Акафист Пресвятой Богородице пред иконой «Прибавление ума»

Утвержден Священным Синодом 17.07.2020 (журнал № 34).

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 29 августа (16 августа ст. ст.)

Утвержден для общецерковного использования.

Конда́к 1.

Избра́нней от все́х родо́в Бо́жией Ма́тери, Небесе́ и земли́ Цари́це, врачевство́ духо́вное всему́ ми́ру подаю́щей, благода́рная пе́ния прино́сим о дарова́нии Боже́ственнаго сокро́вища, чудотво́рныя ико́ны Ея́, Прибавле́ние ума́ нарече́нныя, е́юже огражда́еми, ра́дуемся све́тло и с любо́вию взыва́ем:

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

И́кос 1.

А́нгел предста́тель по́слан бы́сть во гра́д Назаре́т к чи́стей Отрокови́це Мари́и рещи́: «Ра́дуйся, Тобо́ю бо Сы́н Бо́жий воплоти́тся». Пречи́стая же Де́ва, благове́стие Арха́нгела слы́шавши, во смире́нии се́рдца отвеща́: «Се́, Раба́ Госпо́дня, бу́ди Мне́ по глаго́лу твоему́». Мы́ же гре́шнии, благогове́йно чту́ще Ма́терь Христа́ Бо́га на́шего, я́ко от А́нгела научи́хомся, та́ко со умиле́нием вопие́м Благода́тней:

Ра́дуйся, Благослове́нная в жена́х; ра́дуйся, у Го́спода обре́тшая благода́ть.

Ра́дуйся, си́лою Всевы́шняго осене́нная; ра́дуйся, Ду́хом Святы́м освяще́нная.

Ра́дуйся, ве́рная Рабо́ Госпо́дня; ра́дуйся, Спаси́теля ми́ра ро́ждшая.

Ра́дуйся, Богоизбра́нная Отрокови́це; ра́дуйся, Небесе́ и земли́ Цари́це.

Ра́дуйся, Ма́ти Све́та, все́х просвеща́ющаго; ра́дуйся, ве́рных смы́слы озаря́ющая.

Ра́дуйся, прему́дрых превосходя́щая ра́зум; ра́дуйся, я́ко Тя́ ублажа́ют вси́ ро́ди.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 2.

Ви́дящи, Всенепоро́чная, жела́ние люде́й новопросвеще́нных, благослови́ла еси́ ева́нгельских та́ин благове́стника апо́стола Луку́ написа́ти пречи́стаго ли́ка Твоего́ изображе́ние и проглаго́лала еси́: «С си́м о́бразом благода́ть Моя́ и си́ла да бу́дет». Те́мже благогове́йно покланя́ющеся пред святы́ми ико́нами Твои́ми, и́миже ве́сь ми́р христиа́нский украси́ла еси́, благода́рственно вопие́м о Тебе́ Бо́гу: Аллилу́иа.

И́кос 2.

Ра́зум Небе́сный открыва́ющи, Пречи́стая Де́во, мно́гажды благоволи́ла еси́ яви́ти все́м ве́рным, какова́ е́сть во́ля Бо́жия, блага́я и соверше́нная, и вся́к у́м превосходя́щая. При́зри на на́с, Всепе́тая Богоро́дице, озари́ све́том и́стины, уте́ши на́с я́ко Ма́ти, наста́ви на́с на пу́ть пра́вды, да возопие́м моля́щеся Тебе́ та́ко:

Ра́дуйся, Бо́жию Прему́дрость, Христа́, роди́вшая; ра́дуйся, Бо́га челове́ком соедини́вшая.

Ра́дуйся, све́том ра́зума ду́ши на́ша просвеща́ющая; ра́дуйся, неизрече́нную сла́ву Бо́жию вмеща́ющая.

Ра́дуйся, почита́ющих святы́я ико́ны освяща́ющая; ра́дуйся, духо́вная сокро́вища ще́дро раздаю́щая.

Ра́дуйся, честны́м Твои́м ико́нам благода́ть да́рующая; ра́дуйся, поклоне́ние пред о́бразы Твои́ми Сама́ прие́млющая.

Ра́дуйся, исцеле́ния от ико́н Твои́х излива́ющая; ра́дуйся, к Небесе́м умы́ и сердца́ на́ша возводя́щая.

Ра́дуйся, всю́ вселе́нную луча́ми Твоея́ благода́ти озаря́ющая; ра́дуйся, с Сы́ном Твои́м и Бо́гом ве́чно ца́рствующая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 3.

Си́лою благода́тною осеня́еми, благочести́вии лю́дие во гра́д Назаре́т приидо́ша и обрето́ша та́мо до́м Богоро́дичен, иде́же Пречи́стая Де́ва роди́ся и благове́стие Арха́нгела прия́т, и пренесо́ша до́м то́й в зе́млю Итали́йскую, во гра́д Лоре́то. Верху́ же до́ма о́наго доны́не е́сть о́браз Богоро́дичен, от дре́ва ре́зан, его́же А́нгельския Небе́сныя Си́лы неви́димо окружа́ют и благоле́пно честву́ют, ра́достне вопию́ще Бо́гу: Аллилу́иа.

И́кос 3.

Иму́щи к ро́ду христиа́нскому Ма́тернее милосе́рдие, вся́ концы́ земли́ ко спасе́нию призыва́еши, Пречи́стая, те́мже у́бо наро́ди разноязы́чнии от мно́гих стра́н прихо́дят в до́м Тво́й, и пред ико́ною Твое́ю покая́ние прино́сят, и к жи́зни но́вей благода́тное укрепле́ние прие́млют. Сего́ ра́ди от восто́ка до за́пада просла́влена бы́сть ико́на Твоя́ чудесы́ мно́гими, и изба́вленнии от боле́зней, скорбе́й и напа́стей лю́дие прино́сят Ти́ благодаре́ния, взыва́юще:

Ра́дуйся, до́ме, его́же созда́ Себе́ Прему́дрость Бо́жия; ра́дуйся, гра́де Бо́жий, и́же от ма́лаго гра́да Назаре́та произы́де.

Ра́дуйся, до́м Бо́жий вхожде́нием Твои́м озари́вшая; ра́дуйся, Отрокови́це, Свята́я Святы́х бо́льшая.

Ра́дуйся, с Предве́чным Богомладе́нцем в Назаре́т прише́дшая; ра́дуйся, та́инству спасе́ния ро́да челове́ческаго послужи́вшая.

Ра́дуйся, ле́ствице, е́юже восхо́дим от земли́ на Не́бо; ра́дуйся, всему́ ми́ру преди́вный покро́ве.

Ра́дуйся, я́ко с ве́рою покланя́емся пречи́стаго ли́ка Твоего́ изображе́нию; ра́дуйся, я́ко от него́ прие́млем благода́тныя да́ры во спасе́ние.

Ра́дуйся, ди́вная зна́мения ико́нами Твои́ми соверша́ющая; ра́дуйся, ро́д христиа́нский держа́вно заступа́ющая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 4.

Бу́рею ско́рби ве́лия одержи́мь бе́ изо́граф не́кий в помраче́нии ра́зума, от земны́х враче́й по́льзы не получи́вый. Тогда́ Пречи́стая Ма́ти Го́спода яви́ся боля́щему в то́м же о́бразе, и́же и до́м Ея́ во гра́де Лоре́то освяща́ет, и запове́да ико́ну написа́ти. Сие́ испо́лнив, изо́граф исцели́ся и от сего́ ико́ну новопи́санную Прибавле́ние ума́ нарече́, поя́ пред не́ю хвале́бную пе́снь Бо́гу: Аллилу́иа.

И́кос 4.

Слы́шавше лю́дие земли́ Ру́сския, я́ко благоизво́ли Пресвята́я Богоро́дица да́ти и́м в ра́дость и утеше́ние ико́ну Свою́, Прибавле́ние ума́ нарече́нную, украси́ша хра́мы и до́мы своя́ мно́гими спи́сками ея́, от ни́хже ди́вная зна́мения и чудеса́ оби́льно содева́ются все́м притека́ющим с ве́рою и пою́щим Преблагослове́нней такова́я:

Ра́дуйся, о́браз Тво́й честны́й во утеше́ние и освяще́ние на́м дарова́вшая; ра́дуйся, со ико́нами Твои́ми благода́тными неви́димо в до́мы на́ша входя́щая.

Ра́дуйся, боле́зни душе́вныя и теле́сныя ико́ною Твое́ю ско́ро врачу́ющая; ра́дуйся, лю́бящия и чту́щия Тво́й о́браз от вся́ких бе́д избавля́ющая.

Ра́дуйся, оста́вленных врача́ми на Свои́ всемо́щнеи ру́це прие́млющая; ра́дуйся, благослове́ние, здра́вие и ра́дование те́м подаю́щая.

Ра́дуйся, я́ко от восто́ка и до за́пада и́мя Твое́ ублажа́ется; ра́дуйся, зе́млю на́шу покро́вом ми́лости Твоея́ осеня́ющая.

Ра́дуйся, помраче́нных умо́в исцеле́ние; ра́дуйся, по́мыслов на́ших просвеще́ние.

Ра́дуйся, позна́ния и́стины чи́стое зерца́ло; ра́дуйся, ве́ры пра́выя кре́пкое забра́ло.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 5.

Боготе́чней звезде́ подо́бна яви́ся ико́на Твоя́, Богома́ти: страну́ бо на́шу и гра́ды ея́ освяща́ет, су́щих во тьме́ неве́жества све́том богове́дения озаря́ет, ра́зум на́ш, страстьми́ помраче́нный, просвеща́ет, заблу́ждшия наставля́ет на пу́ть де́лания за́поведей Сы́на Твоего́ и Бо́га, Ему́же благода́рственно вопие́м: Аллилу́иа.

И́кос 5.

Ви́девше ди́вную ико́ну Богома́тере и позна́вше ю́ и́стинное Боже́ственное сокро́вище, к не́й усе́рдно притека́ем, в неду́зех исцеле́ние, в ско́рбех утеше́ние, в беда́х избавле́ние прие́млем и ра́достно пое́м Засту́пнице на́шей:

Ра́дуйся, Ма́ти Све́та присносу́щнаго, благода́тию всю́ вселе́нную озари́вшаго; ра́дуйся, Со́лнце Пра́вды, Христа́ Бо́га на́шего, яви́вшая.

Ра́дуйся, мра́к неве́дения на́шего разгоня́ющая; ра́дуйся, заря́ми благода́ти на́с просвеща́ющая.

