Конда́к 1.

Избра́нный дру́же и собесе́дниче дру́га Бо́жия чудотво́рца Се́ргия и ди́вный подража́телю жития́ его́ свята́го, преподо́бне о́тче на́ш Стефа́не! Пе́сньми ра́достными восхваля́ем тя́ с любо́вию, небе́снаго предста́теля и засту́пника на́шего: ты́ же, богоно́се, я́ко име́яй дерзнове́ние ко Го́споду, моли́ся вы́ну о спасе́нии на́с гре́шных и от вся́ких бе́д свободи́ зову́щих ти́:

Ра́дуйся, Стефа́не, вели́кий чудотво́рче.

И́кос 1.

А́нгелом любе́зную чистоту́ от ю́ности твоея́ возлюби́в, о́тче Стефа́не, ми́р и вся́ красоты́ его́ тле́нныя презре́л еси́, служи́ти же Го́сподеви в преподо́бии и чистоте́ взыска́л еси́, и сего́ ра́ди во оби́тель Ки́ево-Пече́рскую прише́д, постриже́ние во и́ноческий о́браз та́мо восприя́л еси́, подража́я во все́х доброде́телех преподо́бным отце́м Анто́нию и Феодо́сию и про́чим преподо́бным Пече́рским. Те́мже сла́вим тя́ по достоя́нию и глаго́лем:

Ра́дуйся, гра́да Ки́ева до́брое прозябе́ние; ра́дуйся, роди́телей благочести́вых ча́до боголюбе́зное.

Ра́дуйся, Ева́нгелия Христо́ва ве́рный после́дователю; ра́дуйся, за́поведей Иису́совых ре́вностный исполни́телю.

Ра́дуйся, до́м роди́тельский любве́ ра́ди Бо́жия оста́вивый; ра́дуйся, во оби́тель Ки́ево-Пече́рскую на по́двиги духо́вныя прише́дый.

Ра́дуйся, богому́дрия душеспаси́тельнаго преиспо́лненный; ра́дуйся, смире́ние свято́е себе́ усво́ивый.

Ра́дуйся, посто́м душепа́губныя стра́сти в себе́ умертви́вый; ра́дуйся, моли́твами непреста́нными вся́ искуше́ния диа́вольския отрази́вый.

Ра́дуйся, слеза́ми покая́нными убели́вый ри́зу душе́вную; ра́дуйся, из глубины́ воздыха́ньми приобреты́й чистоту́ серде́чную.

Ра́дуйся, Стефа́не, вели́кий чудотво́рче.

Конда́к 2.

Ви́дев по́двиги о Бо́зе преподо́бных оте́ц Пече́рских, Стефа́не богому́дре, ревнова́л еси́ и́м подража́ти во все́х доброде́телех и́ноческих, и я́ко земля́ до́брая, уче́ния духо́внаго словеса́ восприе́мля в се́рдце твое́, плодоприноси́л еси́ Го́сподеви житие́ преподо́бное, я́ко бы́ти тебе́ во пло́ти а́нгелу и небе́сному челове́ку и невозбра́нно пе́ти а́нгельскую пе́снь Пресвяте́й Тро́ице: Аллилу́иа.

И́кос 2.

Ра́зум небе́сный стяжа́в, о́тче преподо́бне, ри́мским лжеуче́нием, умно́жившимся во гра́де Ки́еве, смути́лся еси́ и предпоче́л еси́ удали́тися в страны́ се́верныя, ко гра́ду Москве́, иде́же сия́ше свято́е Правосла́вие, и мно́гия хра́мы Бо́жии и оби́тели и́ноческия бы́ша. Мы́ же разу́мное бе́гство твое́ ублажа́я, воспева́ем ти́ хвале́бныя пе́сни сицевы́я:

Ра́дуйся, правосла́вия побо́рниче; ра́дуйся, ри́мскаго лжеуче́ния обличи́телю.

Ра́дуйся, гра́д оте́чествия твоего́ оста́вивый, да гра́д Небе́сный Иерусали́м го́рний унасле́диши; ра́дуйся, стра́нник и пришле́ц бы́вый, да в сыновство́ Отцу́ Небе́сному сопричте́шися.

