Конда́к 1.

Избра́нный и ди́вный в житии́ и чудесе́х уго́дниче Бо́жий, святы́й блаже́нный Проко́пие, пе́сньми духо́вными любо́вию восхваля́ем тя́, небе́снаго засту́пника на́шего и мо́лим ти́ ся́ приле́жно: я́ко име́яй дерзнове́ние ко Го́споду, моли́твами твои́ми от вся́ких на́с бе́д свобожда́й, да зове́м ти́:

Ра́дуйся, святы́й блаже́нный Проко́пие, вели́кий и пресла́вный чудотво́рче.

И́кос 1.

А́нгел во пло́ти бы́л еси́, свя́те Проко́пие, егда́ я́ко юро́д Христа́ ра́ди на земли́ явля́лся еси́, да от люде́й свя́тость жития́ твоего́ утаи́ши, безче́стием же вся́ческим ве́чную сла́ву на Небеси́ улучи́ти сподо́бишася. Сего́ ра́ди ублажа́ем тя́ си́ми хвале́бными глаго́лы:

Ра́дуйся, от земли́ Оте́чествия твоего́ спасе́ния ра́ди в зе́млю Росси́йскую смотре́нием Бо́жиим приведе́нный; ра́дуйся, от ку́пли жите́йския к ку́пле духо́вной промышле́нием Его́ обраще́нный.

Ра́дуйся, в Вели́цем Нове́граде све́том ве́ры правосла́вныя озаре́нный; ра́дуйся, заблужде́ние ерети́ческаго иносла́вия дале́че от себе́ отри́нувый.

Ра́дуйся, во оби́тели Ху́тынстей благоче́стию христиа́нскому до́бре навыки́й; ра́дуйся, наставле́нием ста́рца духо́внаго в правосла́вии кре́пко утверди́выйся.

Ра́дуйся, бога́тство твое́ земно́е хра́мом Бо́жиим и ни́щым ижди́вый; ра́дуйся, в во́льней нищете́ пребыва́ти изво́ливый.

Ра́дуйся, в Вели́кий У́стюг я́ко ни́щ и стра́нен прише́дый; ра́дуйся, юро́дственное житие́ в не́м проходи́вый.

Ра́дуйся, от неразу́мных посмева́емь, поруга́емь и бие́н я́ко юро́д бы́вый; ра́дуйся, терпе́нием ве́лиим и смире́нием соверше́нным ду́шу твою́ к подвиго́м угото́вавый.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 2.

Ви́дев благоле́пие хра́мов Бо́жиих в вели́цем Нове́граде, и красоту́ слу́жбы церко́вныя, уязви́лся еси́, Проко́пие блаже́нне, любо́вию к правосла́вней ве́ре Христо́вой, и сию́ не позна́ти то́кмо, но и испо́лнити восхоте́в, в оби́тель преподо́бнаго Варлаа́ма Ху́тынскаго прише́л еси́, и от игу́мена о́ныя наста́влен бы́в, до́бре позна́л еси́ догма́ты святы́я ве́ры, и ве́рен ея́ испове́дник яви́лся еси́, зовы́й в Тро́ице еди́ному Бо́гу: Аллилу́иа.

И́кос 2.

Ра́зум просвеще́н от Бо́га имы́й, до́бре суету́ и тле́нность сокро́вищ ми́ра сего́ уразуме́л еси́, Проко́пие богому́дре, и ку́плю земну́ю оста́вль, вся́ стяжа́ния твоя́ хра́мом Бо́жиим, оби́телем и́ноческим и ни́щым расточи́л еси́, са́м ни́щ бы́в, да бога́тому в ми́лости Христу́ Бо́гу послу́жиши невозбра́нне, те́мже слы́шиши от на́с сия́ похвалы́:

Ра́дуйся, ку́плю вре́менную на ве́чную му́дре премени́вый; ра́дуйся, Христа́ ра́ди нищету́ во́льную избра́вый.

Ра́дуйся, рука́ми ни́щих на не́бо сокро́вища твоя́ предпосла́вый; ра́дуйся, и́го Христо́во ра́достно душе́ю на ся́ восприя́вый.