Ра́дуйся, свеще́ неугаси́мая, пла́мень ве́ры возжига́ющая; ра́дуйся, све́т богове́дения все́м пролива́ющая.

Ра́дуйся, доброде́тели пу́ть освеща́ющая; ра́дуйся, ве́сну спасе́ния на́м возвеща́ющая.

Ра́дуйся, явле́нием ико́ны Твоея́ ве́рных осиява́ющая; ра́дуйся, от бе́д и напа́стей кре́пкою руко́ю изыма́ющая.

Ра́дуйся, любве́ Боже́ственныя свети́льниче; ра́дуйся, святы́ни преми́рныя исто́чниче.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 6.

Пропове́дует ми́р ве́сь ми́лости Твоя́, Ма́ти Го́спода на́шего, во все́х бо конце́х земли́ ико́на Твоя́, Прибавле́ние ума́ имену́емая, луча́ми чуде́с сия́ет, просвеща́ющи ду́ши на́ша све́том Бо́жия благода́ти и подвиза́ющи пе́ти просла́вльшему Тя́ Бо́гу: Аллилу́иа.

И́кос 6.

Возсия́ в честне́й ико́не Твое́й, Богоро́дице, све́т спасе́ния все́м блужда́ющим во тьме́ грехо́в и страсте́й, и все́м моля́щимся пред не́ю с ве́рою и благогове́нием ско́рая по́мощь подае́тся. Умо́в на́ших омраче́ние све́том Твои́м отжени́, Всепе́тая, и да́руй и́стинный Све́т узре́ти все́м с любо́вию вопию́щим Ти́ си́це:

Ра́дуйся, звездо́ незаходи́мая, Со́лнце Пра́вды в ми́р вводя́щая; ра́дуйся, Ма́ти Све́та и́стиннаго, ду́ши ве́рных просвеща́ющаго.

Ра́дуйся, све́тлым покро́вом у́м на́ш омраче́нный осеня́ющая; ра́дуйся, заре́ невече́рняя, мглу́ на́ших грехо́в разгоня́ющая.

Ра́дуйся, во благода́тнем уче́нии наставля́ющая; ра́дуйся, тьмы́ и ве́чных му́к на́с избавля́ющая.

Ра́дуйся, от сете́й вра́жиих свобожда́ющая; ра́дуйся, безу́мие ми́ра побежда́ющая.

Ра́дуйся, душевре́дных уче́ний низложе́ние; ра́дуйся, душеполе́зных зна́ний дарова́ние.

Ра́дуйся, ико́ною Твое́ю на́с утеша́ющая; ра́дуйся, све́том ра́дости ду́ши веселя́щая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 7.

Хотя́щи все́м челове́ком спасти́ся и в ра́зум и́стины приити́, Пречи́стая Ма́ти Сво́й о́браз, Прибавле́ние ума́ имену́емый, дарова́ла е́сть на́м, да вси́ с ве́рою моля́щиися пред ни́м, кре́пость сло́ва, и ра́зум, и му́дрость прии́мше, в тишине́ помысло́в Царю́ и Бо́гу на́шему пою́т: Аллилу́иа.

И́кос 7.

Но́вая и пресла́вная чудеса́ явля́еши, Ма́ти Бо́жия, ве́рным лю́дем свято́ю ико́ною Твое́ю: си́лою благода́ти Христо́вы помраче́нныя умо́м просвеща́еши, от безу́мия отвраща́еши, разсла́бленныя укрепля́еши и все́м притека́ющим к целе́бному Твоему́ о́бразу ско́рую по́мощь подае́ши, подвиза́ющи пе́ти Тебе́ такова́я:

Ра́дуйся, из глубины́ неве́дения извлача́ющая; ра́дуйся, мно́гия в ра́зуме просвеща́ющая.

Ра́дуйся, сло́во прему́дрости прося́щим да́рующая; ра́дуйся, несмы́сленных разу́мны содева́ющая.

Ра́дуйся, грехо́вныя по́мыслы отгоня́ющая; ра́дуйся, сердца́ ожесточе́нная умягча́ющая.

Ра́дуйся, у́м к Бо́гу возвыша́ющая; ра́дуйся, нему́дрыя умудря́ющая.

Ра́дуйся, ко благоче́стию наставля́ющая; ра́дуйся, ве́чною ра́достию одаря́ющая.

Ра́дуйся, к Сы́ну Твоему́ и Бо́гу моли́твы ве́рных принося́щая; ра́дуйся, и Сама́ непреста́нно у Престо́ла Вседержи́теля о все́х моля́щаяся.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 8.

Стра́нно е́сть ви́дети, ка́ко ико́на Твоя́, Пречи́стая Богоро́дице Де́во, руко́ю челове́ческою напи́санная, си́лою Твое́ю Боже́ственною духо́в тьмы́ прогоня́ет, не́мощию ума́ одержи́мым ра́зум подае́т и все́х неудо́бь уча́щихся све́тло умудря́ет; те́мже и мы́, во гресе́х погиба́ющии, мо́лим Тя́ со слеза́ми: изба́ви на́с от вра́г ви́димых и неви́димых, от тьмы́ неразу́мия и мра́ка пре́лести, да всегда́ пое́м Спаси́телю и Бо́гу на́шему: Аллилу́иа.

И́кос 8.

Вся́ земля́ на́ша преиспо́лнена е́сть, а́ки звезда́ми богосве́тлыми, чудотво́рными о́бразами Твои́ми, Богоро́дице Де́во, в не́йже и сия́ ико́на Твоя́, Прибавле́ние ума́ нарече́нная, благода́тию сия́ет и согрева́ет оледене́вшая сердца́ на́ша зна́меньми ми́лости Твоея́ к на́м гре́шным. Сего́ ра́ди пред ли́ком Твои́м святы́м прекло́ньше коле́на, воспева́ем Тя́, Всепречи́стая Ма́ти на́ша, та́ко:

Ра́дуйся, ско́рби на́ша в ра́дость претворя́ющая; ра́дуйся, от разжже́нных стре́л лука́ваго на́с защища́ющая.

Ра́дуйся, ве́рных ра́зум просвеща́ющая; ра́дуйся, неве́рныя посрамля́ющая.

Ра́дуйся, младе́нцев воспита́ние и благода́тное охране́ние; ра́дуйся, ю́ных наставле́ние и целому́дренное огражде́ние.

Ра́дуйся, неудо́бь уча́щимся ра́зум подаю́щая; ра́дуйся, помраче́нныя умо́м исцеля́ющая.

Ра́дуйся, вра́жия се́ти разруша́ющая; ра́дуйся, благода́тию де́моны прогоня́ющая.

Ра́дуйся, Ма́ти щедро́т и милосе́рдия; ра́дуйся, спасе́ния на́шего наде́ждо.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 9.

Вся́кое естество́ А́нгельское благогове́йно Тебе́ слу́жит, Небесе́ и земли́ Цари́це, челове́ческий же ро́д хвалы́ Тебе́ прино́сит и Твою́ святу́ю ико́ну почита́ет, сию́ бо во отра́ду и утеше́ние дарова́ла еси́ на́м. Научи́ на́с, о Всеблага́я, досто́йно сла́вити Тя́ и воспева́ти ро́ждшемуся от Тебе́ Спаси́телю ми́ра: Аллилу́иа.

И́кос 9.

Вети́и челове́честии недоумева́ют позна́ти та́йну служе́ния Твоего́ ро́ду христиа́нскому, Богоро́дице, ниже́ мо́гут изъясни́ти си́лу чудотво́рную, от ико́н Твои́х происходя́щую на вся́ку по́льзу душе́вную и теле́сную челове́ком. Мы́ же правосла́внии, со слеза́ми ра́дости пред ико́ною Твое́ю свято́ю предстоя́ще, прославля́ем Тя́, Благода́тная, и глаго́лем:

Ра́дуйся, А́нгелов ра́дование; ра́дуйся, Арха́нгелов ликова́ние.

Ра́дуйся, Ю́же на возду́се срета́ют Херуви́ми; ра́дуйся, Е́йже похва́льная прино́сят Серафи́ми.

Ра́дуйся, све́тлое Це́ркве Небе́сныя и земны́я украше́ние; ра́дуйся, все́х челове́к и безпло́тных удивле́ние.

Ра́дуйся, от во́инств Небе́сных почита́емая; ра́дуйся, от земноро́дных поклоне́нием прославля́емая.

Ра́дуйся, о́бразом Твои́м умы́ на́ша возводя́щая к ми́ру Го́рнему; ра́дуйся, Путеводи́тельнице на́ша ко Оте́честву Небе́сному.

Ра́дуйся, все́х на́с при Кресте́ Сы́на Твоего́ усынови́вшая; ра́дуйся, сия́нием души́ Твоея́ всю́ зе́млю просвети́вшая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 10.

Спасти́ хотя́ ми́р от безу́мия и пре́лести вра́жия, Человеколю́бец Госпо́дь чу́дную ико́ну Твою́, Богома́ти, дарова́, пред не́юже помраче́ннии умо́м исцеля́ются, бесну́ющиися от де́монов свобожда́ются, скорбя́щии утеше́ние и ра́дость обрета́ют. Те́мже прославля́юще Бо́га, подаю́щаго на́м таковы́я ми́лости, вопие́м Ему́ благода́рне: Аллилу́иа.

И́кос 10.

Стена́ еси́ необори́мая и покро́в на́м, Всенепоро́чная, сопроти́в ополче́ний ви́димых и неви́димых вра́г, огражда́ющи на́с от вся́ких бе́д и боле́зней. Сего́ ра́ди припа́дающе ко ико́не Твое́й с ве́рою в по́мощь благода́тную и врачевство́ все́х неду́гов душе́вных и теле́сных, ра́достно вопие́м Ти́ си́це:

Ра́дуйся, от путе́й поги́бельных на́с удаля́ющая; ра́дуйся, на вся́ку и́стину и пра́вду наставля́ющая.

Ра́дуйся, ду́ха боле́зни и уны́ния отгна́ние; ра́дуйся, ду́ха ра́зума и кре́пости стяжа́ние.

Ра́дуйся, враги́ си́лою Бо́жиею посрамля́ющая; ра́дуйся, сове́ты нечести́вых разоря́ющая.

Ра́дуйся, бесну́ющимся здра́вие подаю́щая; ра́дуйся, вся́ лю́тыя неду́ги врачу́ющая.

Ра́дуйся, от сме́рти духо́вныя на́с избавля́ющая; ра́дуйся, слеза́ми Твои́ми грехи́ на́ша омыва́ющая.