Ра́дуйся, безмо́лвия люби́телю, бу́ри ерети́ческия му́дро избежа́вый; ра́дуйся, моли́твы умиле́нныя Го́сподеви возноси́вый.

Ра́дуйся, звездо́, сия́ющая благода́ти Бо́жия заре́ю; ра́дуйся, от ю́га к се́веру прише́дый свети́ти лю́дем житие́м твои́м преподо́бным.

Ра́дуйся, трудолю́бче нелицеме́рный, пра́здность возненави́девый; ра́дуйся, по нестяжа́тельности и смире́нию твоему́ ве́тхия и многошве́нныя оде́жды носи́вый.

Ра́дуйся, с по́сохом стра́нника гра́ды и ве́си обше́дый и лю́ди благоче́стию поучи́вый; ра́дуйся, самоде́ржцев земли́ Росси́йския при́сный дру́г и сове́тник бы́вый.

Ра́дуйся, Стефа́не, вели́кий чудотво́рче.

Конда́к 3.

Си́ла Бо́жия укрепля́ше тя́, преподо́бне о́тче на́ш Стефа́не, егда́ стужи́в молво́ю челове́ческою во гра́де Москве́, отше́л еси́ в пусты́ню безлю́дную на реку́ Ма́хру, и та́мо ку́щу пусты́нную себе́ сооруди́в, в не́й подвиза́лся еси́ в безмо́лвии соверше́ннем, еди́н Еди́ному Христу́ рабо́тая в посте́ и моли́тве и денноно́щно воспева́я Ему́: Аллилу́иа.

И́кос 3.

Име́л еси́ еди́но попече́ние, преподо́бне, да спасе́ши ду́шу твою́ и предста́виши ю́ Христу́ без поро́ка, чи́сту от вся́кия скве́рны грехо́вныя; благи́й же Человеколю́бец Госпо́дь, ви́дев таково́е твое́ благо́е произволе́ние, поставля́ет тя́ па́стыря и́ноком пустыннолюби́вым и си́х собира́ет под твое́ руково́дство, да упасе́ши и́х во спасе́ние. О се́м тя́ прославля́ем и зове́м:

Ра́дуйся, учи́телю благоче́стия; ра́дуйся, наста́вниче богому́дрия.

Ра́дуйся, сотвори́вый и научи́вый; ра́дуйся, ве́лий нарече́нный во Ца́рствии Небе́снем.

Ра́дуйся, пустыннолюби́вая го́рлице; ра́дуйся, сладкопе́сненная ла́стовице.

Ра́дуйся, благоумиле́нный увеща́телю; ра́дуйся, многосле́зный моли́твенниче.

Ра́дуйся, пусты́ню во гра́д оби́тельный претвори́вый; ра́дуйся, де́брь непло́дную духо́вно уплодоноси́вый.

Ра́дуйся, спасе́ния мно́гих ду́ш челове́ческих вино́вниче; ра́дуйся, ангелонра́вный челове́че.

Ра́дуйся, Стефа́не, вели́кий чудотво́рче.

Конда́к 4.

Бу́ри грехо́вныя избежа́в, о́тче Стефа́не, в благооти́шии пусты́ннем водвори́лся еси́ и при по́мощи самоде́ржца земли́ Росси́йския, вели́каго кня́зя Иоа́нна, хра́м Бо́жий во и́мя Живонача́льныя Тро́ицы и оби́тель и́ноческую в пусты́ни твое́й возгради́л еси́, да немо́лчно сла́вится в не́й гла́сы преподо́бными Триеди́ный Бо́г, и пое́тся Ему́ пе́снь хвалы́ и благодаре́ния: Аллилу́иа.

И́кос 4.

Слы́шавше бли́жнии и да́льнии о равноа́нгельнем житии́ твое́м, о́тче преподо́бне, прихожда́ху в пусты́нную оби́тель твою́, о́ви послу́шати поуче́ний твои́х душеполе́зных, о́ви же подвиза́тися вку́пе с тобо́ю под твои́м руково́дством; ты́ же все́х с оте́ческою любо́вию приима́л еси́ и неле́ностно служи́л еси́ спасе́нию ду́ш челове́ческих, те́мже и слы́шиши таковы́я тебе́ похвалы́:

Ра́дуйся, пра́вило ве́ры и́стинныя; ра́дуйся, о́бразе кро́тости духо́вныя.