Ра́дуйся, алка́вый и жажда́вый на земли́, да пи́щи нетле́нныя и пития́ духо́внаго наслади́шися на небеси́; ра́дуйся, юро́дствовавый пред челове́ки, да ликовству́еши со а́нгелы.

Ра́дуйся, вся́кое упокое́ние плотско́е возненави́девый; ра́дуйся, в раздра́нней ве́тсей ри́зе ходи́вый.

Ра́дуйся, плещи́ твоя́ на ударе́ния вда́вый; ра́дуйся, лани́ты твоя́ от зауше́ний не отврати́вый.

Ра́дуйся, оскорбле́ния и оплева́ния кро́тце и незло́биве терпе́вый; ра́дуйся, за оскорбля́ющих тя́ Бо́гу моли́выйся.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 3.

Си́лою Го́спода Си́л укрепля́емь, мра́з и зно́й до́бльственне претерпе́л еси́, Проко́пие блаже́нне, полуна́г, во еди́ней ри́зе ле́то и зи́му обходя́й сто́гны вели́каго У́стюга, не имы́й ме́ста, где́ главу́ приклони́ти, то́кмо в притво́ре собо́рнаго Пресвяты́я Богоро́дицы хра́ма нище́тне пребыва́яй, иде́же при́сно пе́л Христу́ Бо́гу: Аллилу́иа.

И́кос 3.

Име́л еси́, свя́тче Бо́жий, ве́лие терпе́ние и незло́бие, па́мятуя бо распе́ншагося на́с ра́ди Христа́, о распина́телех свои́х ко Отцу́ моли́вшася, и ты́ о оскорбля́ющих и бию́щих тя́ те́пле моли́лся еси́, я́ко о благоде́телех твои́х. Те́мже наста́ви и на́с не памятозло́бствовати, но в кро́тости ду́ха вопи́ти к тебе́ такова́я:

Ра́дуйся, словеса́ апо́стола Па́вла: «мы́ у́бо бу́и Христа́ ра́ди», де́лы твои́ми извести́вый; ра́дуйся, пе́рвый в Росси́йстей стране́ юро́дства Христа́ ра́ди по́двиг на ся́ прия́вый.

Ра́дуйся, вели́ким пра́ведником Симео́ну и Андре́ю Христа́ ра́ди юро́дивым, ве́рно подража́вый; ра́дуйся, подо́бно и́м поруга́ния и бие́ния претерпе́вый.

Ра́дуйся, на высоту́ безстра́стия восше́дый; ра́дуйся, во глубину́ смире́ния прини́кий.

Ра́дуйся, кро́ткий Христо́в после́дователю; ра́дуйся, незло́бивый о оскорбля́вших тя́ предста́телю.

Ра́дуйся, ангелонра́вный челове́че; ра́дуйся, зри́мый в ми́ре оба́че от ми́ра сокрове́нный подви́жниче.

Ра́дуйся, Пресвяты́я Богоро́дицы избра́нный слуго́; ра́дуйся, ми́лостей и щедро́т Ея́ усе́рдный просла́вителю.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 4.

Бу́ря гне́ва Бо́жия на́йде на гра́д У́стюг, гро́м и мо́лния, и о́гненный до́ждь с небесе́ по́сланы бы́ша во истребле́ние гра́ду, грехи́ свои́ми Го́спода прогне́вавшему: но ты́, свя́те Проко́пие, яви́лся еси́ уми́лостивитель гне́ва Бо́жия, подвиза́я бли́жния твоя́ к покая́нию, слеза́м и моли́тве, да си́ми прекло́нят на ми́лость прогне́ваннаго Влады́ку небесе́ и земли́, Ему́же в моли́твах усе́рдне взыва́л еси́: Аллилу́иа.

И́кос 4.

Слы́шавше гро́м с небесе́ и ви́девше мо́лнию и о́блаки огневи́дныя, до́ждь о́гнен на гра́д и́х извести́ хотя́щыя, жи́тели гра́да, в стра́се ве́лием, притеко́ша в собо́рный хра́м Богома́тере и та́мо обрето́ша тя́, свя́те Проко́пие, со слеза́ми моля́щяся пред ико́ною честна́го Ея́ Благове́щения о спасе́нии гра́да ма́терними Ея́ ко Го́споду моли́твами. Те́мже о спасе́нных предста́тельством твои́м досто́ит зва́ти тебе́:

Ра́дуйся, благоприя́тный ко Го́споду моли́твенниче; ра́дуйся, слеза́ми моли́твенными о́гнь гне́ва Бо́жия угаси́вый.