Ра́дуйся, ра́достию духо́вною на́с ди́вно насыща́ющая; ра́дуйся, в жи́знь бу́дущаго ве́ка на́с вводя́щая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 11.

Пе́ние благода́рственное прино́сим пред пречи́стым о́бразом Твои́м, Пренепоро́чная, за неизрече́нное Твое́ милосе́рдие и мо́лимся, о Богоблагода́тная: огради́ у́м на́ш и се́рдце от тлетво́рных уче́ний, неве́рия и суеве́рия, сохрани́ зе́млю на́шу от вся́ких нестрое́ний, врага́ми ве́ры воздвиза́емых, и сподо́би на́с чи́стым се́рдцем сла́вити Созда́теля на́шего, пою́ще пе́снь: Аллилу́иа.

И́кос 11.

Я́ко светоприе́мную свещу́ зри́м ико́ну Твою́, Богома́ти, сия́нием чуде́с зе́млю на́шу просвеща́ющую, на пу́ть спасе́ния на́с наставля́ющую и сердца́ на́ша любо́вию воспламеня́ющую к Тебе́, Пречи́стей Ма́тери Го́спода. Мы́ же, ве́дуще си́лу благода́ти Твоея́, пе́сньми ра́достными прославля́ем Тя́ си́це:

Ра́дуйся, прему́дростию Соломо́на превы́шшая; ра́дуйся, сокрове́нныя та́йны Бо́жия ве́рным открыва́ющая.

Ра́дуйся, любому́дрыя нему́дрыя явля́ющая; ра́дуйся, мо́лние, ду́ши просвеща́ющая.

Ра́дуйся, су́етную му́дрость ве́ка сего́ посрамля́ющая; ра́дуйся, ослепле́нныя е́ю на пу́ть пра́вый наставля́ющая.

Ра́дуйся, и́скренне моля́щимся у́м обновля́ющая; ра́дуйся, в ча́с недоуме́ний мы́сль бла́гу на се́рдце полага́ющая.

Ра́дуйся, прему́дрости и бла́гости Бо́жия открове́ние; ра́дуйся, яви́вшая на́м ди́вную ико́ну Твою́ я́ко да́р Небе́сный.

Ра́дуйся, исто́чниче ра́дости непреста́нныя; ра́дуйся, Го́рняго ми́ра красото́ неизрече́нная.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 12.

Благода́ть Боже́ственную испроси́ у Сы́на Твоего́ и Бо́га, о Всеблага́я, пода́ждь на́м ру́ку по́мощи, да не поги́бнем во гресе́х на́ших; согре́й на́с любо́вию Твое́ю, очи́сти умы́ на́ша от гордели́вых помысло́в, просвети́ серде́чныя о́чи на́ши к зре́нию пути́ смире́ния и сподо́би на́с в жи́зни се́й и в Ца́рстве Небе́снем воспева́ти Творцу́ и Созда́телю на́шему: Аллилу́иа.

И́кос 12.

Пою́ще чудеса́, от ико́ны Твоея́ явле́нная, Влады́чице, хва́лим, сла́вим и велича́ем Тя́, честне́йшую вои́стину Херуви́м и сла́внейшую без сравне́ния Серафи́м. При́зри с Небесе́, Богоро́дице, на предстоя́щия пред свято́ю ико́ною Твое́ю и благода́ть Твою́ низпосли́ на́м, изба́ви от вся́ких бе́д и искуше́ний вра́жиих все́х я́ко Засту́пнице и Храни́тельнице на́шей вопию́щих Ти́:

Ра́дуйся, моли́твами Твои́ми ве́сь ми́р спаса́ющая; ра́дуйся, све́том чистоты́ Твоея́ все́х просвеща́ющая.

Ра́дуйся, ны́нешняго ско́рбнаго ве́ка утеше́ние; ра́дуйся, во́ли Госпо́дни открове́ние.

Ра́дуйся, зе́млю Ру́сскую в достоя́ние Себе́ избра́вшая; ра́дуйся, явле́нием чудотво́рных ико́н Твои́х сию́ благослови́вшая.

Ра́дуйся, чудесы́ от о́браза Твоего́ к Све́ту и́стины на́с возводя́щая; ра́дуйся, почита́ющих ли́к Тво́й незри́мо благода́тию осеня́ющая.

Ра́дуйся, ра́дость благода́тную в сердца́ боголюби́вая излива́ющая; ра́дуйся, две́ри милосе́рдия Бо́жия хода́тайством Твои́м отверза́ющая.

Ра́дуйся, в стяжа́нии даро́в Свята́го Ду́ха на́м поможе́ние; ра́дуйся, Же́но, еди́на Чи́стая и Благослове́нная.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 13.

О всепе́тая Ма́ти Присносу́щнаго Све́та и О́тчия Прему́дрости! Ты́ еси́ све́т омраче́нных, прибавле́ние ума́ и ра́дость серде́ц на́ших; услы́ши и приими́ моле́ние на́с гре́шных, умудри́ на́с неразу́мных и наста́ви на пе́ние и моли́тву пред ико́ною Твое́ю ди́вною. Не преста́й моли́ти Сы́на Твоего́ и Бо́га о на́с, недосто́йных рабе́х Твои́х, сла́вящих Тя́ и пою́щих Ему́: Аллилу́иа.

Этот конда́к читается трижды, затем и́кос 1-й, и конда́к 1-й.

И́кос 1.

А́нгел предста́тель по́слан бы́сть во гра́д Назаре́т к чи́стей Отрокови́це Мари́и рещи́: «Ра́дуйся, Тобо́ю бо Сы́н Бо́жий воплоти́тся». Пречи́стая же Де́ва, благове́стие Арха́нгела слы́шавши, во смире́нии се́рдца отвеща́: «Се́, Раба́ Госпо́дня, бу́ди Мне́ по глаго́лу твоему́». Мы́ же гре́шнии, благогове́йно чту́ще Ма́терь Христа́ Бо́га на́шего, я́ко от А́нгела научи́хомся, та́ко со умиле́нием вопие́м Благода́тней:

Ра́дуйся, Благослове́нная в жена́х; ра́дуйся, у Го́спода обре́тшая благода́ть.

Ра́дуйся, си́лою Всевы́шняго осене́нная; ра́дуйся, Ду́хом Святы́м освяще́нная.

Ра́дуйся, ве́рная Рабо́ Госпо́дня; ра́дуйся, Спаси́теля ми́ра ро́ждшая.

Ра́дуйся, Богоизбра́нная Отрокови́це; ра́дуйся, Небесе́ и земли́ Цари́це.

Ра́дуйся, Ма́ти Све́та, все́х просвеща́ющаго; ра́дуйся, ве́рных смы́слы озаря́ющая.

Ра́дуйся, прему́дрых превосходя́щая ра́зум; ра́дуйся, я́ко Тя́ ублажа́ют вси́ ро́ди.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 1.

Избра́нней от все́х родо́в Бо́жией Ма́тери, Небесе́ и земли́ Цари́це, врачевство́ духо́вное всему́ ми́ру подаю́щей, благода́рная пе́ния прино́сим о дарова́нии Боже́ственнаго сокро́вища, чудотво́рныя ико́ны Ея́, Прибавле́ние ума́ нарече́нныя, е́юже огражда́еми, ра́дуемся све́тло и с любо́вию взыва́ем:

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Моли́тва.

О Пречи́стая Богоро́дице, даро́в духо́вных Пода́тельнице, до́ме, его́же созда́ Себе́ Прему́дрость Бо́жия, от ми́ра к преми́рным у́м на́ш возводя́щая и все́х к позна́нию ра́зума приводя́щая! Приими́ моле́бное пе́ние от на́с, недосто́йных рабо́в Твои́х, с ве́рою и умиле́нием покланя́ющихся пред пречи́стым о́бразом Твои́м. Умоли́ Сы́на Твоего́ и Бо́га на́шего, да да́рует власте́м на́шим му́дрость и си́лу, судия́м пра́вду и нелицеприя́тие, па́стырем му́дрость духо́вную и ре́вность, наста́вником смиренному́дрие, ча́дом послуша́ние, все́м же на́м ду́х ра́зума и благоче́стия, ду́х смире́ния и кро́тости, ду́х чистоты́ и пра́вды. Пода́ждь на́м, всепе́тая Ма́ти, ума́ прибавле́ние, умири́, соедини́ во вражде́ и разделе́нии су́щия и положи́ и́м сою́з любве́ неразруши́мый, все́х заблу́ждших от неразу́мия к све́ту и́стины Христо́вы обрати́, на пу́ть стра́ха Бо́жия, воздержа́ния и трудолю́бия наста́ви, сло́во прему́дрости и душа́м поле́зное зна́ние прося́щим да́руй, осени́ на́с ве́чною ра́достию, Херуви́мов честне́йшая и Серафи́мов сла́внейшая су́щи. Мы́ же, ди́вная дела́ и многоразу́мную прему́дрость Бо́жию в ми́ре и жи́зни на́шей ви́дяще, устрани́мся земны́я суеты́ и лука́вых попече́ний, и умы́ и сердца́ на́ша на Небеса́ возведе́м, я́ко да Твои́м заступле́нием и по́мощию сла́ву, хвалу́, благодаре́ние и поклоне́ние за вся́ в Тро́ице сла́вимому Бо́гу и все́х Созда́телю воздади́м, ны́не и при́сно, и во ве́ки веко́в. Ами́нь.

А҆ка́ѳїстъ прест҃ѣ́й бцⷣѣ въ че́сть є҆ѧ̀ і҆кѡ́ны, и҆менꙋ́емыѧ прибавле́нїе ᲂу҆ма̀.

Конда́къ а҃.

И҆збра́ннѣй ѿ всѣ́хъ родѡ́въ бж҃їей мт҃ри, нб҃сѐ и҆ землѝ цр҃и́це, врачевство̀ дꙋхо́вное всемꙋ̀ мі́рꙋ подаю́щей, бл҃года̑рнаѧ пѣ̑нїѧ прино́симъ ѡ҆ дарова́нїи бжⷭ҇твеннагѡ сокро́вища, чꙋдотво́рныѧ і҆кѡ́ны є҆ѧ̀, прибавле́нїе ᲂу҆ма̀ нарече́нныѧ, є҆́юже ѡ҆гражда́еми, ра́дꙋемсѧ свѣ́тлѡ и҆ съ любо́вїю взыва́емъ:

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

І҆́косъ а҃.

