Конда́к 1.

Взбра́нной Воево́де и Влады́чице на́шей Богоро́дице похва́льная воспису́ем Ти́ раби́ Твои́, Всеми́лостивая Ма́ти, благоизво́лившей яви́ти на ка́мени сле́д стопы́ Своея́ у пеще́ры Доло́жстей на реце́ До́лгой. Излива́я лобыза́ющим ю́ и моля́щимся Тебе́ милосе́рдие неизче́тное, от вся́ких на́с бе́д и скорбе́й свободи́, при́сно зову́щих:

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

И́кос 1.

Арха́нгельскими ли́цы воспева́ема и А́нгельскими Си́лы блажи́ма на небеси́, Богоро́дице Де́во, не пре́зри на́с, земны́х, воспева́ющих Тя́, Пречи́стая, и сла́вящих ди́вное зна́мение ми́лости Твоея́ на реце́ До́лгой, егда́ на ка́мени целе́бною стопо́ю запечатле́ла еси́ чуде́сное явле́ние Твое́. Е́юже зе́млю на́шу благода́тию озари́ла еси́, Чи́стая, от нея́ подава́я струи́ чуде́с и по́мощи ве́рным, зову́щим Ти́ такова́я:

Ра́дуйся, Благослове́нная Дщи́ Отца́ Небе́снаго; ра́дуйся, Неискусобра́чная Роди́тельнице Бо́га Сло́ва.

Ра́дуйся, арха́нгелов и а́нгелов Велича́ние; ра́дуйся, челове́ческих ликостоя́ний Похвале́ние.

Ра́дуйся, на ка́мени сле́д стопы́ Твоея́ на́м оста́вившая; ра́дуйся, явле́нием Свои́м у пеще́ры Доло́жстей лю́ди уте́шившая.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 2.

Ви́девше преди́вное явле́ние Твое́ у пеще́ры над реко́ю До́лгой, пасу́щия ста́до свое́ му́жие благочести́вии, оста́виша о́ное и поспеши́ша к ме́сту светоза́рнаго явле́ния Твоего́, и узре́ша Тя́, стоя́щую на ка́мени в реце́, лучи́ па́че со́лнечных испуща́ющую, возра́довашася неизрече́нно, Бо́гу восклица́я: Аллилу́иа.

И́кос 2.

Разуме́ти хотя́ уви́денное чу́до ми́лости Твоея́, Преблага́я, воше́дши в реку́, прини́кнувше к ка́мени, на не́мже стоя́сте пречи́стеи но́зе Твои́, обре́те сле́д десны́я стопы́ Твоея́, чуде́сне на ка́мени запечатле́нный, му́жие богобоя́зненнии с недоуме́нием и тре́петом просты́х серде́ц свои́х возопи́ша:

Ра́дуйся, явле́нием Твои́м на́с возвесели́вшая; ра́дуйся, о́ным но́вую благода́ть и ми́лость на́м яви́вшая.

Ра́дуйся, ве́рных при́сное Дерзнове́ние; ра́дуйся, сумня́щихся до́брое Утвержде́ние.

Ра́дуйся, пресла́вными чудеса́ми в земли́ Доло́жстей возсия́вшая; ра́дуйся, я́ко вся́ возмо́жна Тебе́, си́м показа́вшая.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 3.

Си́ла Вы́шняго и ми́лость Твоя́, Пречи́стая, осени́ ме́сто по́двигов и́нока пустыннолюби́ваго, подвиза́ющагося в пеще́ре у реки́, иде́же чуде́сне соверши́шася явле́ние Твое́, Богома́ти, запечатле́вши на ка́мени ви́димым о́бразом Ма́тернее попече́ние Твое́, ве́рно воспева́ющему Бо́гу: Аллилу́иа.

И́кос 3.

Иму́ще благоутро́бное попече́ние о граде́х и ве́сех земли́ ру́сския, осия́ла луча́ми благода́ти Твоея́, Влады́чице, ме́сто по́двигов пустыннолю́бца и́нока, да вся́к, притека́я на о́ное у цельбоно́сныя стопы́ Твоея́, с те́плою ве́рою и любо́вию к Тебе́, Благослове́нней, воспева́ет та́ко:

Ра́дуйся, Ма́терния щедро́ты Твоя́ на на́с излива́ющая; ра́дуйся, ка́мнем со стопо́ю Твое́ю на́м благоде́ющая.