Ра́дуйся, прогне́ваннаго Созда́теля вся́ческих на ми́лость к лю́дем согреши́вшым преклони́вый; ра́дуйся, ру́це твои́ святы́я ко Го́споду на умоле́ние со упова́нием простира́вый.

Ра́дуйся, Пресвяту́ю Влады́чицу Богоро́дицу в помо́щницу моли́твам твои́м призва́вый; ра́дуйся, ма́терним Ея́ предста́тельством ко Христу́ Бо́гу, ту́чи гне́ва Небе́снаго отврати́вый.

Ра́дуйся, гра́д согреши́вший к покая́нию призва́вый; ра́дуйся, от ги́бели о́гненныя ди́вно его́ изба́вивый.

Ра́дуйся, пра́ведниче, его́же ра́ди поми́лова Госпо́дь мно́гия гре́шники; ра́дуйся, посре́дниче между́ Бо́гом и согреши́вшими челове́ки.

Ра́дуйся, покая́ния пропове́дниче немо́лчный; ра́дуйся, благоче́стия наста́вниче нелицеприя́тный.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 5.

Богото́чный исто́чник ми́ра благоуха́нна источи́ся от святы́я ико́ны Благове́щения Пресвяты́я Богоро́дицы, пред не́юже со слеза́ми моли́лся еси́, блаже́нне Проко́пие, в собо́рнем хра́ме со все́ми людьми́: и се́ а́бие ту́чи о́гненныя от гра́да У́стюга уклони́шася в пусты́нныя места́, и та́мо ка́мение о́гненное одожди́ша, не вреди́вше никого́же от люде́й. Помина́юще у́бо ве́лие сие́ милосе́рдия Бо́жия чу́до, со благогове́нием зове́м чуде́с Творцу́ Бо́гу: Аллилу́иа.

И́кос 5.

Ви́девше лю́дие У́стюжстии спасе́ние свое́ от ги́бели о́гненныя, и исто́чник ми́ра, теку́щий чуде́сне от ико́ны Богома́тере, в ра́достный тре́пет приидо́ша, и благодари́ша Бо́га и Пречи́стую Богоро́дицу со слеза́ми. Мы́ же тебе́, свя́те Проко́пие, я́ко вино́вника таково́й ми́лости Бо́жией и усе́рднаго о ни́х моли́твенника, ублажа́ем зва́нии си́ми:

Ра́дуйся, во смире́нии твое́м высо́кая дарова́ния небе́сная стяжа́вый; ра́дуйся, нището́ю во́льною бога́тство чуде́с свы́ше прия́вый.

Ра́дуйся, я́ко Моисе́й о лю́дех гра́да У́стюга со дерзнове́нием пред Бо́гом хода́тайствовавый; ра́дуйся, я́ко Иереми́а с пла́чем ве́лием лю́ди У́стюжстии к покая́нию призва́вый.

Ра́дуйся, сле́з твои́х тече́ньми, тече́ние ми́ра благода́тнаго от ико́ны Богома́тере испроси́вый; ра́дуйся, я́же из глубины́ воздыха́ньми, дыха́ние ту́ч о́гненных безвре́дно лю́дем сотвори́вый.

Ра́дуйся, стра́хом гне́ва Бо́жия лю́ди ненака́занныя уцелому́дривый; ра́дуйся, я́ко Ио́на ниневи́тяном, лю́дем У́стюжским во спасе́ние послужи́вый.

Ра́дуйся, я́ко ка́мение в пусты́ни, с небесе́ спа́дшее, до дне́сь моли́тв твои́х де́йство свиде́тельствует; ра́дуйся, я́ко ка́мение сие́, от ро́да в ро́д, ве́лие заступле́ние твое́ гра́ду У́стюгу я́сно зна́менует.

Ра́дуйся, я́ко дре́вним проро́ком Бо́жиим си́лою чуде́с уподо́бился еси́; ра́дуйся, я́ко любо́вию к Бо́гу и бли́жним новозаве́тным пра́ведником поревнова́л еси́.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 6.