А҆́гг҃лъ предста́тель по́сланъ бы́сть во гра́дъ назаре́тъ къ чи́стѣй ѻ҆трокови́цѣ мр҃і́и рещѝ: ра́дꙋйсѧ, тобо́ю бо сн҃ъ бж҃їй воплоти́тсѧ. Пречⷭ҇таѧ же дв҃а, бл҃говѣ́стїе а҆рха́гг҃ла слы́шавши, во смире́нїи се́рдца ѿвѣща̀: сѐ, раба̀ гдⷭ҇нѧ, бꙋ́ди мнѣ̀ по глаго́лꙋ твоемꙋ̀. Мы́ же грѣ́шнїи, бл҃гоговѣ́йнѡ чтꙋ́ще мт҃рь хрⷭ҇та̀ бг҃а на́шегѡ, ꙗ҆́кѡ ѿ а҆́гг҃ла наꙋчи́хомсѧ, та́кѡ со ᲂу҆миле́нїемъ вопїе́мъ бл҃года́тнѣй:

Ра́дꙋйсѧ, бл҃гослове́ннаѧ въ жена́хъ: ра́дꙋйсѧ, ᲂу҆ гдⷭ҇а ѡ҆брѣ́тшаѧ бл҃года́ть.

Ра́дꙋйсѧ, си́лою всевы́шнѧгѡ ѡ҆сѣне́ннаѧ: ра́дꙋйсѧ, дх҃омъ ст҃ы́мъ ѡ҆сщ҃е́ннаѧ.

Ра́дꙋйсѧ, вѣ́рнаѧ рабо̀ гдⷭ҇нѧ: ра́дꙋйсѧ, сп҃си́телѧ мі́ра ро́ждшаѧ.

Ра́дꙋйсѧ, бг҃оизбра́ннаѧ ѻ҆трокови́це: ра́дꙋйсѧ, нб҃сѐ и҆ землѝ цр҃и́це.

Ра́дꙋйсѧ, мт҃и свѣ́та, всѣ́хъ просвѣща́ющагѡ: ра́дꙋйсѧ, вѣ́рныхъ смы́слы ѡ҆зарѧ́ющаѧ.

Ра́дꙋйсѧ, премꙋ́дрыхъ превосходѧ́щаѧ ра́зꙋмъ: ра́дꙋйсѧ, ꙗ҆́кѡ тѧ̀ ᲂу҆бл҃жа́ютъ всѝ ро́ди.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ в҃.

Ви́дѧщи, всенепоро́чнаѧ, жела́нїе люде́й новопросвѣще́нныхъ, бл҃гослови́ла є҆сѝ є҆ѵⷢ҇льскихъ та̑инъ бл҃говѣ́стника а҆пⷭ҇ла лꙋкꙋ̀ написа́ти пречⷭ҇тагѡ ли́ка твоегѡ̀ и҆з̾ѡбраже́нїе и҆ проглаго́лала є҆сѝ: съ си́мъ ѻ҆́бразомъ бл҃года́ть моѧ̀ и҆ си́ла да бꙋ́детъ. Тѣ́мже бл҃гоговѣ́йнѡ покланѧ́ющесѧ пред̾ ст҃ы́ми і҆кѡ́нами твои́ми, и҆́миже ве́сь мі́ръ хрⷭ҇тїа́нскїй ᲂу҆краси́ла є҆сѝ, бл҃года́рственнѡ вопїе́мъ ѡ҆ тебѣ̀ бг҃ꙋ: А҆ллилꙋ́їа.

І҆́косъ в҃.

Ра́зꙋмъ нбⷭ҇ный ѿкрыва́ющи, пречⷭ҇таѧ дв҃о, мно́гажды бл҃говоли́ла є҆сѝ ꙗ҆ви́ти всѣ̑мъ вѣ̑рнымъ, какова̀ є҆́сть во́лѧ бж҃їѧ, бл҃га́ѧ и҆ соверше́ннаѧ, и҆ всѧ́къ ᲂу҆́мъ превосходѧ́щаѧ. При́зри на на́съ, всепѣ́таѧ бцⷣе, ѡ҆зарѝ свѣ́томъ и҆́стины, ᲂу҆тѣ́ши на́съ ꙗ҆́кѡ мт҃и, наста́ви на́съ на пꙋ́ть пра́вды, да возопїе́мъ молѧ́щесѧ тебѣ̀ та́кѡ:

Ра́дꙋйсѧ, бж҃їю премⷣрость, хрⷭ҇та̀, роди́вшаѧ: ра́дꙋйсѧ, бг҃а человѣ́кѡмъ соедини́вшаѧ.

Ра́дꙋйсѧ, свѣ́томъ ра́зꙋма дꙋ́шы на́шѧ просвѣща́ющаѧ: ра́дꙋйсѧ, неизрече́ннꙋю сла́вꙋ бж҃їю вмѣща́ющаѧ.

Ра́дꙋйсѧ, почита́ющихъ ст҃ы̑ѧ і҆кѡ́ны ѡ҆сщ҃а́ющаѧ: ра́дꙋйсѧ, дꙋхѡ́внаѧ сокрѡ́вища ще́дрѡ раздаю́щаѧ.

Ра́дꙋйсѧ, чтⷭ҇ны̑мъ твои̑мъ і҆кѡ́намъ бл҃года́ть да́рꙋющаѧ: ра́дꙋйсѧ, поклоне́нїе пред̾ ѻ҆́бразы твои́ми сама̀ прїе́млющаѧ.

Ра́дꙋйсѧ, и҆сцѣлє́нїѧ ѿ і҆кѡ́нъ твои́хъ и҆злива́ющаѧ: ра́дꙋйсѧ, къ нб҃сє́мъ ᲂу҆мы̀ и҆ сердца̀ на̑ша возводѧ́щаѧ.

Ра́дꙋйсѧ, всю̀ вселе́ннꙋю лꙋча́ми твоеѧ̀ бл҃года́ти ѡ҆зарѧ́ющаѧ: ра́дꙋйсѧ, съ сн҃омъ твои́мъ и҆ бг҃омъ вѣ́чнѡ црⷭ҇твꙋющаѧ.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ г҃.

Си́лою бл҃года́тною ѡ҆сѣнѧ́еми, бл҃гочести́вїи лю́дїе во гра́дъ назаре́тъ прїидо́ша и҆ ѡ҆брѣто́ша та́мѡ до́мъ бг҃оро́диченъ, и҆дѣ́же пречⷭ҇таѧ дв҃а роди́сѧ и҆ бл҃говѣ́стїе а҆рха́гг҃ла прїѧ́тъ, и҆ пренесо́ша до́мъ то́й въ зе́млю і҆талі́йскꙋю, во гра́дъ лоре́то. Верхꙋ́ же до́ма ѻ҆́нагѡ доны́нѣ є҆́сть ѻ҆́бразъ бг҃оро́диченъ, ѿ дре́ва рѣ́занъ, є҆го́же а҆́гг҃льскїѧ нбⷭ҇ныѧ си̑лы неви́димѡ ѡ҆крꙋжа́ютъ и҆ бл҃голѣ́пнѡ чествꙋ́ютъ, ра́достнѣ вопїю́ще бг҃ꙋ: А҆ллилꙋ́їа.

І҆́косъ г҃.

И҆мꙋ́щи къ ро́дꙋ хрⷭ҇тїа́нскомꙋ мт҃рнее млⷭ҇рдїе, всѧ̑ концы̀ землѝ ко сп҃се́нїю призыва́еши, пречⷭ҇таѧ: тѣ́мже ᲂу҆́бѡ наро́ди разноѧзы́чнїи ѿ мно́гихъ стра́нъ прихо́дѧтъ въ до́мъ тво́й, и҆ пред̾ і҆кѡ́ною твое́ю покаѧ́нїе прино́сѧтъ, и҆ къ жи́зни но́вѣй бл҃года́тное ᲂу҆крѣпле́нїе прїе́млютъ. Сегѡ̀ ра́ди ѿ восто́ка до за́пада просла́влена бы́сть і҆кѡ́на твоѧ̀ чꙋдесы̀ мно́гими, и҆ и҆зба́вленнїи ѿ болѣ́зней, скорбе́й и҆ напа́стей лю́дїе прино́сѧтъ тѝ бл҃годарє́нїѧ, взыва́юще:

Ра́дꙋйсѧ, до́ме, є҆го́же созда̀ себѣ̀ премⷣрость бж҃їѧ: ра́дꙋйсѧ, гра́де бж҃їй, и҆́же ѿ ма́лагѡ гра́да назаре́та произы́де.

Ра́дꙋйсѧ, до́мъ бж҃їй вхожде́нїемъ твои́мъ ѡ҆зари́вшаѧ: ра́дꙋйсѧ, ѻ҆трокови́це, ст҃а̑ѧ ст҃ы́хъ бо́льшаѧ.

Ра́дꙋйсѧ, съ предвѣ́чнымъ бг҃омлⷣнцемъ въ назаре́тъ прише́дшаѧ: ра́дꙋйсѧ, та́инствꙋ сп҃се́нїѧ ро́да человѣ́ческагѡ послꙋжи́вшаѧ.

Ра́дꙋйсѧ, лѣ́ствице, є҆́юже восхо́димъ ѿ землѝ на нб҃о: ра́дꙋйсѧ, всемꙋ̀ мі́рꙋ преди́вный покро́ве.

Ра́дꙋйсѧ, ꙗ҆́кѡ съ вѣ́рою покланѧ́емсѧ пречⷭ҇тагѡ ли́ка твоегѡ̀ и҆з̾ѡбраже́нїю: ра́дꙋйсѧ, ꙗ҆́кѡ ѿ негѡ̀ прїе́млемъ бл҃года̑тныѧ да́ры во сп҃се́нїе.

Ра́дꙋйсѧ, ди̑внаѧ зна́мєнїѧ і҆кѡ́нами твои́ми соверша́ющаѧ: ра́дꙋйсѧ, ро́дъ хрⷭ҇тїа́нскїй держа́внѡ застꙋпа́ющаѧ.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ д҃.

