Акафистник

Помочь сайту
·
·
·
·

Акафист святому преподобноисповеднику Сергию (Сребрянскому)

Память: 5 апреля (23 марта), 11 декабря (28 ноября)

Не утвержден для общецерковного использования.

Конда́к 1.

Избра́ннаго Бо́жиим веле́нием на кре́ст па́стырскаго служе́ния, моли́твенника изря́днаго и уте́шителя те́плаго, пра́ведных Ма́рфы и Мари́и усе́рднаго почита́теля, Ра́донежскому чудотво́рцу соиме́нника и испове́дника, преподо́бнаго отца́ на́шего Се́ргия почти́м, я́ко име́яй дерзнове́ние ко Го́споду от вся́ких на́с бе́д свобожда́ти и на пу́ть покая́ния направля́ти, в пе́снех немо́лчно вопию́щих:

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

И́кос 1.

А́нгельским горе́нием восхоте́вый, преподо́бне, от ю́ности бли́жнему послужи́ти, а́ще и недосто́йна себе́ во глубо́цем смире́нии па́стырства духо́внаго зря́, оба́че име́яй те́плаго засту́пника, святи́теля Митрофа́на Воро́нежскаго, яковы́й в виде́нии сна́ тебе́ благословля́ше, обре́л еси́ благода́ть предстоя́ти Престо́лу Госпо́дню. Мы́ же, таково́е промышле́ние Бо́жие о тебе́ ви́дяще, си́це рце́м:

Ра́дуйся, от пеле́н сосу́дом избра́нным Свята́го Ду́ха бы́ти предусмо́тренный; ра́дуйся, от младе́нства на слу́жбу Царю́ Сла́вы при́званный.

Ра́дуйся, изде́тска по́ст возлюби́вый; ра́дуйся, сы́не утеше́ния и ча́до послуша́ния.

Ра́дуйся, я́ко измла́да стра́ждущим порабо́тати возжела́л еси́; ра́дуйся, я́ко в чужде́й стране́ в Правосла́вии укрепи́лся еси́.

Ра́дуйся, о поко́е свое́м неради́вый; ра́дуйся, всего́ себе́ в ру́це Бо́жий преда́вый.

Ра́дуйся, вразумле́ние у небе́снаго твоего́ покрови́теля проси́вый; ра́дуйся, я́ко у святы́х его́ моще́й благода́ть свяще́нства получи́вый.

Ра́дуйся, служи́телю Свята́я Святы́х изря́дный; ра́дуйся, Цари́цы Небе́сной почита́телю при́сный.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 2.

Ви́дя себе́ благода́тию свяще́нства оде́янным, просла́вил еси́ Творца́ вся́ческих в дея́ниих свои́х, не скры́ бо в земли́ да́нный ти́ от Бо́га тала́нт, его́же и́мя е́сть любы́, но приумно́жил еси́ его́ стокра́т. Те́мже и по сме́рти не оскудева́еши излива́ти то́ки милосе́рдых чуде́с твои́х и ско́рое вспоможе́ние подава́еши вопию́щим ти́: Аллилу́ия.

И́кос 2.

Ра́зум недоразумева́емый разуме́ти ища́, досточу́дне, потща́лся еси́ свы́ше вразумле́ние получи́ти, ка́ко стра́шно е́сть Та́инственное Бра́шно сие́ и кольми́ стра́шно Твое́, Го́споди, Распя́тие. Си́це помы́сливше, воспои́м такова́я:

Ра́дуйся, я́ко со стра́хом и тре́петом вы́ну Свято́й Трапе́зе предстоя́л еси́; ра́дуйся, я́ко со тща́нием ве́лиим ко Святы́м Та́йнам приступа́л еси́.

Ра́дуйся, А́нгелов собесе́дниче и преподо́бных ра́дование; ра́дуйся, чистоты́ душе́вныя и теле́сныя храни́телю.

Ра́дуйся, честны́й о́бразе па́стыря кро́ткаго; ра́дуйся, ду́шу свою́ полага́вый за слове́сныя о́вцы.

Ра́дуйся, я́ко в моли́тве за па́ству свою́ не оскудева́яй; ра́дуйся, и на́с, малоду́шных, укрепля́й.