Пропове́дует при́сно Вели́кий У́стюг вели́кое заступле́ние твое́, Проко́пие богоблаже́нне, и све́тло красу́ется, стяжа́в тя́ помо́щника и покрови́теля себе́. Мо́лим у́бо тя́, свя́те, не лиши́ и на́с гре́шных твоея́ небе́сныя по́мощи и покро́ва моли́тв твои́х: тебе́ бо благонаде́жно са́ми себе́ и дру́г дру́га вверя́ем, и во умиле́нии глубо́цем воспева́ем просла́вльшему тя́ Царю́ Сла́вы, Христу́ Бо́гу: Аллилу́иа.

И́кос 6.

Возсия́л еси́ во гра́де У́стюзе преди́вным житие́м твои́м, преподо́бне Проко́пие, я́ко звезда́ богосве́тлая, и луча́ми чуде́с твои́х всю́ страну́ Росси́йскую благода́тне озаря́еши: та́ко просла́ви тя́ во смире́нии твое́м Христо́с Бо́г, прославля́ющыя Его́ прославля́яй, не на небеси́ то́кмо, но и на земли́, и́же и на́с научи́ вопи́ти тебе́ си́це:

Ра́дуйся, до́брый ревни́телю по́двигов духо́вных; ра́дуйся, юро́дством Христа́ ра́ди от челове́к сия́ утаева́вый.

Ра́дуйся, свеще́, тму́ нече́стия просвеща́ющая; ра́дуйся, лампа́до, еле́й ми́лости Бо́жия излива́ющая.

Ра́дуйся, пра́вило ве́ры в зна́мениих и чудесе́х явля́емое; ра́дуйся, о́бразе кро́тости, любо́вию о Христе́ не́мощи челове́ческия покрыва́ющия.

Ра́дуйся, наде́ждою Ца́рствия Бо́жия злострада́ния земна́я в сла́дость себе́ претвори́вый; ра́дуйся, в любви́ боже́ственней, я́же е́сть соу́з соверше́нства, благода́тию Бо́жией утвержде́нный.

Ра́дуйся, да́ры Свята́го Ду́ха обогаще́нный; ра́дуйся, терпели́вый в ско́рбех.

Ра́дуйся, благоду́шествуяй в поноше́ниих; ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 7.

Хоте́ние еди́но име́л еси́, свя́те Проко́пие, да утаи́ши от челове́к богоуго́дное житие́ твое́ и по́двиги духо́вныя, чесо́ ра́ди при́сно юро́дствовал еси́ во дни́ на сто́гнах гра́да У́стюга, посмея́ния, оскорбле́ния и зауше́ния прие́мляй от челове́к неразу́мных, о юро́дстве твое́м глуми́вшихся, но́щи же во бде́ниих и моли́твах в притво́ре собо́рнаго хра́ма Богома́тере проводи́л еси́, при́сно воспева́я ро́ждшемуся от Нея́ Спа́су ми́ра: Аллилу́иа.

И́кос 7.

Но́ваго вои́стинну проро́ка, и ди́внаго прозорли́вца яви́ тя́ Госпо́дь лю́дем у́стюжским: мно́зи бо благогове́йнии лю́дие, позна́вше богоуго́дное и пра́ведное житие́ твое́, и в юро́дстве твое́м высо́кую му́дрость духо́вную уразуме́вше, послу́шаху слове́с твои́х, я́ко слове́с вели́каго уго́дника Бо́жия, ему́же досто́ит пе́ти такова́я:

Ра́дуйся, прови́дче, о́бразы мно́гими гряду́щая юро́дственне предвозвеща́вый; ра́дуйся, си́ми благопло́дие и непло́дие земли́ на по́льзу лю́дем предзнаменова́вый.

Ра́дуйся, прозорли́вче, сокрове́нная серде́ц челове́ческих ду́хом Бо́жиим прозира́вый; ра́дуйся, ко вразумле́нию слы́шащих сия́ и́м покая́ния ра́ди открыва́вый.

Ра́дуйся, та́йных беззако́ний обличи́телю; ра́дуйся, гро́зный нераска́янных гре́шников кара́телю.