Бꙋ́рею ско́рби ве́лїѧ ѡ҆держи́мь бѣ̀ и҆зо́графъ нѣ́кїй въ помраче́нїи ра́зꙋма, ѿ земны́хъ враче́й по́льзы не полꙋчи́вый. Тогда̀ пречⷭ҇таѧ мт҃и гдⷭ҇а ꙗ҆ви́сѧ болѧ́щемꙋ въ то́мъ же ѻ҆́бразѣ, и҆́же и҆ до́мъ є҆ѧ̀ во гра́дѣ лоре́то ѡ҆сщ҃а́етъ, и҆ заповѣ́да і҆кѡ́нꙋ написа́ти. Сїѐ и҆спо́лнивъ, и҆зо́графъ и҆сцѣли́сѧ и҆ ѿ сегѡ̀ і҆кѡ́нꙋ новопи́саннꙋю прибавле́нїе ᲂу҆ма̀ наречѐ, поѧ̀ пред̾ не́ю хвале́бнꙋю пѣ́снь бг҃ꙋ: А҆ллилꙋ́їа.

І҆́косъ д҃.

Слы́шавше лю́дїе землѝ рꙋ́сскїѧ, ꙗ҆́кѡ бл҃гоизво́ли прест҃а́ѧ бцⷣа да́ти и҆̀мъ въ ра́дость и҆ ᲂу҆тѣше́нїе і҆кѡ́нꙋ свою̀, прибавле́нїе ᲂу҆ма̀ нарече́ннꙋю, ᲂу҆краси́ша хра́мы и҆ до́мы своѧ̑ мно́гими спи́сками є҆ѧ̀, ѿ ни́хже ди̑внаѧ зна́мєнїѧ и҆ чꙋдеса̀ ѻ҆би́льнѡ содѣва́ютсѧ всѣ̑мъ притека́ющымъ съ вѣ́рою и҆ пою́щымъ пребл҃гослове́ннѣй такова̑ѧ:

Ра́дꙋйсѧ, ѻ҆́бразъ тво́й чтⷭ҇ны́й во ᲂу҆тѣше́нїе и҆ ѡ҆сщ҃е́нїе на́мъ дарова́вшаѧ: ра́дꙋйсѧ, со і҆кѡ́нами твои́ми бл҃года́тными неви́димѡ въ до́мы на́шѧ входѧ́щаѧ.

Ра́дꙋйсѧ, болѣ̑зни дꙋшє́вныѧ и҆ тѣлє́сныѧ і҆кѡ́ною твое́ю ско́рѡ врачꙋ́ющаѧ: ра́дꙋйсѧ, лю́бѧщыѧ и҆ чтꙋ́щыѧ тво́й ѻ҆́бразъ ѿ всѧ́кихъ бѣ́дъ и҆збавлѧ́ющаѧ.

Ра́дꙋйсѧ, ѡ҆ста́вленныхъ врача́ми на своѝ всемо́щнѣи рꙋ́цѣ прїе́млющаѧ: ра́дꙋйсѧ, бл҃гослове́нїе, здра́вїе и҆ ра́дованїе тѣ̑мъ подаю́щаѧ.

Ра́дꙋйсѧ, ꙗ҆́кѡ ѿ восто́ка и҆ до за́пада и҆́мѧ твоѐ ᲂу҆бл҃жа́етсѧ: ра́дꙋйсѧ, зе́млю на́шꙋ покро́вомъ млⷭ҇ти твоеѧ̀ ѡ҆сѣнѧ́ющаѧ.

Ра́дꙋйсѧ, помраче́нныхъ ᲂу҆мѡ́въ и҆сцѣле́нїе: ра́дꙋйсѧ, по́мыслѡвъ на́шихъ просвѣще́нїе.

Ра́дꙋйсѧ, позна́нїѧ и҆́стины чи́стое зерца́ло: ра́дꙋйсѧ, вѣ́ры пра́выѧ крѣ́пкое забра́ло.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ є҃.

Бг҃оте́чнѣй ѕвѣздѣ̀ подо́бна ꙗ҆ви́сѧ і҆кѡ́на твоѧ̀, бг҃омт҃и: странꙋ́ бо на́шꙋ и҆ гра́ды є҆ѧ̀ ѡ҆сщ҃а́етъ, сꙋ́щихъ во тьмѣ̀ невѣ́жества свѣ́томъ бг҃овѣ́дѣнїѧ ѡ҆зарѧ́етъ, ра́зꙋмъ на́шъ, страстьмѝ помраче́нный, просвѣща́етъ, заблꙋ́ждшыѧ наставлѧ́етъ на пꙋ́ть дѣ́ланїѧ за́повѣдей сн҃а твоегѡ̀ и҆ бг҃а, є҆мꙋ́же бл҃года́рственнѡ вопїе́мъ: А҆ллилꙋ́їа.

І҆́косъ є҃.

Ви́дѣвше ди́внꙋю і҆кѡ́нꙋ бг҃омт҃ре и҆ позна́вше ю҆̀ и҆́стинное бжⷭ҇твенное сокро́вище, къ не́й ᲂу҆се́рднѡ притека́емъ, въ недꙋ́зѣхъ и҆сцѣле́нїе, въ ско́рбехъ ᲂу҆тѣше́нїе, въ бѣда́хъ и҆збавле́нїе прїе́млемъ и҆ ра́достнѡ пое́мъ застꙋ́пницѣ на́шей:

Ра́дꙋйсѧ, мт҃и свѣ́та присносꙋ́щнагѡ, бл҃года́тїю всю̀ вселе́ннꙋю ѡ҆зари́вшагѡ: ра́дꙋйсѧ, сл҃нце пра́вды, хрⷭ҇та̀ бг҃а на́шего, ꙗ҆ви́вшаѧ.

Ра́дꙋйсѧ, мра́къ невѣ́дѣнїѧ на́шегѡ разгонѧ́ющаѧ: ра́дꙋйсѧ, зарѧ́ми бл҃года́ти на́съ просвѣща́ющаѧ.

Ра́дꙋйсѧ, свѣщѐ неꙋгаси́маѧ, пла́мень вѣ́ры возжига́ющаѧ: ра́дꙋйсѧ, свѣ́тъ бг҃овѣ́дѣнїѧ всѣ̑мъ пролива́ющаѧ.

Ра́дꙋйсѧ, добродѣ́тели пꙋ́ть ѡ҆свѣща́ющаѧ: ра́дꙋйсѧ, ве́снꙋ сп҃се́нїѧ на́мъ возвѣща́ющаѧ.

Ра́дꙋйсѧ, ꙗ҆вле́нїемъ і҆кѡ́ны твоеѧ̀ вѣ́рныхъ ѡ҆сїѧва́ющаѧ: ра́дꙋйсѧ, ѿ бѣ́дъ и҆ напа́стей крѣ́пкою рꙋко́ю и҆з̾има́ющаѧ.

Ра́дꙋйсѧ, любвѐ бжⷭ҇твенныѧ свѣти́льниче: ра́дꙋйсѧ, ст҃ы́ни премі́рныѧ и҆сто́чниче.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ ѕ҃.

Проповѣ́дꙋетъ мі́ръ ве́сь млⷭ҇ти твоѧ̑, мт҃и гдⷭ҇а на́шегѡ, во всѣ́хъ бо концѣ́хъ землѝ і҆кѡ́на твоѧ̀, прибавле́нїе ᲂу҆ма̀ и҆менꙋ́емаѧ, лꙋча́ми чꙋде́съ сїѧ́етъ, просвѣща́ющи дꙋ́шы на́шѧ свѣ́томъ бж҃їѧ бл҃года́ти и҆ подвиза́ющи пѣ́ти просла́вльшемꙋ тѧ̀ бг҃ꙋ: А҆ллилꙋ́їа.

І҆́косъ ѕ҃.

Возсїѧ̀ въ чтⷭ҇нѣ́й і҆кѡ́нѣ твое́й, бцⷣе, свѣ́тъ сп҃се́нїѧ всѣ̑мъ блꙋжда́ющымъ во тьмѣ̀ грѣхѡ́въ и҆ страсте́й, и҆ всѣ̑мъ молѧ́щымсѧ пред̾ не́ю съ вѣ́рою и҆ бл҃гоговѣ́нїемъ ско́раѧ по́мощь подае́тсѧ. Оу҆мѡ́въ на́шихъ ѡ҆мраче́нїе свѣ́томъ твои́мъ ѿженѝ, всепѣ́таѧ, и҆ да́рꙋй и҆́стинный свѣ́тъ ᲂу҆зрѣ́ти всѣ̑мъ съ любо́вїю вопїю́щымъ тѝ си́це:

Ра́дꙋйсѧ, ѕвѣздо̀ незаходи́маѧ, сл҃нце пра́вды въ мі́ръ вводѧ́щаѧ: ра́дꙋйсѧ, мт҃и свѣ́та и҆́стиннагѡ, дꙋ́шы вѣ́рныхъ просвѣща́ющагѡ.

Ра́дꙋйсѧ, свѣ́тлымъ покро́вомъ ᲂу҆́мъ на́шъ ѡ҆мраче́нный ѡ҆сѣнѧ́ющаѧ: ра́дꙋйсѧ, зарѐ невече́рнѧѧ, мглꙋ̀ на́шихъ грѣхѡ́въ разгонѧ́ющаѧ.

Ра́дꙋйсѧ, во бл҃года́тнѣмъ ᲂу҆че́нїи наставлѧ́ющаѧ: ра́дꙋйсѧ, тьмы̀ и҆ вѣ́чныхъ мꙋ́къ на́съ и҆збавлѧ́ющаѧ.

Ра́дꙋйсѧ, ѿ сѣте́й вра́жїихъ свобожда́ющаѧ: ра́дꙋйсѧ, безꙋ́мїе мі́ра побѣжда́ющаѧ.

Ра́дꙋйсѧ, дꙋшевре́дныхъ ᲂу҆че́нїй низложе́нїе: ра́дꙋйсѧ, дꙋшеполе́зныхъ зна́нїй дарова́нїе.

Ра́дꙋйсѧ, і҆кѡ́ною твое́ю на́съ ᲂу҆тѣша́ющаѧ: ра́дꙋйсѧ, свѣ́томъ ра́дости дꙋ́шы веселѧ́щаѧ.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ з҃.

Хотѧ́щи всѣ̑мъ человѣ́кѡмъ сп҃сти́сѧ и҆ въ ра́зꙋмъ и҆́стины прїитѝ, пречⷭ҇таѧ мт҃и сво́й ѻ҆́бразъ, прибавле́нїе ᲂу҆ма̀ и҆менꙋ́емый, дарова́ла є҆́сть на́мъ, да всѝ съ вѣ́рою молѧ́щїисѧ пред̾ ни́мъ, крѣ́пость сло́ва, и҆ ра́зꙋмъ, и҆ мꙋ́дрость прїи́мше, въ тишинѣ̀ помыслѡ́въ цр҃ю̀ и҆ бг҃ꙋ на́шемꙋ пою́тъ: А҆ллилꙋ́їа.