Ра́дуйся, преиспо́лненный вся́кия благосты́ни; ра́дуйся, моско́вския и тверски́я земли́ сугу́бый моли́твенниче.

Ра́дуйся, я́ко свя́то и непоро́чно зде́ пребыва́л еси́; ра́дуйся, я́ко ча́да своя́ вы́ну го́рняя помышля́ти наставля́л еси́.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 3.

Про́мыслом Бо́жиим во гра́де Орле́ просия́вый, иде́же па́ству свою́ моли́твами, я́ко оре́л птенцы́ своя́ крила́ми покрыва́л еси́, вы́ну очи́ма ума́ своего́ Кре́ст Христо́в созерца́я, ско́рбных и печа́льных утеша́л еси́, да просвети́тся све́т тво́й пред челове́ки, внегда́ зва́ти ти́: Аллилу́иа.

И́кос 3.

Име́яй любы́ нелицеме́рную, преда́л еси́ всего́ себе́ Созда́телю вы́шних и ни́жних Искупи́телю и бы́л еси́ помо́щник стра́ждущим в неду́зех, уте́шитель скорбя́щих, путеводи́тель заблу́ждших в мо́ре жите́йских попече́ний, а́лчущих и́стины пита́тель, младе́нствующих в доброде́тели наста́вник, вопию́щих такова́я:

Ра́дуйся, се́ятелю сло́ва Христо́ва усе́рдный; ра́дуйся, моли́твенниче о пасо́мых приле́жный.

Ра́дуйся, я́ко храмозда́теля по́двиг подъя́л еси́; ра́дуйся, я́ко храни́лище писа́ний богодухнове́нных собра́л еси́.

Ра́дуйся, наставле́нием в зако́не Госпо́днем о́троки вразуми́вый; ра́дуйся, безсре́бренниче, вся́ земна́я стяжа́ния презре́вый.

Ра́дуйся, пло́д духо́вный собра́вый; ра́дуйся, любы́, ра́дость, ми́р, долготерпе́ние стяжа́вый.

Ра́дуйся, я́ко во́ин Госпо́день бы́л еси́; ра́дуйся, я́ко пло́ть свою́ со страстьми́ и похотьми́ распя́л еси́.

Ра́дуйся, воздержа́ние вы́ну име́вый; ра́дуйся, в Ду́се ходя́щий и на́ша тяготы́ нося́щий.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 4.

Бу́рная стремле́ния ми́ра сего́ оста́вил еси́, о́тче пресла́вне, и восте́кл еси́ облобыза́ти честны́я мо́щи Саро́вскаго чудотво́рца, блаже́ннаго Серафи́ма. То́йже связа́ дво́ицу честну́ю, Великоимени́тую Княги́ню Елисаве́ту и па́стыря кро́ткаго Митрофа́на, благослови́ я́ на сорабо́тничество и бе́ те́м при́сный помо́щник. Мы́ же, ра́дующеся сему́, воспева́ем вы́ну: Аллилу́иа.

И́кос 4.

Слы́ша словеса́ Бо́жия и держа́ я́ в се́рдце свое́м, я́ко па́стырь до́брый и ста́до его́ еди́ны су́ть, потща́лся еси́ тещи́ с во́ины супроти́в безбо́жныя ага́ряны, мы́ же таково́й твое́й любве́ дивя́щеся, воспева́ем си́це:

Ра́дуйся, па́ству свою́ во бра́нех не оста́вивый; ра́дуйся, с не́ю все́ тяготы́ во́инскаго жития́ раздели́вый.

Ра́дуйся, хла́д и зно́й смире́нно претерпе́вый; ра́дуйся, я́ко от Святы́я Трапе́зы во́ины утеша́л еси́.

Ра́дуйся, я́ко о́ных не устраши́тися часа́ сме́ртнаго призыва́л еси́; ра́дуйся, я́ко те́х в небе́сная селе́ния досто́йно провожда́л еси́.

Ра́дуйся, я́ко о во́инех твои́х попече́ние име́ла Княги́ня милосе́рдная; ра́дуйся, о се́й пра́веднице моли́твенниче непреста́нный.

Ра́дуйся, предста́тельством свои́м бли́жних охраня́еши; ра́дуйся, погиба́ющих во гресе́х исправля́еши.