Ра́дуйся, па́стырю до́брый па́ствы и́ноческия; ра́дуйся, устрои́телю богому́дрый кинови́и пусты́нныя.

Ра́дуйся, общежи́тельныя уста́вы зело́ возлюби́вый; ра́дуйся, вся́ о́бща име́ти бра́тии в оби́тели твое́й законоположи́вый.

Ра́дуйся, ратобо́рче до́блий, полки́ неви́димых враго́в кре́пко победи́вый; ра́дуйся, вождю́ благоиску́сный во́инов духо́вных.

Ра́дуйся, вели́ких пустынножи́телей ве́рный подража́телю; ра́дуйся, дре́вних богоно́сных отце́в ре́вностный после́дователю.

Ра́дуйся, преподо́бнаго чудотво́рца Се́ргия многолюби́мый дру́же и собесе́дниче; ра́дуйся, преподо́бнаго чудотво́рца Кири́лла духо́вный руководи́телю и наста́вниче.

Ра́дуйся, Стефа́не, вели́кий чудотво́рче.

Конда́к 5.

Боготе́чная вои́стинну звезда́ яви́лся еси́, преподо́бне о́тче на́ш Стефа́не, и из глубины́ пусты́ни твоея́ духо́вно свети́л еси́ ца́рствующему гра́ду Москве́ и всему́ ца́рству правосла́вно-росси́йскому, дру́г и сове́тник самоде́ржцем его́ бы́в, вся́ до́брая ко благоче́стию при́сно сове́туя и́м богому́дренно и богоуго́дно воспева́я все́х Творцу́ пе́снь: Аллилу́иа.

И́кос 5.

Ви́дев неразу́мныя челове́ки, напра́сно гне́вавшияся на тя́, преподо́бне о́тче, ме́сто гне́ву и́х уступи́л еси́ и предпоче́л еси́ удали́тися из оби́тели твоея́ в преде́лы волого́дския на реку́ Авне́гу, иде́же но́вую оби́тель и́ноческую возгради́л еси́ во спасе́ние ду́ш челове́ческих, и в не́й при́сныя ученики́ твоя́ преподо́бных Григо́рия и Кассиа́на, я́ко кри́ны ра́йския, духо́вно возрасти́л еси́, с ни́миже тя́ ублажа́ем и зове́м:

Ра́дуйся, неусы́пный де́лателю виногра́да небе́снаго; ра́дуйся, плоды́ сла́дкия от де́лания твоего́ Христу́ принесы́й.

Ра́дуйся, и́мя Бо́жие спаси́тельное во усте́х твои́х вы́ну име́вый; ра́дуйся, па́мять пресла́дкаго Иису́са в се́рдце твое́ вне́дривый.

Ра́дуйся, и́го Христо́во благо́е и ле́гкое носи́вый; ра́дуйся, ско́рби мно́гия благоду́шно претерпе́вый.

Ра́дуйся, гне́вавшимся напра́сно на тя́ не пререка́вый; ра́дуйся, кро́тостию твое́ю зло́бу неразу́мных челове́ков побежда́вый.

Ра́дуйся, миротво́рец благослове́нный бы́вый; ра́дуйся, ми́ра ра́ди оби́тель твою́ оста́вивый.

Ра́дуйся, но́ву оби́тель на реце́ Авне́ге сооруди́вый; ра́дуйся, богоуго́дно в не́й со ученики́ твои́ми пожи́вый.

Ра́дуйся, Стефа́не, вели́кий чудотво́рче.

Конда́к 6.

Пропове́дник ве́ры Христо́вой яви́лся еси́, преподо́бне о́тче, в преде́лех авне́жских, и лю́ди, язы́ческим суеве́рием потемне́нныя, све́том Христо́вым соверше́нно просвети́л еси́, поуча́я их неле́ностно оста́вити нечести́выя обы́чаи язы́ческия и прилежа́ти благоче́стию христиа́нскому, да возмо́гут благоприя́тно пе́ти Еди́ному И́стинному Бо́гу славосло́вия пе́снь: Аллилу́иа.

И́кос 6.