І҆́косъ з҃.

Нѡ́ваѧ и҆ пресла̑внаѧ чꙋдеса̀ ꙗ҆влѧ́еши, мт҃и бж҃їѧ, вѣ̑рнымъ лю́демъ ст҃о́ю і҆кѡ́ною твое́ю: си́лою бл҃года́ти хрⷭ҇то́вы помрачє́нныѧ ᲂу҆мо́мъ просвѣща́еши, ѿ безꙋ́мїѧ ѿвраща́еши, разсла́блєнныѧ ᲂу҆крѣплѧ́еши и҆ всѣ̑мъ притека́ющымъ къ цѣле́бномꙋ твоемꙋ̀ ѻ҆́бразꙋ ско́рꙋю по́мощь подае́ши, подвиза́ющи пѣ́ти тебѣ̀ такова̑ѧ:

Ра́дꙋйсѧ, и҆з̾ глꙋбины̀ невѣ́дѣнїѧ и҆звлача́ющаѧ: ра́дꙋйсѧ, мнѡ́гїѧ въ ра́зꙋмѣ просвѣща́ющаѧ.

Ра́дꙋйсѧ, сло́во премꙋ́дрости просѧ́щымъ да́рꙋющаѧ: ра́дꙋйсѧ, несмы́сленныхъ разꙋ̑мны содѣва́ющаѧ.

Ра́дꙋйсѧ, грѣхѡ́вныѧ по́мыслы ѿгонѧ́ющаѧ: ра́дꙋйсѧ, сердца̀ ѡ҆жесточє́ннаѧ ᲂу҆мѧгча́ющаѧ.

Ра́дꙋйсѧ, ᲂу҆́мъ къ бг҃ꙋ возвыша́ющаѧ: ра́дꙋйсѧ, немꙋ̑дрыѧ ᲂу҆мꙋдрѧ́ющаѧ.

Ра́дꙋйсѧ, ко бл҃гоче́стїю наставлѧ́ющаѧ: ра́дꙋйсѧ, вѣ́чною ра́достїю ѡ҆дарѧ́ющаѧ.

Ра́дꙋйсѧ, къ сн҃ꙋ твоемꙋ̀ и҆ бг҃ꙋ мл҃твы вѣ́рныхъ приносѧ́щаѧ: ра́дꙋйсѧ, и҆ сама̀ непреста́ннѡ ᲂу҆ прⷭ҇то́ла вседержи́телѧ ѡ҆ всѣ́хъ молѧ́щаѧсѧ.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ и҃.

Стра́нно є҆́сть ви́дѣти, ка́кѡ і҆кѡ́на твоѧ̀, пречⷭ҇таѧ бцⷣе дв҃о, рꙋко́ю человѣ́ческою напи́саннаѧ, си́лою твое́ю бжⷭ҇твенною дꙋхѡ́въ тьмы̀ прогонѧ́етъ, не́мощїю ᲂу҆ма̀ ѡ҆держи̑мымъ ра́зꙋмъ подае́тъ и҆ всѣ́хъ неꙋдо́бь ᲂу҆ча́щихсѧ свѣ́тлѡ ᲂу҆мꙋдрѧ́етъ: тѣ́мже и҆ мы̀, во грѣсѣ́хъ погиба́ющїи, мо́лимъ тѧ̀ со слеза́ми: и҆зба́ви на́съ ѿ вра̑гъ ви́димыхъ и҆ неви́димыхъ, ѿ тьмы̀ неразꙋ́мїѧ и҆ мра́ка пре́лести, да всегда̀ пое́мъ сп҃си́телю и҆ бг҃ꙋ на́шемꙋ: А҆ллилꙋ́їа.

І҆́косъ и҃.

Всѧ̑ землѧ̀ на́ша преиспо́лнена є҆́сть, а҆́ки ѕвѣзда́ми бг҃освѣ́тлыми, чꙋдотво́рными ѻ҆́бразами твои́ми, бцⷣе дв҃о, въ не́йже и҆ сїѧ̀ і҆кѡ́на твоѧ̀, прибавле́нїе ᲂу҆ма̀ нарече́ннаѧ, бл҃года́тїю сїѧ́етъ и҆ согрѣва́етъ ѡ҆леденѣ̑вшаѧ сердца̀ на̑ша зна́меньми млⷭ҇ти твоеѧ̀ къ на́мъ грѣ̑шнымъ. Сегѡ̀ ра́ди пред̾ ли́комъ твои́мъ ст҃ы́мъ прекло́ньше колѣ̑на, воспѣва́емъ тѧ̀, всепречⷭ҇таѧ мт҃и на́ша, та́кѡ:

Ра́дꙋйсѧ, скѡ́рби на́шѧ въ ра́дость претворѧ́ющаѧ: ра́дꙋйсѧ, ѿ разжже́нныхъ стрѣ́лъ лꙋка́вагѡ на́съ защища́ющаѧ.

Ра́дꙋйсѧ, вѣ́рныхъ ра́зꙋмъ просвѣща́ющаѧ: ра́дꙋйсѧ, невѣ̑рныѧ посрамлѧ́ющаѧ.

Ра́дꙋйсѧ, младе́нцєвъ воспита́нїе и҆ бл҃года́тное ѡ҆хране́нїе: ра́дꙋйсѧ, ю҆́ныхъ наставле́нїе и҆ цѣломꙋ́дренное ѡ҆гражде́нїе.

Ра́дꙋйсѧ, неꙋдо́бь ᲂу҆ча́щымсѧ ра́зꙋмъ подаю́щаѧ: ра́дꙋйсѧ, помрачє́нныѧ ᲂу҆мо́мъ и҆сцѣлѧ́ющаѧ.

Ра́дꙋйсѧ, вра̑жїѧ сѣ̑ти разрꙋша́ющаѧ: ра́дꙋйсѧ, бл҃года́тїю де́моны прогонѧ́ющаѧ.

Ра́дꙋйсѧ, мт҃и щедро́тъ и҆ млⷭ҇рдїѧ: ра́дꙋйсѧ, сп҃се́нїѧ на́шегѡ наде́ждо.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ ѳ҃.

Всѧ́кое є҆стество̀ а҆́гг҃льское бл҃гоговѣ́йнѡ тебѣ̀ слꙋ́житъ, нб҃сѐ и҆ землѝ цр҃и́це, человѣ́ческїй же ро́дъ хвалы̀ тебѣ̀ прино́ситъ и҆ твою̀ ст҃ꙋ́ю і҆кѡ́нꙋ почита́етъ, сїю́ бо во ѿра́дꙋ и҆ ᲂу҆тѣше́нїе дарова́ла є҆сѝ на́мъ. Наꙋчѝ на́съ, ѽ всебл҃га́ѧ, досто́йнѡ сла́вити тѧ̀ и҆ воспѣва́ти ро́ждшемꙋсѧ ѿ тебѣ̀ сп҃си́телю мі́ра: А҆ллилꙋ́їа.

І҆́косъ ѳ҃.

Вѣті̑и человѣ́честїи недоꙋмѣва́ютъ позна́ти та́йнꙋ слꙋже́нїѧ твоегѡ̀ ро́дꙋ хрⷭ҇тїа́нскомꙋ, бцⷣе, нижѐ мо́гꙋтъ и҆з̾ѧсни́ти си́лꙋ чꙋдотво́рнꙋю, ѿ і҆кѡ́нъ твои́хъ происходѧ́щꙋю на всѧ́кꙋ по́льзꙋ дꙋше́внꙋю и҆ тѣле́снꙋю человѣ́кѡмъ. Мы́ же правосла́внїи, со слеза́ми ра́дости пред̾ і҆кѡ́ною твое́ю ст҃о́ю предстоѧ́ще, прославлѧ́емъ тѧ̀, бл҃года́тнаѧ, и҆ глаго́лемъ:

Ра́дꙋйсѧ, а҆́гг҃лѡвъ ра́дованїе: ра́дꙋйсѧ, а҆рха́гг҃лѡвъ ликова́нїе.

Ра́дꙋйсѧ, ю҆́же на воздꙋ́сѣ срѣта́ютъ херꙋві́ми: ра́дꙋйсѧ, є҆́йже похва̑льнаѧ прино́сѧтъ серафі́ми.

Ра́дꙋйсѧ, свѣ́тлое цр҃кве нбⷭ҇ныѧ и҆ земны́ѧ ᲂу҆краше́нїе: ра́дꙋйсѧ, всѣ́хъ человѣ̑къ и҆ безпло́тныхъ ᲂу҆дивле́нїе.

Ра́дꙋйсѧ, ѿ во́инствъ нбⷭ҇ныхъ почита́емаѧ: ра́дꙋйсѧ, ѿ земноро́дныхъ поклоне́нїемъ прославлѧ́емаѧ.

Ра́дꙋйсѧ, ѻ҆́бразомъ твои́мъ ᲂу҆мы̀ на́шѧ возводѧ́щаѧ къ мі́рꙋ го́рнемꙋ: ра́дꙋйсѧ, пꙋтеводи́тельнице на́ша ко ѻ҆ч҃ествꙋ нбⷭ҇номꙋ.

Ра́дꙋйсѧ, всѣ́хъ на́съ при крⷭ҇тѣ̀ сн҃а твоегѡ̀ ᲂу҆сынови́вшаѧ: ра́дꙋйсѧ, сїѧ́нїемъ дꙋшѝ твоеѧ̀ всю̀ зе́млю просвѣти́вшаѧ.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ і҃.

Сп҃стѝ хотѧ̀ мі́ръ ѿ безꙋ́мїѧ и҆ пре́лести вра́жїѧ, чл҃вѣколю́бецъ гдⷭ҇ь чꙋ́днꙋю і҆кѡ́нꙋ твою̀, бг҃омт҃и, дарова̀, пред̾ не́юже помраче́ннїи ᲂу҆мо́мъ и҆сцѣлѧ́ютсѧ, бѣснꙋ́ющїисѧ ѿ де́монѡвъ свобожда́ютсѧ, скорбѧ́щїи ᲂу҆тѣше́нїе и҆ ра́дость ѡ҆брѣта́ютъ. Тѣ́мже прославлѧ́юще бг҃а, подаю́щаго на́мъ таковы̑ѧ млⷭ҇ти, вопїе́мъ є҆мꙋ̀ бл҃года́рнѣ: А҆ллилꙋ́їа.

І҆́косъ і҃.