Ра́дуйся, небоя́зненный си́льным ми́ра суда́ Бо́жия провозве́стниче; ра́дуйся, оби́димых и гони́мых засту́пниче.

Ра́дуйся, в ю́ной отрокови́це бу́дущую ма́терь вели́каго святи́теля и просвети́теля Пе́рми Стефа́на прозре́вый; ра́дуйся, сие́ вои́стинну нело́жно о не́й предсказа́вый.

Ра́дуйся, о пла́вающих в ладия́х по реце́ Су́хоне усе́рдныя моли́твы приноси́вый; ра́дуйся, обурева́емым волна́ми пла́вание благопоспе́шно моли́твами твои́ми устро́ивый.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 8.

Стра́нен и юро́д Христа́ ра́ди бы́в не обрета́ше блаже́нный Проко́пие еди́ною, зиме́ лю́тей су́щей, кро́ва к согре́янию отме́рзшия пло́ти своея́: тогда́ Человеколю́бец Госпо́дь посла́ а́нгела своего́ с ве́твию цвето́в ра́йских, е́юже прикосну́вся к лицу́ блаже́ннаго, теплоту́ живи́тельную вдохну́ в хла́дное те́ло его́, и та́ко согре́т бы́в, и ожи́в ра́дуяся, возопи́ а́нгелов и челове́ков Влады́це Бо́гу: Аллилу́иа.

И́кос 8.

Ве́сь Бо́гу прилепи́лся еси́ любо́вию, Проко́пие достоблаже́нне: те́мже и Бо́г бе́ с тобо́ю, по нело́жному обетова́нию своему́. Сего́ ра́ди, любо́вию чту́ще тя́, ве́рный уго́дниче Христо́в, по до́лгу ублажа́ем тя́ пе́нии си́ми:

Ра́дуйся, а́нгелов ра́дование; ра́дуйся, челове́ков удивле́ние.

Ра́дуйся, му́жу жела́ний духо́вных; ра́дуйся, собесе́дниче си́л безпло́тных.

Ра́дуйся, вра́вие ра́йское от а́нгела прия́вый; ра́дуйся, благоуха́нием о́наго оживле́нный.

Ра́дуйся, от мра́за лю́таго неврежде́нный; ра́дуйся, теплото́ю благода́тною согре́тый.

Ра́дуйся, благи́й се́рдцем; ра́дуйся, кро́ткий нра́вом.

Ра́дуйся, все́ упова́ние твое́ на Го́спода возложи́вый; ра́дуйся, во упова́нии твое́м непосрамле́нный.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 9.

А́нгели Небе́снии дивля́хуся ви́дяще твое́ многострада́льное житие́, Проко́пие преподо́бне, и са́м Влады́ка и Ца́рь а́нгелов Христо́с Госпо́дь осени́ тя́ благода́тию свое́ю боже́ственною, ея́же зна́мением бы́ша чудеса́, тобо́ю соверше́нныя во сла́ву и́мени Его́ Свята́го, о ни́хже лю́дие у́стюжстии прославля́ху просла́вльшаго тя́ Бо́га, вопию́ще Ему́: Аллилу́иа.

И́кос 9.

Вети́и челове́честии не мо́гут пости́гнути глубину́ прему́дрости Бо́жией, я́ко не прему́дрых ми́ра сего́, но бу́их о Христе́, избира́ет Бо́г в жили́ще благода́ти своея́, сия́ та́ко о тебе́ сбы́вшаяся ви́дяще, свя́те Проко́пие, я́ко ве́лия таи́нника Пресвяты́я Тро́ицы тя́ почита́ем, и любо́вию от се́рдца возглаша́ем ти́ благохвале́ния сицева́я:

Ра́дуйся, обетова́ний ева́нгельских насле́дниче; ра́дуйся, преда́ний апо́стольских после́дователю.

Ра́дуйся, му́дрый стра́нниче, иски́й Го́рняго Оте́чествия; ра́дуйся, Бо́жий избра́нниче, восше́дый на высоту́ соверше́нства духо́внаго.

Ра́дуйся, бу́йством о Христе́ прему́дрость небе́сную стяжа́вый; ра́дуйся, лише́нии вре́менными дово́льство ве́чное искупи́вый.