Ра́дуйся, ду́ш отча́явшихся с Бо́гом примире́ние; ра́дуйся, ка́ющимся гре́шником по Бо́зе ра́дование.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 5.

Зря́, блаже́нне о́тче, я́ко си́ла Бо́жия в не́мощи соверша́ется, егда́ скорбя́щая вдови́ца Княги́ня Елисаве́та безбо́жнаго врага́ прости́ла е́сть и а́бие удали́лася ми́ра сего́, па́че вся́кия его́ добро́ты возлюби́вши Бо́гу и бли́жнему служи́ти, возгласи́л еси́ в се́рдце твое́м: Аллилу́иа.

И́кос 5.

Ви́дящи Вели́кая Ма́ти Елисаве́та, ка́ко чу́дно житие́ твое́ и доброхва́льно, потща́лася е́сть во глави́зну кано́на оби́тели своея́ словеса́ твоя́ положи́ти. Тогда́ воззва́ тя́ от преде́л Орло́вских, возглаша́ше си́це:

Ра́дуйся, я́ко коего́ждо бы́ти оби́телию Свята́го Ду́ха призыва́еши; ра́дуйся, я́ко непреста́нной моли́тве и трезве́нию науча́еши.

Ра́дуйся, словеса́ жи́зни ве́чныя вы́ну глаго́лавый; ра́дуйся, све́том Ева́нгелия свети́тися лю́ди твоя́ наста́вивый.

Ра́дуйся, я́ко о́браз Бо́жий во вся́ком челове́це почита́л еси́; ра́дуйся, я́ко подо́бие Бо́жие стяжа́ти ча́да твоя́ увещева́л еси́.

Ра́дуйся, со стра́хом Бо́жиим в До́м Госпо́день входи́вый; ра́дуйся, о поко́е свое́м неради́вый.

Ра́дуйся, увеселе́ние и отра́до к тебе́ прибега́ющих; ра́дуйся, служе́нию апо́стольскому поревнова́вый.

Ра́дуйся, я́ко о во́льных Страстя́х Госпо́дних никогда́же забыва́л еси́; ра́дуйся, Цари́цу Небе́сную, я́ко Игу́мению оби́тели твоея́ ублажа́л еси́.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 6.

Пропове́дника богоно́сна зря́ще тя́ орло́вская па́ства твоя́, ве́лиим рыда́нием и сто́ном объя́та бы́сть: не оста́ви на́с си́рых, о́тче возлю́бленнейший, восклица́ющи и вопию́щи го́рце: Аллилу́иа.

И́кос 6

Возсия́ све́т жития́ твоего́, гра́ды и ве́си держа́вы Росси́йския озаря́я. Та́ко испо́лнишася словеса́ Ева́нгельская, я́ко не подоба́ет свети́льнику под спу́дом стоя́ти, но на све́щнице все́м свети́ти. Те́мже тебе́, на вели́кое служе́ние во оби́тели свято́й призва́нному, воспева́ем си́це:

Ра́дуйся, двакра́ты от Го́спода отъя́тием десни́цы вразумле́нный; ра́дуйся, от ико́ны Пречи́стая Врата́рницы исцеле́нный.

Ра́дуйся, благослове́ние на но́вое служе́ние от духоно́сных ста́рцев испроси́вый; ра́дуйся, всеце́ло себе́ во́ле Бо́жией покори́вый.

Ра́дуйся, вся́ си́лы своя́ на свято́е послуша́ние положи́вый; ра́дуйся, послуша́нием смире́нным Вели́кую Княги́ню возвесели́вый.

Ра́дуйся, чистоты́ ума́ усе́рдный храни́телю; ра́дуйся, даро́в Свята́го Ду́ха приле́жный стяжа́телю.

Ра́дуйся, кади́ло благоуха́нное; ра́дуйся, сосу́де благода́ти избра́нный.

Ра́дуйся, кри́не ра́йский, в Росси́йстей земли́ прозя́бший; ра́дуйся, дре́во благосенноли́ственное, доброде́тельми украше́нное.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 7.