Стѣна̀ є҆сѝ неѡбори́маѧ и҆ покро́въ на́мъ, всенепоро́чнаѧ, сопроти́въ ѡ҆полче́нїй ви́димыхъ и҆ неви́димыхъ вра̑гъ, ѡ҆гражда́ющи на́съ ѿ всѧ́кихъ бѣ́дъ и҆ болѣ́зней. Сегѡ̀ ра́ди припа́дающе ко і҆кѡ́нѣ твое́й съ вѣ́рою въ по́мощь бл҃года́тнꙋю и҆ врачевство̀ всѣ́хъ недꙋ́гѡвъ дꙋше́вныхъ и҆ тѣле́сныхъ, ра́достнѡ вопїе́мъ тѝ си́це:

Ра́дꙋйсѧ, ѿ пꙋте́й поги́бельныхъ на́съ ᲂу҆далѧ́ющаѧ: ра́дꙋйсѧ, на всѧ́кꙋ и҆́стинꙋ и҆ пра́вдꙋ наставлѧ́ющаѧ.

Ра́дꙋйсѧ, дꙋ́ха болѣ́зни и҆ ᲂу҆ны́нїѧ ѿгна́нїе: ра́дꙋйсѧ, дꙋ́ха ра́зꙋма и҆ крѣ́пости стѧжа́нїе.

Ра́дꙋйсѧ, врагѝ си́лою бж҃їею посрамлѧ́ющаѧ: ра́дꙋйсѧ, совѣ́ты нечести́выхъ разорѧ́ющаѧ.

Ра́дꙋйсѧ, бѣснꙋ́ющымсѧ здра́вїе подаю́щаѧ: ра́дꙋйсѧ, всѧ̑ лю̑тыѧ недꙋ́ги врачꙋ́ющаѧ.

Ра́дꙋйсѧ, ѿ сме́рти дꙋхо́вныѧ на́съ и҆збавлѧ́ющаѧ: ра́дꙋйсѧ, слеза́ми твои́ми грѣхѝ на́шѧ ѡ҆мыва́ющаѧ.

Ра́дꙋйсѧ, ра́достїю дх҃о́вною на́съ ди́внѡ насыща́ющаѧ: ра́дꙋйсѧ, въ жи́знь бꙋ́дꙋщагѡ вѣ́ка на́съ вводѧ́щаѧ.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ а҃і.

Пѣ́нїе бл҃года́рственное прино́симъ пред̾ пречⷭ҇тымъ ѻ҆́бразомъ твои́мъ, пренепоро́чнаѧ, за неизрече́нное твоѐ млⷭ҇рдїе и҆ мо́лимсѧ, ѽ бг҃обл҃года́тнаѧ: ѡ҆градѝ ᲂу҆́мъ на́шъ и҆ се́рдце ѿ тлетво́рныхъ ᲂу҆че́нїй, невѣ́рїѧ и҆ сꙋевѣ́рїѧ, сохранѝ зе́млю на́шꙋ ѿ всѧ́кихъ нестрое́нїй, врага́ми вѣ́ры воздвиза́емыхъ, и҆ сподо́би на́съ чи́стымъ се́рдцемъ сла́вити созда́телѧ на́шего, пою́ще пѣ́снь: А҆ллилꙋ́їа.

І҆́косъ а҃і.

Ꙗ҆́кѡ свѣтопрїе́мнꙋю свѣщꙋ̀ зри́мъ і҆кѡ́нꙋ твою̀, бг҃омт҃и, сїѧ́нїемъ чꙋде́съ зе́млю на́шꙋ просвѣща́ющꙋю, на пꙋ́ть сп҃се́нїѧ на́съ наставлѧ́ющꙋю и҆ сердца̀ на̑ша любо́вїю воспламенѧ́ющꙋю къ тебѣ̀, пречⷭ҇тѣй мт҃ри гдⷭ҇а. Мы́ же вѣ́дꙋще си́лꙋ бл҃года́ти твоеѧ̀, пѣ́сньми ра́достными прославлѧ́емъ тѧ̀ си́це:

Ра́дꙋйсѧ, премꙋ́дростїю соломѡ́на превы́шшаѧ: ра́дꙋйсѧ, сокровє́нныѧ та̑йны бж҃їѧ вѣ̑рнымъ ѿкрыва́ющаѧ.

Ра́дꙋйсѧ, любомꙋ̑дрыѧ немꙋ̑дрыѧ ꙗ҆влѧ́ющаѧ: ра́дꙋйсѧ, мо́лнїе, дꙋ́шы просвѣща́ющаѧ.

Ра́дꙋйсѧ, сꙋ́етнꙋю мꙋ́дрость вѣ́ка сегѡ̀ посрамлѧ́ющаѧ: ра́дꙋйсѧ, ѡ҆слѣплє́нныѧ є҆́ю на пꙋ́ть пра́вый наставлѧ́ющаѧ.

Ра́дꙋйсѧ, и҆́скреннѣ молѧ́щымсѧ ᲂу҆́мъ ѡ҆бновлѧ́ющаѧ: ра́дꙋйсѧ, въ ча́съ недоꙋмѣ́нїй мы́сль бл҃гꙋ на се́рдце полага́ющаѧ.

Ра́дꙋйсѧ, премꙋ́дрости и҆ бл҃гости бж҃їѧ ѿкрове́нїе: ра́дꙋйсѧ, ꙗ҆ви́вшаѧ на́мъ ди́внꙋю і҆кѡ́нꙋ твою̀ ꙗ҆́кѡ да́ръ нбⷭ҇ный.

Ра́дꙋйсѧ, и҆сто́чниче ра́дости непреста́нныѧ: ра́дꙋйсѧ, го́рнѧгѡ мі́ра красото̀ неизрече́ннаѧ.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ в҃і.

Бл҃года́ть бжⷭ҇твеннꙋю и҆спросѝ ᲂу҆ сн҃а твоегѡ̀ и҆ бг҃а, ѽ всебл҃га́ѧ, пода́ждь на́мъ рꙋ́кꙋ по́мощи, да не поги́бнемъ во грѣсѣ́хъ на́шихъ: согрѣ́й на́съ любо́вїю твое́ю, ѡ҆чи́сти ᲂу҆мы̀ на́шѧ ѿ гордели́выхъ помыслѡ́въ, просвѣтѝ сердє́чныѧ ѻ҆́чи на́ши къ зрѣ́нїю пꙋтѝ смире́нїѧ и҆ сподо́би на́съ въ жи́зни се́й и҆ въ црⷭ҇твѣ нбⷭ҇нѣмъ воспѣва́ти творцꙋ̀ и҆ созда́телю на́шемꙋ: А҆ллилꙋ́їа.

І҆́косъ в҃і.

Пою́ще чꙋдеса̀, ѿ і҆кѡ́ны твоеѧ̀ ꙗ҆влє́ннаѧ, влⷣчце, хва́лимъ, сла́вимъ и҆ велича́емъ тѧ̀, чⷭ҇тнѣ́йшꙋю вои́стиннꙋ херꙋві̑мъ и҆ сла́внѣйшꙋю без̾ сравне́нїѧ серафі̑мъ. При́зри съ нб҃сѐ, бцⷣе, на предстоѧ́щыѧ пред̾ ст҃о́ю і҆кѡ́ною твое́ю и҆ бл҃года́ть твою̀ низпослѝ на́мъ, и҆зба́ви ѿ всѧ́кихъ бѣ́дъ и҆ и҆скꙋше́нїй вра́жїихъ всѣ́хъ ꙗ҆́кѡ застꙋ́пницѣ и҆ храни́тельницѣ на́шей вопїю́щихъ тѝ:

Ра́дꙋйсѧ, мл҃твами твои́ми ве́сь мі́ръ сп҃са́ющаѧ: ра́дꙋйсѧ, свѣ́томъ чⷭ҇тоты̀ твоеѧ̀ всѣ́хъ просвѣща́ющаѧ.

Ра́дꙋйсѧ, ны́нѣшнѧгѡ ско́рбнагѡ вѣ́ка ᲂу҆тѣше́нїе: ра́дꙋйсѧ, во́ли гдⷭ҇ни ѿкрове́нїе.

Ра́дꙋйсѧ, зе́млю рꙋ́сскꙋю въ достоѧ́нїе себѣ̀ и҆збра́вшаѧ: ра́дꙋйсѧ, ꙗ҆вле́нїемъ чꙋдотво́рныхъ і҆кѡ́нъ твои́хъ сїю̀ бл҃гослови́вшаѧ.

Ра́дꙋйсѧ, чꙋдесы̀ ѿ ѻ҆́браза твоегѡ̀ къ свѣ́тꙋ и҆́стины на́съ возводѧ́щаѧ: ра́дꙋйсѧ, почита́ющихъ ли́къ тво́й незри́мѡ бл҃года́тїю ѡ҆сѣнѧ́ющаѧ.

Ра́дꙋйсѧ, ра́дость бл҃года́тнꙋю въ сердца̀ бг҃олюби̑ваѧ и҆злива́ющаѧ: ра́дꙋйсѧ, двє́ри млⷭ҇рдїѧ бж҃їѧ хода́тайствомъ твои́мъ ѿверза́ющаѧ.

Ра́дꙋйсѧ, въ стѧжа́нїи дарѡ́въ ст҃а́гѡ дх҃а на́мъ поможе́нїе: ра́дꙋйсѧ, же́но, є҆ди́на чⷭ҇таѧ и҆ бл҃гослове́ннаѧ.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ г҃і.

Ѽ всепѣ́таѧ мт҃и присносꙋ́щнагѡ свѣ́та и҆ ѻ҆́ч҃їѧ премⷣрости! Ты̀ є҆сѝ свѣ́тъ ѡ҆мраче́нныхъ, прибавле́нїе ᲂу҆ма̀ и҆ ра́дость серде́цъ на́шихъ: ᲂу҆слы́ши и҆ прїимѝ моле́нїе на́съ грѣ́шныхъ, ᲂу҆мꙋдрѝ на́съ неразꙋ́мныхъ и҆ наста́ви на пѣ́нїе и҆ мл҃твꙋ пред̾ і҆кѡ́ною твое́ю ди́вною. Не преста́й моли́ти сн҃а твоего̀ и҆ бг҃а ѡ҆ на́съ, недосто́йныхъ рабѣ́хъ твои́хъ, сла́вѧщихъ тѧ̀ и҆ пою́щихъ є҆мꙋ̀: А҆ллилꙋ́їа.

Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й, и҆ конда́къ а҃-й.

І҆́косъ а҃.