Возсия́в све́том богоразу́мия твоего́ в страна́х полу́нощных, Стефа́не богому́дре, повеле́нием вели́каго кня́зя Дими́трия, па́ки во оби́тель твою́, на реце́ Ма́хре тобо́ю устро́енную, возвраща́ешися, в оби́тели же твое́й на реце́ Авне́ге преподо́бныя ученики́ твоя́ Григо́рия и Кассиа́на оста́вил еси́, да продолжа́ют они́ та́мо по уче́нию и приме́ру твоему́ по́двиги духо́вныя, в ни́хже и венцы́ му́ченическими от Христо́вой десни́цы они́ увенча́шася и чудесы́ мно́гими свя́тость свою́ ознаменова́ша. Тебе́ у́бо, о́тче, таковы́я святы́я ученики́ стяжа́вшему, вопие́м хвале́бно:

Ра́дуйся, Ева́нгелия Христо́ва немо́лчный пропове́дниче; ра́дуйся, апо́стольских преда́ний ре́вностный блюсти́телю.

Ра́дуйся, язы́ческаго нече́стия искорени́телю; ра́дуйся, ве́ры правосла́вныя распространи́телю.

Ра́дуйся, во сле́д себе́ ко Христу́ ученики́ твоя́ приведы́й; ра́дуйся, свята́я ча́да о Христе́ стяжа́вый.

Ра́дуйся, с ни́ми возше́дый прия́ти мзду́ небе́сную от Го́спода; ра́дуйся, не сокры́вый тала́нт, вруче́нный тебе́ от Всевы́шняго Домовлады́ки.

Ра́дуйся, ку́плю мно́гу и́м сотвори́вый, спасе́ние ду́ш челове́ческих; ра́дуйся, заблу́ждшия на пу́ть пра́вый напра́вивый твои́ми уче́ньми.

Ра́дуйся, бли́жния твоя́ и́скренно возлюби́вый; ра́дуйся, спасе́нию и́х душе́вному усе́рдно послужи́вый.

Ра́дуйся, Стефа́не, вели́кий чудотво́рче.

Конда́к 7.

Хотя́ Госпо́дь яви́ти на́м о́браз смире́ния свята́го, приво́дит к тебе́, о́тче Стефа́не, преподо́бнаго Се́ргия, его́же во врате́х оби́тели твоея́ сре́тив, проси́л еси́ его́ благослови́ти тя́ со ученики́ твои́ми: то́й же благослове́ния от тебе́ смиренному́дренно прося́ше, до́ндеже умоле́нный тобо́ю благослови́ тя, и уте́шився духо́вною бесе́дою с тобо́ю, воспева́ше Бо́гу: Аллилу́иа.

И́кос 7.

Но́ваго тя́ ревни́теля по благоче́стию позна́в благове́рный вели́кий кня́зь Дими́трий, отца́ духо́внаго себе́ тя́ нарече́ и во все́м с любо́вию послу́шаше твои́х сове́тов богому́дрых, преподо́бне о́тче на́ш Стефа́не, ве́дая бли́зость твою́ к Царю́ царе́й Христу́ Бо́гу, Его́же умоля́ти не преста́й и о на́с гре́шных, вопию́щих ти́ хвале́бно:

Ра́дуйся, кри́не пусты́ннаго прозябе́ния; ра́дуйся, ми́ро Христо́ва благоуха́ния.

Ра́дуйся, смире́ния соверше́ннаго зерца́ло; ра́дуйся, от стре́л вра́жиих кре́пкое на́м забра́ло.

Ра́дуйся, смире́нием высо́кая стяжа́вый; ра́дуйся, бога́тство нетле́нное унасле́дивый.

Ра́дуйся, пусты́ню духо́вно просвети́вый; ра́дуйся, сле́зными пото́ки бразду́ душе́вную напои́вый.

Ра́дуйся, посеще́ния преподо́бнаго Се́ргия удосто́енный; ра́дуйся, благослове́нием и моли́твою его́ освяще́нный.

Ра́дуйся, преподо́бием све́тло украше́нный; ра́дуйся, дара́ми Бо́жия благода́ти преиспо́лненный.

Ра́дуйся, Стефа́не, вели́кий чудотво́рче.

Конда́к 8.