Ра́дуйся, я́ко зла́то в горни́ле огне́м скорбе́й искуше́нный; ра́дуйся, я́ко сребро́ чи́стое пред оча́ми Бо́жиими я́вльшийся.

Ра́дуйся, в му́жестве непоколеби́мый; ра́дуйся, в терпе́нии благоиску́сный.

Ра́дуйся, кро́тостию зло́бу побежда́вый; ра́дуйся, во еди́нем Бо́зе утеше́ние обрета́вый.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 10.

Спасе́ния наде́жду стяжа́в и от а́нгела Бо́жия о кончи́не свое́й извеще́н бы́в, почи́ блаже́нный о Го́споде сно́м сме́ртным пред враты́ оби́тели Арха́нгельския в У́стюзе, сотаи́нником и друго́м его́ о Христе́, преподо́бным Киприа́ном созда́нныя, душе́ю же свое́ю свято́ю воспари́ ко оби́телем небе́сным, иде́же ны́не со а́нгельскими ли́ки вы́ну пое́т Бо́гу: Аллилу́иа.

И́кос 10.

Царя́ Небе́снаго Христа́ ве́рный ра́б бы́л еси́, Проко́пие свя́те, от Него́же чудесы́ мно́гими просла́влен еси́, я́ко и са́мый гро́б тво́й, исто́чник исцеле́ний показа́ся, к нему́же неду́жнии с ве́рою притека́юще, здра́вие получа́ху, и тя́, я́ко ми́лостиваго и безме́зднаго цели́теля прославля́ху, зову́ще и глаго́люще:

Ра́дуйся, свя́тче Бо́жий, со святы́ми почива́яй и о гре́шных Бо́га умоля́яй; ра́дуйся, уго́дниче Христо́в, да́ры исцеле́ний боля́щым подава́яй.

Ра́дуйся, кончи́ною свято́ю пресели́выйся от земли́ на не́бо; ра́дуйся, от го́рних высо́т на зе́млю к прося́щым твоего́ заступле́ния ми́лостивно приника́яй.

Ра́дуйся, разсла́бленных благода́тный укрепи́телю; ра́дуйся, беснова́тых от наси́лия диа́вола свободи́телю.

Ра́дуйся, покры́тых я́звами чуде́сне врачева́вый; ра́дуйся, тя́жкими неду́ги одержи́мых и в неча́янии бы́вших па́ки в здра́вие приводи́вый.

Ра́дуйся, бли́жним и да́льним ра́вно ми́лостивно благотвори́вый; ра́дуйся, гро́б тво́й все́м притека́ющым к нему́ ве́рным враче́бницу неду́гов показа́вый.

Ра́дуйся, гра́да У́стюга неотсту́пный храни́телю; ра́дуйся, чту́щих святу́ю па́мять твою́ небе́сный покрови́телю.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 11.

Пе́ние моле́бное соверша́яй у гро́ба твоего́, боля́щий Григо́рий, огне́вицею зе́льною обдержи́м бы́сть, егда́ то́чию косну́вся целе́бней ра́це твое́й, чудотво́рче святы́й Проко́пие, а́бие здра́в бы́сть, и́н же боля́й, боля́рин Влади́мир, его́же все́ те́ло я́звами покрове́но бы́сть, еди́ным ше́ствием святы́я ико́ны твоея́ исцеле́ние соверше́нное прия́т, те́мже о́ба просла́виста Бо́га, Ди́внаго во святы́х свои́х, благода́рне пою́ще Ему́: Аллилу́иа.

И́кос 11.

Све́тлостию чуде́с твои́х, уго́дниче Бо́жий, я́ко свети́ло путево́дное сия́еши все́м, хотя́щым благоче́стно о Христе́ жи́ти, не потерпе́л бо еси́ мертвецу́ не́коему, нечести́во жи́вшу, бли́з гро́ба твоего́ погребе́ну бы́ти, но зна́мением не́киим ди́вным уда́лил еси́ от себе́, да науча́тся вси́ бе́гати скве́рн греха́. Сего́ ра́ди обита́лище тя́ Ду́ха Бо́жия бы́ти уве́девше, зове́м ти́ такова́я:

Ра́дуйся, ве́ры Христо́вы плоды́ благода́тныя в себе́ яви́вый; ра́дуйся, я́ко со́лнце в доброде́телех просия́вый.