Ра́дуйся, во обстоя́нии су́щим ско́рую по́мощь да́рующая; ра́дуйся, отча́янным наде́жду возвраща́ющая.

Ра́дуйся, смире́нным мольба́м рабо́в Твои́х вне́млющая; ра́дуйся, утеше́ние на́м пода́ти поспеша́ющая.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 4.

Бу́рю ско́рбных земны́х испыта́ний препобежда́я, и́нок благочести́вый на ме́сте пеще́ры бу́дущия на дре́ве в ве́твиях чуде́сне ико́ну Успе́ния Твоего́ обре́те, си́м дарова́нием, подвиза́я о́наго, на ме́сте то́м пеще́ру ископа́ти и в не́й богоуго́дное житие́ проводи́ти, Бо́гу воспева́я: Аллилу́иа.

И́кос 4.

Слы́шаще лю́дие о но́вом явле́нии ми́лости Твоея́, Богома́ти, из мно́гих градо́в и ве́сей стека́хуся к ме́сту, иде́же поста́вися о́браз пречи́стаго Успе́ния Твоего́, и к ка́мню, на не́мже запечатле́ся цельбоно́сная стопа́ Твоя́, с ве́рою и умиле́нием припа́дая к о́ным, исцеле́ния прие́мше разли́чных неду́гов, душе́вных и теле́сных, воспева́я Ти́, такова́я:

Ра́дуйся, Ма́тернюю любо́вь к на́м гре́шным простира́ющая; ра́дуйся, си́лою Твое́ю на́шу не́мощь восполня́ющая.

Ра́дуйся, вселе́нныя Похвало́, в доли́не Доло́жстей оби́тель Себе́ на земли́ устро́ившая; ра́дуйся, благосты́ни Бе́здно, зе́млю на́шу чудесы́ вели́кими просла́вившая.

Ра́дуйся, Влады́чице на́ша, по́мощию Твое́ю неду́ги на́ша исцеля́ющая; ра́дуйся, Цели́тельнице на́ша, боле́зней душе́вных и теле́сных на́с избавля́ющая.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 5.

Боготе́чней звезде́ уподо́бися ико́на Твоя́, Влады́чице, ю́же я́ко да́р небе́сный восприе́мше лю́дие земли́ Доло́жстей, благода́рно воспе́ша Промысли́телю Бо́гу: Аллилу́иа.

И́кос 5.

Ви́девше чудеса́ пресла́внии от ико́ны Успе́ния Твоего́ и воды́, из не́др пеще́ры чуде́сне истека́ющия, лю́дие благочести́вии со усе́рдием притека́ху к ме́сту посеще́ния Твоего́, в неду́зех исцеле́ние прие́млюще, удивля́хуся ми́лости Твоея́, с ве́рою зову́ще:

Ра́дуйся, люде́й селе́ния Доло́жскаго све́том ве́ры озари́вшая; ра́дуйся, явле́нием чуде́с от святы́я ико́ны и стопы́ Твоея́ все́х увесели́вшая.

Ра́дуйся, Горо́ благода́ти Небе́сныя, на скло́не горы́ оби́тель пеще́рную утверди́вшая; ра́дуйся, Киво́те Святы́ни Небе́сныя, в пеще́ре Доло́жстей жили́ще Себе́ устро́ившая.

Ра́дуйся, я́ко пред свято́ю ико́ною Твое́ю зна́мения чуде́с созерца́ем; ра́дуйся, я́ко на Твое́ предста́тельство все́ упова́ние свое́ возлага́ем.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 6.

Пропове́дницы ми́лости Твоея́, Богома́ти, яви́шася лю́дие селе́ний Доло́жстих, и вси́ притека́ющии к ме́сту явле́ния Твоего́. По моли́твам к Тебе́ в страда́ниих свои́х от разли́чных неду́гов, исцеле́ние прие́мше, с благодаре́нием о Твое́м Ма́тернем попече́нии, Бо́гу воспева́ют: Аллилу́иа.