Стра́нствовав во гра́д Москву́, о́тче Стефа́не, смотре́нием Бо́жиим преподо́бнаго Кири́лла на пу́ть подви́жничества духо́внаго приве́л еси́ богому́дрыми твои́ми словесы́, и обруче́ние а́нгельскаго о́браза на него́ возложи́в, Христу́ его́ приусво́ил еси́, не убоя́вся гне́ва сро́дника его́, имени́таго боля́рина великокня́жескаго, его́же гне́в неразу́мный ди́вно утоли́л еси́, зовы́й Бо́гу, та́ко изво́лившему: Аллилу́иа.

И́кос 8.

Ве́сь в Бо́зе бы́в, преподо́бне о́тче, о Бо́зе и угожде́нии Ему́ всегда́ бесе́довал еси́ со ученики́ твои́ми и от любве́ серде́чныя ко Го́споду сле́зы мно́гия излива́л еси́ от оче́с твои́х при бесе́дах си́х, умоля́я ча́да твоя́ духо́вная ничто́же предпочита́ти па́че любве́ Христо́вы. Мо́лим тя́, уго́дниче Бо́жий, сподо́би и на́с хла́дных воспламени́тися любо́вию ко Го́споду, да возмо́жем неосужде́нно вопи́ти тебе́:

Ра́дуйся, гре́шники на покая́ние наста́вивый; ра́дуйся, ка́ющияся с Бо́гом примири́вый.

Ра́дуйся, оте́ц чадолюби́вый ученико́м твои́м бы́вый; ра́дуйся, не́мощи немощны́х любвеоби́льно носи́вый.

Ра́дуйся, уневе́стивый Христу́ мно́гия ду́ши челове́ческия; ра́дуйся, о́браз соверше́нства духо́внаго в себе́ яви́вый.

Ра́дуйся, с пла́кавшими пла́кавый; ра́дуйся, боля́щия посеща́вый и ни́щия пита́вый.

Ра́дуйся, вдо́в и сиро́т защи́тниче; ра́дуйся, оби́димых и гони́мых засту́пниче.

Ра́дуйся, си́льным ми́ра суда́ Бо́жия провозве́стниче; ра́дуйся, вся́кия непра́вды нелицеприя́тный обличи́телю.

Ра́дуйся, Стефа́не, вели́кий чудотво́рче.

Конда́к 9.

Все́м приходи́вшим в оби́тель твою́ святу́ю, ди́вно бы́сть ви́дети тя́, о́тче преподо́бне, в ве́тхой и многошве́нной ри́зе ходи́вшаго и наравне́ с бра́тиею твое́ю в рабо́тах монасты́рских тружда́вшагося; никогда́же бо пра́зден бы́л еси́, но рука́ма твои́ма де́лая, во усте́х моли́тву к Бо́гу при́сно име́л еси́, зовы́й Ему́ от умиле́нныя души́: Аллилу́иа.

И́кос 9.

Вети́я богому́дрый бы́л еси́, преподо́бне о́тче Стефа́не, и язы́ком твои́м, я́ко тро́стию кни́жника скоропи́сца, зако́н Бо́га твоего́ начертава́л еси́ на сердца́х челове́ческих, все́м ве́рно показу́я пу́ть ко спасе́нию, по нему́же са́м неукло́нно ше́ствовал еси́ до блаже́нныя твоея́ кончи́ны. Те́мже приими́ от на́с похвалы́ таковы́я:

Ра́дуйся, главо́ свята́я, благода́тию Бо́жиею осене́нная; ра́дуйся, пропове́дниче сладкоглаго́ливый, веща́вый словеса́ жи́зни ве́чныя.

Ра́дуйся, пусты́нный граждани́не, его́же уче́ньми спасо́шася мно́зи; ра́дуйся, приведы́й ко Христу́ соверше́нныя подви́жники.

Ра́дуйся, воево́до добропобе́дный ра́тующих со враги́ неви́димыми; ра́дуйся, руководи́телю предо́брый пустынножи́телей.

Ра́дуйся, псалмопе́нии немо́лчными Бо́га сла́вивый; ра́дуйся, моли́твы умиле́нныя вы́ну Го́сподеви приноси́вый.