Ра́дуйся, в крестоноше́нии преуспе́вый; ра́дуйся, все́ житие́ твое́ во угожде́ние Бо́гу посвяти́вый.

Ра́дуйся, во благоуха́нии святы́ни опочи́вый; ра́дуйся, от гро́ба твоего́ жи́знь нетле́ния извести́вый.

Ра́дуйся, я́ко ра́ка твоя́ честна́я исто́чник исцеле́ний неду́гующым показа́ся; ра́дуйся, я́ко вси́ приходя́щии к не́й с ве́рою, благода́тию освяще́ни быва́ют.

Ра́дуйся, врачу́ все́м подаю́щий многоразли́чныя исцеле́ния; ра́дуйся, страны́ Росси́йския духо́вное украше́ние.

Ра́дуйся, гра́да У́стюга благонаде́жное утвержде́ние; ра́дуйся, от бе́д и скорбе́й и смертоно́сных неду́гов ско́рое избавле́ние.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 12.

Благода́ть Бо́жию свы́ше испроси́ на́м вели́кий уго́дниче Бо́жий, блаже́нный и пра́ведный Проко́пие, и бу́ди о на́с усе́рдный моли́твенник ко Го́споду, да утверди́вшеся в за́поведех Госпо́дних, дости́гнем спасе́ния ве́чнаго, и та́ко и на земли́ живы́х и в Ца́рствии Небе́снем вы́ну пое́м Бо́гу: Аллилу́иа.

И́кос 12.

Пое́м ди́вное житие́ твое́ и пресла́вная чудотворе́ния твоя́, святы́й пра́ведный Проко́пие, моли́твенно почита́ем святу́ю па́мять твою́, я́ко от оби́телей го́рних к на́м ми́лостиво призира́еши, и благода́тно посеща́еши, ущедря́я да́ры духо́вными ублажа́ющих тя́ си́ми похвала́ми:

Ра́дуйся, Пресвяты́я Тро́ицы благода́тию освяще́нный; ра́дуйся, Пресвяты́я Богоро́дицы покро́вом осене́нный.

Ра́дуйся, алава́стре ми́ра целе́бнаго; ра́дуйся, сокро́вищнице даро́в Бо́жия благода́ти.

Ра́дуйся, благосе́рдый предста́телю, боля́щаго о́трока ми́лостивно исцели́вый; ра́дуйся, ско́рый помо́щниче, жену́ не́кую от пле́на ага́рянскаго свободи́вый.

Ра́дуйся, кре́пкий к Бо́гу хода́таю, пресви́тера умира́вшаго от сме́рти к жи́зни возврати́вый; ра́дуйся, неду́гов цели́телю, нема́го ку́пно же и разсла́бленнаго здра́ва возста́вивый.

Ра́дуйся, гра́д тво́й У́стюг от вся́каго зла́ моли́твами твои́ми избавля́яй; ра́дуйся, все́м, и́мя твое́ моли́твенно призыва́ющым, на по́мощь притека́яй.

Ра́дуйся, неду́гов душе́вных и теле́сных благода́тный врачева́телю; ра́дуйся, бла́г вре́менных и ве́чных на́м усе́рдный от Го́спода испроси́телю.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 13.

О вели́кий уго́дниче Бо́жий, и чудотво́рче святы́й блаже́нный Проко́пие, услы́ши ми́лостивно сие́ ма́лое моле́ние на́ше, в похвалу́ тебе́ приноси́мое, и умоли́ Го́спода и Спа́са на́шего Иису́са Христа́, изба́вити на́с гее́нны о́гненныя и муче́ний ве́чных, и сподо́бити на́с Небе́снаго Ца́рствия, да с тобо́ю во ве́ки воспои́м Ему́, я́ко Спаси́телю на́шему: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел во пло́ти бы́л еси́, свя́те Проко́пие, егда́ я́ко юро́д Христа́ ра́ди на земли́ явля́лся еси́, да от люде́й свя́тость жития́ твоего́ утаи́ши, безче́стием же вся́ческим ве́чную сла́ву на Небеси́ улучи́ти сподо́бишася. Сего́ ра́ди ублажа́ем тя́ си́ми хвале́бными глаго́лы:

Ра́дуйся, от земли́ Оте́чествия твоего́ спасе́ния ра́ди в зе́млю Росси́йскую смотре́нием Бо́жиим приведе́нный; ра́дуйся, от ку́пли жите́йския к ку́пле духо́вной промышле́нием Его́ обраще́нный.