И́кос 6.

Возсия́ благода́ть неизрече́нная от святы́я ико́ны Твоея́, и ка́мени, на не́мже чуде́сне стоя́сте пречи́стеи но́зе Твои́, Богома́ти. Вели́чие ми́лости Твоея́ пропове́дуем, склоня́я главы́ своя́ и укрепля́ясь ве́рою во всемогу́щую по́мощь Твою́ свы́ше, вопие́м Ти́, такова́я:

Ра́дуйся, все́м стра́ждущим и скорбя́щим све́тлая Ра́досте; ра́дуйся, все́м призыва́ющим Тя́ ско́рая Помо́щнице.

Ра́дуйся, отцы́ на́ша в благоче́стии сохрани́вшая; ра́дуйся, и на́ше неможе́ние не отри́нувшая.

Ра́дуйся, Моли́твеннице на́ша те́плая; ра́дуйся, Засту́пнице на́ша усе́рдная.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 7.

Хотя́ благочести́вии лю́дие возблагодари́ти Тя́, Богоро́дице, о Небе́снем покрови́тельстве Твое́м ме́сту и все́м притека́ющим к о́ному, устро́иша Це́рковь во и́мя пречи́стаго Успе́ния Твоего́, да в не́й упова́ние на Тя́ возложи́вше, Сы́ну Твоему́ и Бо́гу на́шему воспева́ют: Аллилу́иа.

И́кос 7.

Но́вое зна́мение милосе́рдия Твоего́ яви́ла еси́, Влады́чице, егда́ многокра́тне явля́лася еси́ на тропе́ у подо́швы скалы́, реко́ю До́лгою омыва́емой, освяща́я ме́сто моли́тв и по́двига и́ноческаго, утвержда́я ве́рных в Правосла́вии святооте́честем и науча́я и́х во умиле́нии се́рдца зва́ти Тебе́:

Ра́дуйся, тве́рдое Правосла́вия Укрепле́ние; ра́дуйся, от Це́ркви отпа́вших к ве́ре Возрожде́ние.

Ра́дуйся, пред Го́сподем дерзнове́нно за на́с предста́тельствующая; ра́дуйся, гне́в Его́ пра́ведный на ми́лость преклоня́ющая.

Ра́дуйся, стоя́ти за ве́ру Правосла́вную на́с науча́ющая; ра́дуйся, ско́рбь на́шу в ра́дость претворя́ющая.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 8.

Стра́нное чу́до зри́м о Тебе́, Богома́ти, я́ко лю́дие теле́сными и душе́вными неду́гами одержи́мии, целова́нием ико́ны Твоея́ и цельбоно́сныя стопы́, чуде́сне явле́нней, исцеля́хуся. Ви́дяще же, я́ко проше́ния и́х во бла́го исполня́ются, утверди́шася в ве́ре и наде́жде на по́мощь Твою́, Всеси́льному Бо́гу вопию́ще: Аллилу́иа.

И́кос 8.

Вся́ вели́чия чуде́с Твои́х, неизглаго́ланная Та́йно, просла́вити хотя́, святи́тель Дими́трий, архиепи́скоп Новгоро́дский, повеле́ кре́стныя хо́ды и моле́ния в пра́здник Успе́ния Твоего́ на вся́ко ле́то соверша́ти, да бу́дет чу́дное ме́сто явле́ний Твои́х просла́влено, я́ко благода́ти исто́чник и наде́жды утвержде́ние все́м воспева́ющим неисче́тныя благодея́ния Твоя́, моле́нии си́ми:

Ра́дуйся, Небе́сный Престо́ле, боголе́пный хра́м а́ки же́ртву Ти́ уго́дну прии́мшая; ра́дуйся, Очисти́лище ми́ру, о́браз Тво́й честны́й во освяще́ние на́м дарова́вшая.

Ра́дуйся, Ма́ти милосе́рдная, ру́це Свои́ на по́мощь на́м простира́ющая; ра́дуйся, от оче́с стра́ждущих сле́зы отира́ющая.

Ра́дуйся, я́ко в пречу́дней ико́не Твое́й зало́г ми́лости ве́чныя обрета́ем; ра́дуйся, я́ко моли́твами Твои́ми грехо́вное те́рние посеца́ем.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 9.