Ра́дуйся, коленопреклоне́ния мно́гая соверша́вый; ра́дуйся, посто́м и сухояде́нием пло́ть твою́ изнури́вый.

Ра́дуйся, ве́тхаго в себе́ челове́ка всеце́ло ду́ху покори́вый; ра́дуйся, вся́ стра́сти грехо́вныя в себе́ обузда́вый.

Ра́дуйся, Стефа́не, вели́кий чудотво́рче.

Конда́к 10.

Спасе́ние ве́чное унасле́довал еси́, преподо́бне о́тче Стефа́не, и кончи́ною благо́ю сконча́лся еси́, я́ко и́стинный уго́дник Христа́ Бо́га, чесого́ зна́мение бы́сть благоуха́ние ве́лие, испо́лнившее всю́ ке́ллию, иде́же преда́л еси́ святу́ю ду́шу твою́ в ру́це Бо́жии. Та́ко бо просла́ви тя́ при исхо́де твое́м Госпо́дь, ди́вный во святы́х Свои́х, Ему́же пое́ши со а́нгелы: Аллилу́иа.

И́кос 10.

Царя́ Небе́снаго Христа́, Ему́же в житии́ земно́м благоугоди́л еси́, преподо́бне о́тче, по сме́рти твое́й прославля́еши чудотворе́нии твои́ми, прие́м от Него́ благода́ть исцеле́ний вся́ких неду́гов: те́мже вси́, насыща́ющиися чрез тебе́ даро́в Его́ боже́ственных, велича́ют Его́ щедро́ты, тебе́ же, чудотво́рца пресла́внаго, ублажа́ют си́це:

Ра́дуйся, свя́то и преподо́бно жи́знь земну́ю сконча́вый; ра́дуйся, во исхо́де твое́м благоуха́ние сла́достное испусти́вый.

Ра́дуйся, сме́рть вкуси́вый, тле́ния же не позна́вый; ра́дуйся, с све́тлым лице́м во гро́бе возлежа́вый.

Ра́дуйся, дерзнове́ние ве́лие ко Го́споду стяжа́вый; ра́дуйся, чудотворе́ния да́р свы́ше получи́вый.

Ра́дуйся, пресели́выйся от земли́ к оби́телем небе́сным; ра́дуйся, та́мо со святы́ми наслажда́яйся блаже́нства ве́чнаго.

Ра́дуйся, врачу́ благода́тный и безме́здный; ра́дуйся, целе́бниче, не мзды́, еди́ныя то́кмо ве́ры тре́буяй.

Ра́дуйся, боля́щия здра́вы сотворя́яй; ра́дуйся, исцеле́ния неду́жным неоску́дно подава́яй.

Ра́дуйся, Стефа́не, вели́кий чудотво́рче.

Конда́к 11.

Пе́ние моле́бное от ле́т дре́вних соверша́ется у гро́ба твоего́, преподо́бне о́тче, чудеса́ же мно́гая от него́ истека́ют оби́льною струе́ю: те́мже сла́вим тя́, чудотво́рца ми́лостиваго, и с любо́вию покланя́емся честне́й и многоцеле́бней твое́й ра́це, прося́ себе́ твоего́ моли́твеннаго предста́тельства ко Го́споду, Ему́же благода́рственно взыва́ем: Аллилу́иа.

И́кос 11.

Све́т небе́сный возсия́ на гро́бе твое́м, Стефа́не чудотво́рче, и о́гненная луча́ в нощи́ озари́ ме́сто посме́ртнаго твоего́ поко́я, в зна́мение вели́кия твоея́ свя́тости. Мо́лим тя́, преподо́бне, луче́ю Бо́жией благода́ти, в тебе́ живу́щей, озари́ и на́ша мра́чныя ду́ши и приведи́ ны́ ко све́ту спасе́ния твои́ми моли́твами, да возмо́жем досто́йно благохвали́ти тя́ пе́сньми сицевы́ми:

Ра́дуйся, от го́рних высо́т к земноро́дным ми́лостиво приника́яй; ра́дуйся, от ра́ки твоея́ святы́я исцеле́ния боля́щим подава́яй.

Ра́дуйся, в со́ниих и виде́ниих ве́рныя посеща́яй; ра́дуйся, оби́тель твою́ и по сме́рти моли́твенно назира́яй.