А҆́гг҃лъ предста́тель по́сланъ бы́сть во гра́дъ назаре́тъ къ чи́стѣй ѻ҆трокови́цѣ мр҃і́и рещѝ: ра́дꙋйсѧ, тобо́ю бо сн҃ъ бж҃їй воплоти́тсѧ. Пречⷭ҇таѧ же дв҃а, бл҃говѣ́стїе а҆рха́гг҃ла слы́шавши, во смире́нїи се́рдца ѿвѣща̀: сѐ, раба̀ гдⷭ҇нѧ, бꙋ́ди мнѣ̀ по глаго́лꙋ твоемꙋ̀. Мы́ же грѣ́шнїи, бл҃гоговѣ́йнѡ чтꙋ́ще мт҃рь хрⷭ҇та̀ бг҃а на́шегѡ, ꙗ҆́кѡ ѿ а҆́гг҃ла наꙋчи́хомсѧ, та́кѡ со ᲂу҆миле́нїемъ вопїе́мъ бл҃года́тнѣй:

Ра́дꙋйсѧ, бл҃гослове́ннаѧ въ жена́хъ: ра́дꙋйсѧ, ᲂу҆ гдⷭ҇а ѡ҆брѣ́тшаѧ бл҃года́ть.

Ра́дꙋйсѧ, си́лою всевы́шнѧгѡ ѡ҆сѣне́ннаѧ: ра́дꙋйсѧ, дх҃омъ ст҃ы́мъ ѡ҆сщ҃е́ннаѧ.

Ра́дꙋйсѧ, вѣ́рнаѧ рабо̀ гдⷭ҇нѧ: ра́дꙋйсѧ, сп҃си́телѧ мі́ра ро́ждшаѧ.

Ра́дꙋйсѧ, бг҃оизбра́ннаѧ ѻ҆трокови́це: ра́дꙋйсѧ, нб҃сѐ и҆ землѝ цр҃и́це.

Ра́дꙋйсѧ, мт҃и свѣ́та, всѣ́хъ просвѣща́ющагѡ: ра́дꙋйсѧ, вѣ́рныхъ смы́слы ѡ҆зарѧ́ющаѧ.

Ра́дꙋйсѧ, премꙋ́дрыхъ превосходѧ́щаѧ ра́зꙋмъ: ра́дꙋйсѧ, ꙗ҆́кѡ тѧ̀ ᲂу҆бл҃жа́ютъ всѝ ро́ди.

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Конда́къ а҃.

И҆збра́ннѣй ѿ всѣ́хъ родѡ́въ бж҃їей мт҃ри, нб҃сѐ и҆ землѝ цр҃и́це, врачевство̀ дꙋхо́вное всемꙋ̀ мі́рꙋ подаю́щей, бл҃года̑рнаѧ пѣ̑нїѧ прино́симъ ѡ҆ дарова́нїи бжⷭ҇твеннагѡ сокро́вища, чꙋдотво́рныѧ і҆кѡ́ны є҆ѧ̀, прибавле́нїе ᲂу҆ма̀ нарече́нныѧ, є҆́юже ѡ҆гражда́еми, ра́дꙋемсѧ свѣ́тлѡ и҆ съ любо́вїю взыва́емъ:

Ра́дꙋйсѧ, всемлⷭ҇тиваѧ влⷣчце, премꙋ́дрость и҆ ра́зꙋмъ вѣ̑рнымъ лю́демъ твои̑мъ да́рꙋющаѧ.

Мл҃тва.

Ѽ пречⷭ҇таѧ бцⷣе, дарѡ́въ дх҃о́вныхъ пода́тельнице, до́ме, є҆го́же созда̀ себѣ̀ премⷣрость бж҃їѧ, ѿ мі́ра къ премі̑рнымъ ᲂу҆́мъ на́шъ возводѧ́щаѧ и҆ всѣ́хъ къ позна́нїю ра́зꙋма приводѧ́щаѧ! Прїимѝ моле́бное пѣ́нїе ѿ на́съ, недосто́йныхъ рабѡ́въ твои́хъ, съ вѣ́рою и҆ ᲂу҆миле́нїемъ покланѧ́ющихсѧ пред̾ пречⷭ҇тымъ ѻ҆́бразомъ твои́мъ. Оу҆молѝ сн҃а твоего̀ и҆ бг҃а на́шего, да да́рꙋетъ власте́мъ на́шымъ мꙋ́дрость и҆ си́лꙋ, сꙋдїѧ́мъ пра́вдꙋ и҆ нелицепрїѧ́тїе, па́стырємъ мꙋ́дрость дх҃о́внꙋю и҆ ре́вность, наста́вникѡмъ смиренномꙋ́дрїе, ча́дѡмъ послꙋша́нїе, всѣ̑мъ же на́мъ дꙋ́хъ ра́зꙋма и҆ бл҃гоче́стїѧ, дꙋ́хъ смире́нїѧ и҆ кро́тости, дꙋ́хъ чистоты̀ и҆ пра́вды. Пода́ждь на́мъ, всепѣ́таѧ мт҃и, ᲂу҆ма̀ прибавле́нїе, ᲂу҆мирѝ, соединѝ во враждѣ̀ и҆ раздѣле́нїи сꙋ́щыѧ и҆ положѝ и҆̀мъ сою́зъ любвѐ неразрꙋши́мый, всѣ́хъ заблꙋ́ждшихъ ѿ неразꙋ́мїѧ къ свѣ́тꙋ и҆́стины хрⷭ҇то́вы ѡ҆братѝ, на пꙋ́ть стра́ха бж҃їѧ, воздержа́нїѧ и҆ трꙋдолю́бїѧ наста́ви, сло́во премꙋ́дрости и҆ дꙋша́мъ поле́зное зна́нїе просѧ́щымъ да́рꙋй, ѡ҆сѣнѝ на́съ вѣ́чною ра́достїю, херꙋві́мѡвъ чтⷭ҇нѣ́йшаѧ и҆ серафі́мѡвъ сла́внѣйшаѧ сꙋ́щи. Мы́ же ди̑внаѧ дѣла̀ и҆ многоразꙋ́мнꙋю премꙋ́дрость бж҃їю въ мі́рѣ и҆ жи́зни на́шей ви́дѧще, ᲂу҆страни́мсѧ земны́ѧ сꙋеты̀ и҆ лꙋка́выхъ попече́нїй, и҆ ᲂу҆мы̀ и҆ сердца̀ на́шѧ на нб҃са̀ возведе́мъ, ꙗ҆́кѡ да твои́мъ застꙋпле́нїемъ и҆ по́мощїю сла́вꙋ, хвалꙋ̀, бл҃годаре́нїе и҆ поклоне́нїе за всѧ̑ въ трⷪ҇цѣ сла́вимомꙋ бг҃ꙋ и҆ всѣ́хъ созда́телю воздади́мъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Данные исследователей говорят о том, что иконография образа сложилась в XVI веке под влиянием западных гравюр и икон со сложной символикой. Однако большая часть сохранившихся икон «Прибавление ума» относится к XVIII-XIX векам. На них Пресвятая Дева и Богомладенец изображаются с царскими венцами на главах, при этом Христос благословляет правой рукой, а в левой руке Его — держава, символ царской власти. Богоматерь с Младенцем изображается на темнооливковом фоне в лучах Божественного света. Особенность иконы — своеобразные одеяния. Божия Матерь облачена вместе с Богомладенцем в длинный колоколообразный плащ — далматик. Он красного цвета, богато расшит золотыми крестами и украшен драгоценными камнями. В верхних углах иконы — лампады с языками пламени. Пречистая Дева изображена на фоне звездного неба, открывающегося под аркой портала. С обеих сторон подлетают к Богоматери с Младенцем Ангелы с зажженными свечами; над главами Их — три Серафима, в подножии — Херувим с распростертыми крыльями. Внизу виднеется город, символ Горнего Иерусалима.

Сохранилось старинное сказание, объясняющее происхождение названия иконы: «В ближайшее время после патриарха Никона жил в Москве один благочестивый человек. Много он читал книг церковных Иосифовского времени, а потом стал читать книги, исправленные патриархом Никоном. Начитавшись тех и других книг, стал он много думать и размышлять: будет ли он прав пред Богом и каким книгам нужно следовать ему, чтобы спастись; долго он думал, но решить вопроса не мог и сошел с ума. Когда возвращалось к нему сознание, он молился Божией Матери, чтобы Она возвратила ему разум. По его молитве последовало ему видение Божией Матери. Она заповедала ему написать образ в том виде, как Она явилась ему, и молиться пред ним, и обещала, что если он исполнит это, будет здоров. Человек тот был иконописец. После видения, когда возвращалось к нему сознание и прояснялся рассудок, он принимался писать образ Божией Матери. Но так как видение было кратко, то он забывал, как писать образ. Тогда он снова молился Богоматери и продолжал писать так, как внушал ему Бог. Таким образом он написал икону и назвал ее «Прибавление ума» ».

В начале XX века русский исследователь Андрей Александрович Титов установил, что прототипом иконы Божией Матери «Прибавление ума» послужила статуя Богоматери из города Лорето в Италии (точное указание на первообраз дал ему академик Никодим Павлович Кондаков): «Изображение этой иконы появилось на Руси, очевидно, с XVI века. В Лорето находится Святой домик или Святая хижина, где помещается образ Богоматери. Этот образ сделан целиком из кедрового дерева, покрытого сплошь бриллиантовыми ривьерами и жемчужными нитками. Изображение Богоматери, в общем сходно с иконой «Прибавление ума», которая западного происхождения, только переделана на «московский манер»».

В конце XX столетия выводы А.А Титова получили новые подтверждения трудами многих итальянских историков, археологов и искусствоведов. Паломники к Святому Дому в Лорето теперь могут увезти с собой такую же картонную иконку «Прибавление ума», какая продается в московских православных церковных лавках, только под итальянской иконкой добавлена подпись: «Богоматерь Лоретская. Русская икона XVIII века. Старославянская надпись гласит: "Икона Пресвятой Матери Божией, Пречистой Девы Марии, называемая Ключ мудрости».

На Руси самая древняя из известных икон Божией Матери «Прибавление ума» находится в Ярославской обласи в Покровском храме города Романов-Борисоглебск (Тутаев).

Чудотворный образ «Прибавление ума» начала XVIII века находится в Московском Тихвинском храме в Алексеевском.

Перед этой иконой обращаются с молитвой к Богоматери и Ея Богомладенцу как к источнику высшей мудрости и разума. Просят о «прибавлении ума», о даровании помощи в учении, а также о духовном просвещении и помощи в воспитании детей.