Вся́кое естество́ челове́ческое удиви́ся пресла́вному чудеси́ явле́ния Твоего́, Пречи́стая, недоумева́ет смире́нне пред вели́чеством непостижи́мыя та́йны посеще́ния Твоего́. За премно́гую ми́лость Твою́ к на́м недосто́йным и Твою́ благода́ть на́м источа́емую, спаса́ющему все́х на́с Тобо́ю, Бо́гу воспева́ем: Аллилу́иа.

И́кос 9.

Вити́йство челове́ческое недоумева́ет о Тебе́, Богоро́дице толи́кия зна́мения ми́лости Твоея́, от святы́я ико́ны и стопы́ чуде́сне подава́ющей, на Тя́ бо, Пречи́стая, упова́ние возложи́вше, и от Тебе́ еди́ныя по Бо́зе спасе́ние ча́юще, я́ко благо́й Засту́пнице зове́м Ти́ си́це:

Ра́дуйся, дерзнове́нно бе́здну милосе́рдия Бо́жия на на́с призыва́ющая; ра́дуйся, Прибе́жище на́ше, в годи́ну бе́дствий на по́мощь на́м ускоря́ющая.

Ра́дуйся, Реко́ многово́дная, от ико́ны и стопы́ Твоея́ струи́ благода́тныя источа́ющая; ра́дуйся, Звездо́ путево́дная, от любве́ земны́я к Небе́сней Любве́ Бо́жией на́с приводя́щая.

Ра́дуйся, Хра́м Госпо́день, Це́ркви Небе́сныя и земны́я Украше́ние; ра́дуйся, всечу́дное все́х с Бо́гом Примире́ние.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 10.

Спасти́ хотя́ мно́гия от обдержа́щих страсте́й и напа́стей, чу́дную ико́ну Твою́ и ка́мень со сле́дом стопы́ Твоея́ отце́м на́шим на земли́ о́тчей дарова́ла еси́. И на́м, спасе́ния и́щущим, бу́ди ми́лостивая Ма́ти, да сла́вяще Тя́, воспева́ем ро́ждшемуся от Тебе́ Спа́су ду́ш на́ших: Аллилу́иа.

И́кос 10.

Стена́ еси́ и Заступле́ние прибега́ющим с ве́рою к Тебе́, Всеблага́я Де́во, не то́кмо в доли́не Доло́жстей на ме́сте явле́ния Твоего́, но и по все́й стране́ Росси́йстей явля́еши зна́мения ми́лости Твоея́. Таково́му благоволе́нию ра́дующеся, во умиле́нии се́рдца зове́м Ти́:

Ра́дуйся, страны́ Росси́йския несокруши́мое Огражде́ние; ра́дуйся, ны́нешняго ско́рбнаго ве́ка Утеше́ние.

Ра́дуйся, Оте́чество на́ше в жре́бий Себе́ избра́вшая; ра́дуйся, ико́ны Твоя́ чудотво́рныя я́ко зве́зды в не́м умно́жившая.

Ра́дуйся, всю́ вселе́нную луча́ми Твоея́ благода́ти озаря́ющая; ра́дуйся, све́том ра́дости ду́ши на́ша просвеща́ющая.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 11.

Пе́ние благода́рственное и моле́ния те́плыя прино́сим Ти́, Влады́чице, не таи́м благодея́ний Твои́х, от ка́мене со стопо́ю Твое́ю и ико́ны явле́нных, припа́дая к о́ным со усе́рдием мно́гим мо́лим Тя́, Пречи́стая: Покры́й на́с Покро́вом Твои́м святы́м от вся́каго зла́ и научи́ досто́йно воспева́ти Бо́гу в Тро́ице: Аллилу́иа.

И́кос 11.