Ра́дуйся, скорбя́щих благи́й уте́шителю; ра́дуйся, уныва́ющих благода́тный ободри́телю.

Ра́дуйся, реко́ приснотеку́щая чуде́с; ра́дуйся, ми́лования исто́чниче неоску́дный.

Ра́дуйся, благоутро́бия щедро́ты оби́льно все́м да́руяй; ра́дуйся, бли́жних и да́льних ми́лостьми твои́ми ущедря́яй.

Ра́дуйся, и неве́дущим тя́ благодея́ния целе́бная источа́яй; ра́дуйся, еди́ным призыва́нием и́мене твоего́ неду́ги неисце́льныя врачу́яй.

Ра́дуйся, Стефа́не, вели́кий чудотво́рче.

Конда́к 12.

Благода́ть Бо́жия по ле́тех мно́зех соблюде́ те́ло твое́ свято́е нетле́нно в земли́, преподо́бне о́тче Стефа́не, и я́ко сокро́вище многоце́нное яви́ е́ лю́дем це́ло и неруши́мо во все́х соста́вех, я́ко ниже́ оде́ждам твои́м косну́тися тле́нию, и по́яс у́смен от моще́й твои́х целе́бную благода́ть прояви́, его́же возложе́нием вся́кия неду́ги исцеля́хуся, и ду́си нечи́стии от челове́к исхожда́ху, во е́же все́м зря́щим сия́ прославля́ти Творца́ чуде́с Бо́га, и пе́ти Ему́: Аллилу́иа.

И́кос 12.

Пою́ще свято́е и равноа́нгельное житие́ твое́ прославля́ем мно́гая и пресла́вная чудотворе́ния твоя́, преподо́бне чудотво́рче, о́тче на́ш Стефа́не; ты́ же, я́ко бла́г и ми́лостив, не возгнуша́йся пе́ний на́ших моле́бных, но оте́ческою любо́вию твое́ю приими́ я́ в воню́ благоуха́ния духо́внаго и ниспосли́ на́м гре́шным вся́ благопотре́бныя ко спасе́нию да́ры бла́гости Бо́жией, да благода́рственно тебе́ вопие́м:

Ра́дуйся, Пресвяты́я Тро́ицы благоволе́нием осене́нный; ра́дуйся, Пресвяты́я Богоро́дицы ми́лостьми уще́дренный.

Ра́дуйся, а́нгелов сожи́телю; ра́дуйся, святы́х все́х сонасле́дниче.

Ра́дуйся, гре́шных ми́лостивый засту́пниче; ра́дуйся, бе́дствующих ско́рый помо́щниче.

Ра́дуйся, сла́во и похвало́ святы́я твоея́ оби́тели; ра́дуйся, благода́тное удобре́ние земли́ Росси́йския.

Ра́дуйся, все́м приходя́щим к тебе́ на поклоне́ние да́ры целе́бныя ще́дро подава́яй; ра́дуйся, боле́зни неисце́льныя еди́ным прикоснове́нием к ра́це твое́й исцеля́яй.

Ра́дуйся, по Бо́зе и Богоро́дице кре́пкое на́ше упова́ние; ра́дуйся, ду́ш и теле́с на́ших богодарова́нное врачева́ние.

Ра́дуйся, Стефа́не, вели́кий чудотво́рче.

Конда́к 13.

О чудотво́рче пресла́вный и засту́пниче все́м на́м ско́рый и ми́лостивый, преподо́бне и богоно́сне о́тче на́ш Стефа́не! Припа́дая к тебе́ с ве́рою и любо́вию, мо́лим тя́: моли́ся за на́с гре́шных к Триипоста́сному Бо́гу и моли́твами твои́ми святы́ми от а́дских му́к и поги́бели ве́чныя изба́ви на́с, сподо́би же Ца́рствие Небе́сное получи́ти и в ра́дости святы́х ве́чно пе́ти Бо́гу Спаси́телю на́шему: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом любе́зную чистоту́ от ю́ности твоея́ возлюби́в, о́тче Стефа́не, ми́р и вся́ красоты́ его́ тле́нныя презре́л еси́, служи́ти же Го́сподеви в преподо́бии и чистоте́ взыска́л еси́, и сего́ ра́ди во оби́тель Ки́ево-Пече́рскую прише́д, постриже́ние во и́ноческий о́браз та́мо восприя́л еси́, подража́я во все́х доброде́телех преподо́бным отце́м Анто́нию и Феодо́сию и про́чим преподо́бным Пече́рским. Те́мже сла́вим тя́ по достоя́нию и глаго́лем:

Ра́дуйся, гра́да Ки́ева до́брое прозябе́ние; ра́дуйся, роди́телей благочести́вых ча́до боголюбе́зное.