Хотя́ избра́нну хра́мину Ду́ха Свята́го себе́ сотвори́ти, восте́кл еси́, о́тче блаже́нне, во оби́тель сесте́р Ла́заревых все́м се́рдцем Бо́гу и бли́жним послужи́ти, совокупи́л еси́ обоя́: благу́ю ча́сть у́бо, я́ко Мари́я; в моли́тве, и ми́лостивую, я́ко Ма́рфа, в дея́нии, те́м же показа́л еси́ на́м пу́ть доброде́тели, при́сно глаго́ля: Аллилу́иа.

И́кос 7.

Ди́внаго служи́теля святы́х Ма́рфы и Мари́и ви́де тя́ блаже́нная Елисаве́та, умили́ся се́рдцем и возра́довася ду́хом, я́ко не оста́вил е́сть милосе́рдый Госпо́дь ю́ еди́ну, вопия́ше си́це:

Ра́дуйся, глаго́лом Госпо́дним стра́ждущих, утеша́яй; ра́дуйся, ева́нгельская словеса́ исполня́яй.

Ра́дуйся, позна́нию боже́ственных и́стин прему́дрый учи́телю; ра́дуйся, чистоты́ Правосла́вной ве́ры при́сный ревни́телю.

Ра́дуйся, в сове́тех николи́же па́ству свою́ не оставля́ли; ра́дуйся, ду́ши ча́д свои́х от страсте́й и грехо́в па́губных очища́яй.

Ра́дуйся, реки́й, я́ко си́лу Христо́ву не возмо́жет ничто́ поколеба́ти; ра́дуйся, я́ко сесте́р оби́тели в многотру́дных по́двизех укрепля́л еси́.

Ра́дуйся, я́ко те́х позна́ти не́мощь свою́ наставля́л еси́; ра́дуйся, я́ко словеса́: «без Мене́ не мо́жете твори́ти ничесо́же»,— возлюби́л еси́.

Ра́дуйся, и́нокиням духо́вный наста́вниче; ра́дуйся, и ны́не мона́шествующим ко спасе́нию путеводи́телю.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 8.

Стра́нно чу́до и пресла́вно сотвори́л е́сть Госпо́дь во дни́ земна́го жития́ твоего́, егда́ яви́ тя́ отрокови́це в со́нном виде́нии, вку́пе с многострада́льною Княги́нею Елисаве́тою, в ра́йских черто́зех поклоне́ние Небе́сному Жениху́ творя́щих, в ри́зы пресве́тлыя оде́яни и венцы́ нетле́нными увенча́ни, пою́ще Бо́гу: Аллилу́иа.

И́кос 8.

Ве́сь бе́ в ни́жних и вы́шних ника́коже отступи́ Преве́чное Сло́во. О́ле стра́шнаго та́инства, о́ле благоутро́бия Бо́жия, и́бо Госпо́дь кого́ предузна́, того́ и предызбра́, те́мже небе́сную сла́ву твою́ зря́ще, взыва́ем:

Ра́дуйся, на кре́ст испове́дничества от ю́ности предызбра́нный; ра́дуйся, мно́гими труды́ и скорбьми́ вы́шния селе́ния дости́гнувый.

Ра́дуйся, в го́рней оби́тели Ма́рфы и Мари́и пребыва́ющий; ра́дуйся, та́мо при́сно за ны́ моля́щийся.

Ра́дуйся, в бе́лыя оде́жды милосе́рдия и многострада́ния оде́янный; ра́дуйся, о гряду́щих страда́ниях за и́стину Го́сподом извеще́нный.

Ра́дуйся, с преподо́бным Се́ргием и свято́й Елисаве́тою Престо́лу Вы́шняго предстоя́щий; ра́дуйся, лице́м к Лицу́ Царя́ ца́рствующих зря́щий.

Ра́дуйся, в собо́ре новому́чеников и испове́дников просла́вленный; ра́дуйся, о земно́й сла́ве неради́вый, сла́вою небе́сною осия́нный.

Ра́дуйся, ты́ бо му́дрость ве́ка сего́ презре́л еси́; ра́дуйся, ты́ бо вы́сшую Му́дрость и И́стину Христа́ возлюби́л еси́.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 9.

Все́ естество́ а́нгельское удиви́ся, зря́ богоуго́дное житие́ твое́, свя́те, и́бо во пло́ти я́ко беспло́тен яви́лся еси́ и возмо́гл умертви́ти стра́сти грехо́вныя, целому́дрием и смире́нием ко́зни лука́ваго мироде́ржца побежда́я и того́ кова́рствия в ничто́же обраща́я, мы́ же такови́и труды́ твоя́ узре́вше, воспева́ем: Аллилу́иа.