Све́т живота́ вре́меннаго и наде́жду жи́зни ве́чныя яви́ Тя Госпо́дь во мра́це жития́ су́щим, Преблага́я Де́во. Предстои́ши бо Престо́лу Сла́вы Вседержи́теля, за христиа́ны и ми́р ве́сь моля́щися. Сего́ ра́ди о Тебе́ ра́дуется вся́кая тва́рь, и я́ко Засту́пницу на́шу славосло́вит Тя́ си́це:

Ра́дуйся, зе́млю Доло́жскую благоуха́нием свя́тости испо́лнившая; ра́дуйся, Доло́жскую пеще́ру я́ко ме́сто явле́ния благода́ти Твоея́ освяти́вшая.

Ра́дуйся, от за́пада до восто́ка мно́гими чудесы́ сле́д стопы́ Своея́ просла́вившая; ра́дуйся, подо́бие ея́ созда́ти и ди́вно украси́ти благослови́вшая.

Ра́дуйся, стопо́ю Твое́ю и на Аму́рской земли́ благода́тную си́лу источи́вшая; ра́дуйся, я́ко моли́твою пред не́ю прие́млем душе́вное утеше́ние.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 12.

Благода́ть свы́ше, пробужда́ющую на́с от душе́внаго омертве́ния и от грехо́внаго окамене́ннаго нечу́вствия, пода́ждь на́м, Влады́чице, с ве́рою и любо́вию лобыза́ющим чуде́сне на ка́мени запечатле́нную стопу́ Твою́, да грехо́вныя тьмы́ избежа́вше, о Тебе́ Промысли́телю Бо́гу вопие́м: Аллилу́иа.

И́кос 12.

Пое́м Твоя́ чудеса́, Влады́чице, в доли́не Доло́жстей у святы́я пеще́ры и ка́мня со стопо́ю бы́вшая, благодари́м Тя́ и прославля́ем ми́лости Твоя́ бога́тыя, на на́с и отце́х на́ших явле́нныя. Мо́лим Тя́, Ма́ти Жи́зни ве́чныя, сотвори́ и на́с, на земли́ Аму́рской живу́щих, прича́стники бы́ти ве́чныя ра́дости, да Тобо́ю спаса́еми, восхва́лим Тя́ си́це:

Ра́дуйся, любо́вь Твою́ к оби́тели Среднебе́льстей показа́вшая; ра́дуйся, благо́е промышле́ние о не́й яви́вшая.

Ра́дуйся, оби́тель сию́ ми́лостию Свое́ю посети́вшая; ра́дуйся, я́ко зало́г любве́ Своея́ стопу́ на ка́мене дарова́вшая.

Ра́дуйся, и́нокинь среднебе́льских Покрови́тельнице; ра́дуйся, подвиза́ющихся наде́жная Засту́пнице.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 13.

О Всепе́тая Де́во, Христа́ Бо́га на́шего Ма́ти, ми́лостивно приими́ сие́ ма́лое моле́ние на́ше пред чудотво́рным о́бразом Твои́м и ка́менем с цельбоно́сною стопо́ю, возноси́мое. Озари́ у́бо ду́ши на́ша све́том Боже́ственныя благода́ти Сы́на Твоего́. Покры́й на́с от вся́каго зла́, ско́рби и печа́ли; в боре́ниих и ну́ждах на́ших не оста́ви на́с, Твоему́ заступле́нию усе́рдно ве́рующих, да спасе́нии Тобо́ю в безконе́чнем ве́це воспое́м Бо́гу: Аллилу́иа.