Ра́дуйся, Ева́нгелия Христо́ва ве́рный после́дователю; ра́дуйся, за́поведей Иису́совых ре́вностный исполни́телю.

Ра́дуйся, до́м роди́тельский любве́ ра́ди Бо́жия оста́вивый; ра́дуйся, во оби́тель Ки́ево-Пече́рскую на по́двиги духо́вныя прише́дый.

Ра́дуйся, богому́дрия душеспаси́тельнаго преиспо́лненный; ра́дуйся, смире́ние свято́е себе́ усво́ивый.

Ра́дуйся, посто́м душепа́губныя стра́сти в себе́ умертви́вый; ра́дуйся, моли́твами непреста́нными вся́ искуше́ния диа́вольския отрази́вый.

Ра́дуйся, слеза́ми покая́нными убели́вый ри́зу душе́вную; ра́дуйся, из глубины́ воздыха́ньми приобреты́й чистоту́ серде́чную.

Ра́дуйся, Стефа́не, вели́кий чудотво́рче.

Конда́к 1.

Избра́нный дру́же и собесе́дниче дру́га Бо́жия чудотво́рца Се́ргия и ди́вный подража́телю жития́ его́ свята́го, преподо́бне о́тче на́ш Стефа́не! Пе́сньми ра́достными восхваля́ем тя́ с любо́вию, небе́снаго предста́теля и засту́пника на́шего: ты́ же, богоно́се, я́ко име́яй дерзнове́ние ко Го́споду, моли́ся вы́ну о спасе́нии на́с гре́шных и от вся́ких бе́д свободи́ зову́щих ти́:

Ра́дуйся, Стефа́не, вели́кий чудотво́рче.

Моли́тва.

О всеблаже́нне и преподо́бне о́тче Стефа́не, просла́вленный уго́дниче Пресвяты́я Тро́ицы, Престо́лу Ея́ предстоя́ с ли́ки святы́х а́нгел и все́х святы́х, помяни́ на́с, в беда́х и ско́рбех припа́дающих к цельбоно́сному твоему́ гро́бу и моля́щихся тебе́: услы́ши моли́твы на́ша и принеси́ к Престо́лу Триипоста́снаго Бо́га, прося́ у Него́ на́м бога́тыя ми́лости, здра́вия душа́м и телесе́м на́шим, наипа́че же отпуще́ния грехо́в, благода́ти и спасе́ния. Ты́ бо, име́я дерзнове́ние к Нему́, мо́жеши умоли́ти Его́, да пода́ст на́м в житии́ на́шем блага́я и вся́ я́же на по́льзу на́шу и во уготовле́ние к ве́чному животу́. О благи́й и ве́рный ра́бе Бо́жий, и́стинный учениче́ Христа́, избра́нный сосу́де Свята́го Ду́ха, чудотво́рче Стефа́не, мо́лим тя́ усе́рдно: сотвори́ на́с гре́шных прича́стники бы́ти благода́тных дарова́ний, и́миже Бо́г тя́ обогати́, и бу́ди на́м по Бо́зе наста́вник к богоуго́дному житию́, ути́шитель бу́ри страсте́й, помо́щник в ско́рбех и беда́х, и засту́пник от вра́г ви́димых и неви́димых, да и мы́, богоуго́дно преше́дше по́прище сея́ жи́зни, твои́м предста́тельством и богоприя́тными твои́ми моли́твами, бу́дем насле́дницы Ца́рствия Бо́жия, и сподо́бимся вку́пе с тобо́ю предстоя́ти Престо́лу Царя́ Сла́вы, Ему́же подоба́ет вся́кая сла́ва, че́сть и держа́ва во ве́ки веко́в. Ами́нь.