И́кос 9.

Вети́я многовеща́нныя, я́ко ры́бы безгла́сныя ви́дим о тебе́, о́тче Се́ргие, недоуме́ют бо глаго́лати, ка́ко врази́ Христо́вы, де́рзостно хотя́щий оби́тель милосе́рдия разори́ти, узна́ша тя́ па́стыря до́браго и отца́ чадолюби́ваго, гра́да Орла́ ди́вное прозябе́ние, стыдо́м вели́ким объя́тыя, от а́гниц Бо́жиих отступи́ша. Мы́ же, чу́до таково́е ви́дяще, ве́рно вопие́м:

Ра́дуйся, Го́спода сла́вящий, вре́мя страда́лицам на покая́ние да́вшаго; ра́дуйся, я́ко от плене́нной Княги́ни попече́ние о сестра́х ея́ прия́л еси́.

Ра́дуйся, я́ко утеше́ние духо́вное скорбя́щим подава́л еси́; ра́дуйся, я́ко по́двиг и́ноческий пе́рвее вта́йне подъя́л еси́.

Ра́дуйся, святи́телем Ти́хоном на пу́ть мона́шеский благослове́нный; ра́дуйся, я́ко в а́нгельский чи́н с ра́достию и тре́петом обле́клся еси́.

Ра́дуйся, я́ко от того́ часа́ до сме́ртнаго обе́ты мона́шестии сохрани́л еси́; ра́дуйся, поноше́ния вся́ческая, я́коже обеща́, претерпе́л еси́.

Ра́дуйся, во пло́ти живы́й духо́вно, на земли́ небе́сно; ра́дуйся, би́сера драга́го Христа́ обреты́й.

Ра́дуйся, я́ко печа́льника росси́йскаго и́мя получи́л еси́; ра́дуйся, я́ко его́ путе́м моли́твою за Оте́чество ше́ствовал еси́.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 10

Спасти́ хотя́ от поруга́ния святы́ню, пропове́да сло́во пастыренача́льника Христо́ва святи́теля Ти́хона: не досто́ит бо отдава́ти Ча́шу Госпо́дню на попра́ние. Те́мже и сподо́бися пострада́ти я́ко испове́дник, воспева́я вы́ну: Аллилу́иа.

И́кос 10.

Стена́ бы́л еси́, о́тче, все́м прибега́ющим к тебе́ с ве́рою, утеше́ние подава́ти все́м скорбя́щим и озло́бленным, во дни́ безбо́жных гоне́ний и́стинных па́стырей лише́нным. Те́мже и на́м, к тебе́ приходя́щим и ми́лостиваго твоего́ заступле́ния у Влады́ки Небе́снаго прося́щим, бу́ди по́мощь и забра́ло кре́пкое, вопию́щим такова́я:

Ра́дуйся, пра́вил седьми́ Вселе́нских Собо́ров храни́телю; ра́дуйся, сто́лпе непоколеби́мый Правосла́вия.

Ра́дуйся, о́бразе вели́каго терпе́ния; ра́дуйся, прогони́телю вра́жеских сомне́ний.

Ра́дуйся, ты́ бо у́зы темни́чныя ра́достно претерпе́л еси́; ра́дуйся, сла́ва Бо́гу за все́ вы́ну восклица́л еси́.

Ра́дуйся, под Покро́вом Пресвяты́я Влады́чицы житие́ твое́ соверши́л еси́; ра́дуйся, Ея́же води́тельством в тверски́я преде́лы пресели́лся еси́.

Ра́дуйся, я́ко и во изгна́нии твое́м гони́мыя ча́да собра́л еси́; ра́дуйся, от сея́ земли́ к Небе́сным оби́телем преста́вился еси́.

Ра́дуйся, и по преставле́нии твое́м на́с не оставля́ющий; ра́дуйся, явле́нием моще́й твои́х на́с укрепля́ющий.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 11.

Пе́ние всеусе́рдное прино́сим ти́, Се́ргие испове́дниче, ка́ко возмо́гл еси́ претерпе́ти толи́кия непра́вды и попра́ния, лише́ния и изгна́ния, равночи́сленная бо песка́ морска́го поруга́ния, воспева́я си́це: Аллилу́иа.