Ра́дуйся, в Вели́цем Нове́граде све́том ве́ры правосла́вныя озаре́нный; ра́дуйся, заблужде́ние ерети́ческаго иносла́вия дале́че от себе́ отри́нувый.

Ра́дуйся, во оби́тели Ху́тынстей благоче́стию христиа́нскому до́бре навыки́й; ра́дуйся, наставле́нием ста́рца духо́внаго в правосла́вии кре́пко утверди́выйся.

Ра́дуйся, бога́тство твое́ земно́е хра́мом Бо́жиим и ни́щым ижди́вый; ра́дуйся, в во́льней нищете́ пребыва́ти изво́ливый.

Ра́дуйся, в Вели́кий У́стюг я́ко ни́щ и стра́нен прише́дый; ра́дуйся, юро́дственное житие́ в не́м проходи́вый.

Ра́дуйся, от неразу́мных посмева́емь, поруга́емь и бие́н я́ко юро́д бы́вый; ра́дуйся, терпе́нием ве́лиим и смире́нием соверше́нным ду́шу твою́ к подвиго́м угото́вавый.

Ра́дуйся, святы́й блаже́нный Проко́пие, вели́кий и пресла́вный чудотво́рче.

Конда́к 1.

Избра́нный и ди́вный в житии́ и чудесе́х уго́дниче Бо́жий, святы́й блаже́нный Проко́пие, пе́сньми духо́вными любо́вию восхваля́ем тя́, небе́снаго засту́пника на́шего и мо́лим ти́ ся́ приле́жно: я́ко име́яй дерзнове́ние ко Го́споду, моли́твами твои́ми от вся́ких на́с бе́д свобожда́й, да зове́м ти́:

Ра́дуйся, святы́й блаже́нный Проко́пие, вели́кий и пресла́вный чудотво́рче.

Моли́тва.

О вели́кий уго́дниче Бо́жий и чудотво́рче, блаже́нный Проко́пие! Тебе́ мо́лимся и тебе́ про́сим: моли́ся о на́с ко Всеми́лостивому Бо́гу и Спа́су на́шему Иису́су Христу́, да проба́вит ми́лость свою́ к на́м недосто́йным, и да́рует на́м вся́, я́же к животу́ и благоче́стию потре́бная: ве́ры у́бо и любве́ преспе́яние, благоче́стия умноже́ние, ми́ра утвержде́ние, земли́ плодоно́сие, возду́хов благорастворе́ние, и во все́м благо́м благо́е поспеше́ние. Сто́льный гра́д, гра́д тво́й У́стюг, и вся́ гра́ды и ве́си Росси́йския, предста́тельством твои́м соблюди́ невреди́мы от вся́каго зла́. Все́м правосла́вным христиа́ном, тя́ моли́твенно призыва́ющым, кому́ждо по ну́ждам и́х, потре́бная да́руй: боля́щым исцеле́ние, скорбя́щым утеше́ние, бе́дствующым поможе́ние, уныва́ющым ободре́ние, ни́щым снабде́ние, си́рым призре́ние, все́м же на́м ду́х покая́ния и стра́ха Бо́жия испроси́, да благоче́стно сконча́вше вре́менное сие́ житие́, сподо́бимся благу́ю христиа́нскую кончи́ну получи́ти и Ца́рствие Небе́сное со избра́нными Бо́жиими насле́довати. Е́й, пра́ведниче Бо́жий! Не посрами́ упова́ния на́шего, е́же на тя́ смире́нно возлага́ем, но бу́ди на́м помо́щник и засту́пник в жи́зни, в сме́рти и по сме́рти на́шей: да твои́м предста́тельством спасе́ние улучи́вше, ку́пно с тобо́ю просла́вим Отца́ и Сы́на и Свята́го Ду́ха, и твое́ кре́пкое заступле́ние о на́с, во ве́ки веко́в. Ами́нь.