Моли́тва Пресвяте́й Богоро́дице пред свято́ю Ея́ Цельбоно́сною Стопо́ю

О Всеми́лостивая Госпоже́, Цари́це и Влады́чице, от все́х родо́в избра́нная и все́ми ро́ды небе́сными и земны́ми ублажа́емая! Воззри́ ми́лостиво на предстоя́щих пред свято́ю ико́ною и Цельбоно́сною Стопо́ю Твое́ю и усе́рдно моля́щихся к Тебе́, и сотвори́ предста́тельством и заступле́нием Твои́м у Сы́на Твоего́ и Бо́га на́шего, да никто́же оты́дет отсю́ду то́щ упова́ния своего́ и посра́млен в наде́жде свое́й, но да прии́мет ки́йждо от Тебе́ вся́ по благо́му изволе́нию се́рдца своего́ и по ну́жде и потре́бе свое́й, во спасе́ние души́ и во здра́вие те́лу. При́зри благосе́рдием, Всепе́тая Богоро́дице, и на оби́тель сию́, Твои́м и́менем нарица́ющуюся, избра́в ю́ в достоя́ние Себе́, неоску́дно источа́й то́ки исцеле́ний от Цельбоно́сныя Стопы́ Твоея́, чуде́сне на́м дарова́нной, да це́лы и неврежде́нны пребу́дем от вся́каго наве́та и прило́га вра́жия, вы́ну воспева́я и сла́вя на ме́сте се́м пресвято́е и́мя Отца́ и Сы́на и Свята́го Ду́ха, и Твое́ пресла́вное заступле́ние, во ве́ки веко́в. Ами́нь.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгельскими ли́цы воспева́ема и А́нгельскими Си́лы блажи́ма на небеси́, Богоро́дице Де́во, не пре́зри на́с, земны́х, воспева́ющих Тя́, Пречи́стая, и сла́вящих ди́вное зна́мение ми́лости Твоея́ на реце́ До́лгой, егда́ на ка́мени целе́бною стопо́ю запечатле́ла еси́ чуде́сное явле́ние Твое́. Е́юже зе́млю на́шу благода́тию озари́ла еси́, Чи́стая, от нея́ подава́я струи́ чуде́с и по́мощи ве́рным, зову́щим Ти́ такова́я:

Ра́дуйся, Благослове́нная Дщи́ Отца́ Небе́снаго; ра́дуйся, Неискусобра́чная Роди́тельнице Бо́га Сло́ва.

Ра́дуйся, арха́нгелов и а́нгелов Велича́ние; ра́дуйся, челове́ческих ликостоя́ний Похвале́ние.

Ра́дуйся, на ка́мени сле́д стопы́ Твоея́ на́м оста́вившая; ра́дуйся, явле́нием Свои́м у пеще́ры Доло́жстей лю́ди уте́шившая.

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Конда́к 1.

Взбра́нной Воево́де и Влады́чице на́шей Богоро́дице похва́льная воспису́ем Ти́ раби́ Твои́, Всеми́лостивая Ма́ти, благоизво́лившей яви́ти на ка́мени сле́д стопы́ Своея́ у пеще́ры Доло́жстей на реце́ До́лгой. Излива́я лобыза́ющим ю́ и моля́щимся Тебе́ милосе́рдие неизче́тное, от вся́ких на́с бе́д и скорбе́й свободи́, при́сно зову́щих:

Ра́дуйся, Пречи́стая Де́во, цельбоно́сною стопо́ю Твое́ю ми́лости на́м источа́ющая.

Моли́тва Пресвяте́й Богоро́дице пред свято́ю Ея́ Цельбоно́сною Стопо́ю.

О Всеми́лостивая Госпоже́, Цари́це и Влады́чице, от все́х родо́в избра́нная и все́ми ро́ды небе́сными и земны́ми ублажа́емая! Воззри́ ми́лостиво на предстоя́щих пред свято́ю ико́ною и Цельбоно́сною Стопо́ю Твое́ю и усе́рдно моля́щихся к Тебе́, и сотвори́ предста́тельством и заступле́нием Твои́м у Сы́на Твоего́ и Бо́га на́шего, да никто́же оты́дет отсю́ду то́щ упова́ния своего́ и посра́млен в наде́жде свое́й, но да прии́мет ки́йждо от Тебе́ вся́ по благо́му изволе́нию се́рдца своего́ и по ну́жде и потре́бе свое́й, во спасе́ние души́ и во здра́вие те́лу. При́зри благосе́рдием, Всепе́тая Богоро́дице, и на оби́тель сию́, Твои́м и́менем нарица́ющуюся, избра́в ю́ в достоя́ние Себе́, неоску́дно источа́й то́ки исцеле́ний от Цельбоно́сныя Стопы́ Твоея́, чуде́сне на́м дарова́нной, да це́лы и неврежде́нны пребу́дем от вся́каго наве́та и прило́га вра́жия, вы́ну воспева́я и сла́вя на ме́сте се́м пресвято́е и́мя Отца́ и Сы́на и Свята́го Ду́ха, и Твое́ пресла́вное заступле́ние, во ве́ки веко́в. Ами́нь.