И́кос 11.

Светопода́тельна свети́льника зри́м тя́, Се́ргие свя́те, егда́ ты́ во изгна́нии су́щий, невеще́ственный о́гнь моли́твы Иису́совой в се́рдце свое́м нося́й, возсыла́л еси́ хвалу́ Творцу́ вся́ческих, те́мже почита́ем тя́ си́це:

Ра́дуйся, со смире́нием суровство́ пине́жскаго изгна́ния восприя́вый; ра́дуйся, и в се́м изгна́нии посеще́нием ча́д твои́х уте́шенный.

Ра́дуйся, я́ко та́мо в ста́рости твое́й тя́жкия труды́ претерпе́л еси́; ра́дуйся, я́ко по́мощи Бо́жией ди́вно сподо́бился еси́.

Ра́дуйся, в гоне́ниих моли́твенниче непреста́нный; ра́дуйся, свы́ше от Засту́пницы Усе́рдной уте́шенный.

Ра́дуйся, я́ко бре́мя скорбе́й при́сных твои́х поне́сл еси́; ра́дуйся, и во у́зах по́двига ста́рчества не оста́вил еси́.

Ра́дуйся, высото́ духо́внаго прозре́ния; ра́дуйся, глубино́ боже́ственнаго смире́ния.

Ра́дуйся, восше́дый на высоту́ небе́сных доброде́телей; ра́дуйся, вся́ земна́я во уме́ты вмени́вый.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 12.

Благода́ть да́ти восхоте́в, уще́дри тя́ Госпо́дь да́ром моли́твы непреста́нной, Небеса́ отверза́ющей. Мы́ же, зря́ще мно́жество чуде́с твои́х, и́миже изгна́ние твое́ облагоуха́л еси́, то́ки ди́вных исцеле́ний, оби́димых ско́рое заступле́ние, от наше́ствия иноплеме́нник ве́си своея́ пресла́вное избавле́ние, воспева́ем ти́: Аллилу́иа.

И́кос 12.

Пою́ще твое́ успе́ние, хва́лим тя́ вси́, я́ко одушевле́нный хра́м Ду́ха Свята́го: ты́ бо в житии́ свое́м просла́ви Пресвяту́ю Тро́ицу, показу́я и́стинный о́браз преподо́бия и пра́вды. Научи́ и на́с, многогре́шных, непрело́жно во́лю Бо́жию твори́ти, вопию́щих ти́:

Ра́дуйся, по отше́ствии твое́м те́плый за ны́ хода́таю; ра́дуйся, я́ко пти́цы се́льныя на небеса́ отше́ствие твое́ воспева́ху.

Ра́дуйся, росси́йский земли́ небе́сный моли́твенниче; ра́дуйся, я́ко явле́нием святы́х моще́й твои́х зе́млю тверску́ю озари́л еси́.

Ра́дуйся, я́ко те́х благоуха́нием Бо́га просла́вил еси́; ра́дуйся, я́ко сподо́бил еси́ на́с нетле́нныя твоя́ мо́щи лобыза́ти.

Ра́дуйся, многоразли́чныя чудеса́ излива́ющий; ра́дуйся, лени́выя на моли́тву подвига́ющий.

Ра́дуйся, разсла́бленныя ду́хом к покая́нию обраще́ние; ра́дуйся, све́та Ева́нгельскаго при́сное озаре́ние.

Ра́дуйся, кре́пкое на́ше заступле́ние; ра́дуйся, неусы́пный в ско́рбех помо́щниче.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 13.

