́ но́выми греха́ми. Умоли́ о мне́ и Ми́лостивую спору́чницу Твою́, Пречи́стую Де́ву Богоро́дицу, да и мне́, недосто́йному, да́рует всеси́льную свою́ по́мощь и наста́вит на стезю́ спасе́ния. Во исхо́де же от сего́ ми́ра, о, ма́ти преподо́бная, сподо́би мя́ причаще́ния Святы́х Боже́ственных Та́ин: в стра́шный ча́с сме́рти помози́, на возду́шных мыта́рствах заступи́ и предста́тельством твои́м отве́рзи ми́ две́ри Небе́снаго Ца́рствия, иде́же по труде́х и по́двизех ны́не водворя́ешися, зря́ и прославля́я Пресла́дкаго Искупи́теля твоего́, прише́дшаго в ми́р гре́шныя спасти́ и Боже́ственною Свое́ю Кро́вию омыва́ющаго на́с от вся́каго греха́, Ему́же сла́ва, че́сть и поклоне́ние со Безнача́льным Его́ Отце́м и Пресвяты́м и Животворя́щим Ду́хом в безконе́чныя ве́ки. Ами́нь.