О, преди́вный и пресла́вный, но́вый чудотво́рче, достохва́льный испове́дниче, о́тче на́ш Се́ргие! Приими́ ны́не ма́лое моле́ние сие́ на́ше, во умиле́нии серде́ц тебе́ возноси́мое, и умоли́ Го́спода на́шего Иису́са Христа́, да изба́вит ны́ от вся́кия напа́сти вра́жия, от наше́ствия иноплеме́нник и междоусо́бныя бра́ни, и сподо́бит на́с в непреста́нной моли́тве и покая́нии ве́ру Правосла́вную до конца́ сохрани́ти и гряду́щая в Небесе́х блага́я улучи́ти, воспева́я Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельским горе́нием восхоте́вый, преподо́бне, от ю́ности бли́жнему послужи́ти, а́ще и недосто́йна себе́ во глубо́цем смире́нии па́стырства духо́внаго зря́, оба́че име́яй те́плаго засту́пника, святи́теля Митрофа́на Воро́нежскаго, яковы́й в виде́нии сна́ тебе́ благословля́ше, обре́л еси́ благода́ть предстоя́ти Престо́лу Госпо́дню. Мы́ же, таково́е промышле́ние Бо́жие о тебе́ ви́дяще, си́це рце́м:

Ра́дуйся, от пеле́н сосу́дом избра́нным Свята́го Ду́ха бы́ти предусмо́тренный; ра́дуйся, от младе́нства на слу́жбу Царю́ Сла́вы при́званный.

Ра́дуйся, изде́тска по́ст возлюби́вый; ра́дуйся, сы́не утеше́ния и ча́до послуша́ния.

Ра́дуйся, я́ко измла́да стра́ждущим порабо́тати возжела́л еси́; ра́дуйся, я́ко в чужде́й стране́ в Правосла́вии укрепи́лся еси́.

Ра́дуйся, о поко́е свое́м неради́вый; ра́дуйся, всего́ себе́ в ру́це Бо́жий преда́вый.

Ра́дуйся, вразумле́ние у небе́снаго твоего́ покрови́теля проси́вый; ра́дуйся, я́ко у святы́х его́ моще́й благода́ть свяще́нства получи́вый.

Ра́дуйся, служи́телю Свята́я Святы́х изря́дный; ра́дуйся, Цари́цы Небе́сной почита́телю при́сный.

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Конда́к 1.

Избра́ннаго Бо́жиим веле́нием на кре́ст па́стырскаго служе́ния, моли́твенника изря́днаго и уте́шителя те́плаго, пра́ведных Ма́рфы и Мари́и усе́рднаго почита́теля, Ра́донежскому чудотво́рцу соиме́нника и испове́дника, преподо́бнаго отца́ на́шего Се́ргия почти́м, я́ко име́яй дерзнове́ние ко Го́споду от вся́ких на́с бе́д свобожда́ти и на пу́ть покая́ния направля́ти, в пе́снех немо́лчно вопию́щих:

Ра́дуйся, преподобноиспове́дниче Се́ргие, па́стырю до́брый и усе́рдный моли́твенниче.

Моли́тва.

О свяще́нная главо́, преблаже́нне о́тче Се́ргие, па́стырю святы́й, моли́твенниче неусы́пный, серафи́мскою любо́вию ко Го́споду горя́щий; ты́, бо я́ко еди́н от дре́вних яви́лся еси́, вы́ну Христу́ предстоя́й. Не отри́ни на́с, немощны́х, не дерза́ющих возвести́ очеса́ на не́бо; услы́ши, о́тче свяще́ннейший, неотсту́пная проше́ния на́ша, и вознеси́ я́ от на́с, до́лу пони́кших, ко престо́лу Пресвяты́я Тро́ицы, да сохрани́т милосе́рдый Госпо́дь Це́рковь свою́ святу́ю от раско́лов и ересе́й, да изба́вит держа́ву на́шу росси́йскую от вра́г ви́димых и неви́димых и пода́ст все́м, ра́це честны́х твои́х моще́й предстоя́щим и моля́щимся тебе́, по коего́ждо потре́бе: па́стырем благоче́стие и апо́стольскую ре́вность, и́ноком покая́ние и в моли́тве пребыва́ние, во́ином му́жество и любы́ ко оте́честву, боля́щим благодаре́ние и ско́рое вспоможе́ние, и все́м на́м непоро́чное во стра́се бо́жием жи́тельство; да и мы́, недосто́йнии, сподо́бимся предста́тельством твои́м Ду́ха Свята́го испо́лнитися, по отше́ствии свое́м лю́тых мыта́рств изба́витися и блаже́нный о́ный гла́с Влады́ки Христа́ услы́шати: «Прииди́те, благослове́ннии Отца́ Моего́, насле́дуйте угото́ванное ва́м ца́рствие от сложе́ния ми́ра». Ами́нь.

Yandex Metrika